د انډونیزیا چارواکو د دوشنبې په ورځ اعلان وکړ، چې د سرو په یوه کان کې د ځمکې د ښویېدو له امله لږ تر لږه ۱۰ کسان مړه شوي او ۴۰ نور ورک دي. ددې هېواد د ژغورنې ډلې مشر وایي، چې ځمکه د تېزو ورښتونو له امله د ګورونټالو ایالت په سوواوا سیمه کې ښویېدلې ده.
یاد انډونیزیایي چارواکي وویل: «مونږ د ژغورنې د ټیم، د پولیسو او د پوځي کارکوونکو ۱۶۴ کسان د ورک شویو د پیدا کولو لپاره سیمې ته استولي دي.»
د انډونیزیا د ژغورنې ټیم د دوشنبې په مازدیګر اعلان وکړ، چې د سختو ورښتونو له امله یې د ورک شویو کسانو د پیدا کولو چارې ځنډولي دي.
د یاد ټیم مشر هریانټو وایي، چې ژغورونکي مجبوره شول چې کابو ۲۰ کیلو مټره مزل وکړي، څو د پېښې سیمې ته ورسېږي.
د راپورونو له مخې، په دې پېښه کې څو کورونه او یو پُل هم زیانمن شوي دي.
یاد سازمان د ګورونټالو د یو شمېر سیمو اوسېدونکو ته خبرداری ورکړ، چې د دوشنبې او سې شنبې په ورځو کې هم په دې سیمو کې د سختو ورښتونو اټکل کړی دی.
د روان میلادي کال په مې میاشت کې بیا د انډونیزیا په لویدیځ سوماټرا کې هم د سختو ورښتونو او سېلابونو له امله ۵۰ کسانو ژوند له لاسه ورکړ.
