د بریټانیا پارلماني ټاکنې چې تېره ورځ پیل شوې وې، د کارګر ګوند په کې د ډېرو څوکیو په ګټلو سره د دغو ټاکنو ګټونکی شو. د دغه ګوند مشر کېیر سټارمر په رسمي توګه په دغو ټاکنو کې د خپل ګوند بریالیتوب اعلان کړ.
په دغو ټاکنو کې د کارګر ګوند له بریالیتوب سره په بریټانیا کې د محافظه کارانو ۱۴ کلنه واکمني پای ته ورسېده.
د دغو ټاکنو د ګټلو له پاره د پارلمان له ۶۵۰ څوکیو څخه هر ګوند ته په کار وه، چې ۳۲۶ څوکۍ خپلې کړي چې د کارګر ګوند د ۳۶۴ څوکیو په ګټلو سره د دغو ټاکنو ګټونکی اعلان شو.
د ټاکنو له ګټلو وروسته کېیر سټارمر خپلو پلویانو ته په وینا کې وویل:« په بریټانیا کې د بدلون وخت راغلی، سیاست باید په خدمت بدل کړو. په سخت کار سره به هېواد له کړکېچونو وباسو.»
ورته مهال ریشي سونک په دغو ټاکنو کې خپله ماته ومنله او سټارمر ته یې د بریا مبارکي ورکړه؛ خو نوموړي بیا په پارلمان کې خپله څوکۍ ساتلې ده.
