افغانستان د ګاز او تېلو په برخو کې له ازبکستان څخه د پانګونې غوښتنه کړې ده
د طالبانو د سوداګرۍ وزیر له ازبکستان څخه غوښتي، څو په افغانستان کې د ګاز او تېلو په برخو کې پانګونه وکړي.
د طالبانو د سوداګرۍ وزیر له ازبکستان څخه غوښتي، څو په افغانستان کې د ګاز او تېلو په برخو کې پانګونه وکړي.
نورالدین عزیزي د ازبکستان د کانونو او جیولوجۍ له وزیر سره په کتنه کې ویلي، چې ازبکستان باید د افغانستان په شمال کې د تېلو او ګازو په کانونو کې پانګونه وکړي.
د نوموړي په وینا؛ د افغانستان شمالي برخه ازبکستان ته نږدې ده او بازارونو ته هم په اسانۍ سره لاسرسی پیدا کیږي.
د طالبانو د صنایعو او سوداګرۍ وزیر دغه راز په ازبکستان کې د مسو د پروسس لپاره د دوو سترو فابریکو د جوړېدو په اړه هم خبرې وکړې.
ښاغلی عزیزي وایي، چې دغه فابریکې خامو موادو ته بېړنۍ اړتیا لري او د افغانستان د مسو په اېستلو سره پوره کېدای شي.
په دې کتنه کې بوبیر اسلاموف د کانونو په بېلابېلو برخو کې د دواړو هېوادونو ترمنځ پر نیږدې همکارۍ ټینګار کړی دی.
نوموړي دغه راز د افغانستان او ازبکستان ترمنځ د پانګونې د خوندیتوب د تړون لاسلیکولو ته هم چمتوالی ښودلی.
د طالبانو د صنایعو او سوداګرۍ وزیر له اسلاموف څخه غوښتي، څو د غزني او هرات ولایتونو د مسو په کانونو او په افغانستان کې د کانې موادو د پروسس د فابریکو په جوړولو کې هم پانګونه وکړي.
په دې کتنه کې هوکړه وشوه، چې د ازبکستان یو رسمي پلاوی به د افغانستان د کانونو او پيټرولیم وزارت سره په همږغۍ د سروې او تخنیکي کارونو لپاره افغانستان ته سفر وکړي.
د راپورونو له مخې، د ۲۰۲۴ کال له جنورۍ څخه د اپرېل تر میاشتې پورې له افغاسنان سره د ازبکستان د سوداګرۍ کچه ۳۰۸،۶ مېلیونه ډالره و.
که څه هم ازبکستان د نورو هېوادونو په څېر طالبان په رسمیت نه پېژني، خو له دې ډلې سره نږدې او پراخې اقتصادي اړیکې لري.
د ازبکستان ولسمشر په اذربایجان کې د ترک هېوادونو د سازمان په غونډه کې د افغانستان د کنګل شویو شتمنیو د خلاصون غوښتنه هم وکړه.
نوموړي ویلي، چې د نړۍ په بېلابېلو برخو کې د جګړو او تاوتریخوالي له امله افغانستان د نړۍوالې ټولنې له پامه غورځیدلی دی.
په دې غونډه کې د ازبکستان ولسمشر زیاته کړې، چې هېواد به یې د افغانستان له خلکو سره لازمو مرستو ته دوام ورکړي.
