اوکرایني چارواکو ویلي، چې روسیې د دوشنبې په سهار د اوکراین پر ښارونو د توغندیو باران کړی، چې لږ تر لږه ۲۹ ملکیان یې وژلي او د کییف د ماشومانو روغتون په دغه برید کې په ناوړه توګه صدمه لیدلې ده.
په سلګونو خلک روغتون ته ورغلي، چې د ودانۍ نړېدلو برخو په پاکولو کې له مرستندویه ډلو سره مرسته وکړي.
تر برید وروسته مېندې او پلرونه لیدل شوي، چې خپل ماشومان یې له روغتون روان کړي او د کییف په سړکونو کې ژاړي.
۳۳ کلن سویتلانا کراچینکو رویټرز خبري اژانس ته وویل: "دا برید ویرونکی و. ما ساه نه شوه اخیستی، ما هڅه کوله (زما ماشوم) پټ کړم. ما هڅه کوله چې هغه په دې ټوکر کې پټ کړم ترڅو هغه تنفس وشي کړی."
ولسمشر ولادیمیر زېلینسکي ویلي، چې روسیې تر ۴۰ ډېر توغندي توغولي، چې په کییف، کریوي ریح، دنیپرو مرکزي ښار او دوه ختیځو ښارونو لګیدلي او د استوګنې او سوداګریزې ودانۍ او زېربناوې زیانمنې کړې دي.
اوکرایني چارواکو ویلي، چې په کییف کې د بریدونو په اصلي څپو کې لس کسان وژل شوي او ۳۵ نور ټپیان شوي دي.
د بېړنیو خدماتو څانګې ویلي، چې له لومړي برید څخه څه د پاسه دوه ساعته وروسته، د بل توغندي برید چې په یو بل روغتون لګیدلی، څلور کسان پکې وژل شوي او درې نور ټپیان دي.
د بېړنیو خدماتو څانګې په وینا؛ په کریوی ریح کې یوولس کسه وژل شوي او تر ۴۰ ډېر ټپیان دي. د سیمې والي وايي، چې درې کسان په ختیځ ښار پوکروسک کې وژل شوي چېرې چې توغندي پر یو صنعتي مرکز لګیدلي دي.
چارواکو وویل، چې یو کس د نیپرو په ښار کې هم وژل شوی دی.
زېلینسکي پر ټیلیګرام ویلي: "ټوله نړۍ باید د روسیې د هوايي بریدونو د پای ته رسولو لپاره پرېکنده عمل وکړي. وژنې هغه څه دي چې پوتین یې لامل دی. یوازې په ګډه موږ کولی شو ریښتینې سوله او امنیت ترلاسه کړو."
د روسیې دفاع وزارت ویلي، چې ځواکونو یې په اوکراین کې د دفاعي صنعت پر اهدافو او هوايي اډو بریدونه کړې دي.
مسکو په مکرر ډول د ملکي وګړو او ملکي زېربناو په نښه کول رد کړي، که څه هم د ۲۰۲۲ کال په فېبروري کې د روسیې د یرغل له پیل راهیسې د دغه هېواد بریدونو زرګونه ملکي وګړي وژلي دي.
دا برید یوه ورځ مخکې له هغې وشو، چې د ناټو د غړو هېوادونو مشران د پوځي اتحاد درې ورځنۍ سرمشریزه پیل کړې، چې تمه کیږي د اوکراین د جګړې په اړه زېلینسکي هم پکې ګډون وکړي.
په کییف کې د متحده ایالاتو سفیر بریجیټ برنک پر اېکس لیکلي: "دا ظالمانه تیري - د انسانانو ژوند ته په بشپړ ډول بې غوري ده، د اروپا او ټرانزاټلانټیک امنیت له خطر سره مخ کوي - له همدې امله مشران به په دې اونۍ کې اوکراین ته د پام وړ امنیتي ژمنې وکړي."
