د اوکراین یوې امنیتي سرچینې د یکشنبې په ورځ رویټرز خبري اژانس ته ویلي، چې اوکرایني بې پېلوټه الوتکو په روسیه کې د وسلو یوه ډیپو په نښه کړی او په نږدې راتلونکي کې د روسیې په پوځي-صنعتي مرکزونو کې د نورو چاودنو احتمال هم شته دی.
دغې سرچینې د نوم د نه ښودلو په شرط رویټرز ته ویلي، چې د وسلو د زېرمه کولو مرکز د روسیې په ورونژه سیمه کې دی، چې د اوکراین له شمال ختیځې برخې سره پوله لري.
د سرچینې په وینا؛ په دغه ډيپو کې د روسیې له ځمکې څخه ځمکې ته او له ځمکې څخه هوا ته توغندي، د ټانک او توپخانې مرمۍ او ځینو نورې وسلې ساتل کیدې.
د سرچینې په وینا؛ دا ډیپو د سرګییفکا کلي ته نږدې و، چې د کییف تر کنټرول لاندې سیمې څخه شاوخوا ۸۵ کیلومتره واټن لري.
وروسته له هغه چې روسیې په ۲۰۲۲ کې پر اوکراین برید وکړ، اوکراین د اوږد واټن بې پیلوټه الوتکو یوه ډله جوړه کړه ترڅو دا وړتیا پېدا کړي چې په روسیه کې دننه هدفونه په نښه کړي.
سرچینې وویل: "په نږدې راتلونکي کې د روسیې په پوځي-صنعتي تاسیساتو کې د دا ډول بریدونو ډېر چانس شته، کوم چې د اوکراین په وړاندې د جګړې لپاره کار کوي."
