د امریکا بهرنیو چارو وزارت په ولسمشریزو ټاکنو کې د ایرانیانو پراخ نه ګډون ته په اشارې سره وویل، چې دا ټاکنې «ازادې او عادلانه» نه وې. د امریکا بهرنیو چارو وزارت ویلي، «موږ هېڅ تمه نه لرو چې دا ټاکنې به په ایران کې د بنسټیزو بدلونونو او یا بشري حقونو ته د ډېر درناوي لامل شي.»
د اسوشیېټیډ پریس د راپور له مخې د امریکا د بهرنیو چارو وزارت د شنبې په ورځ د ایران د ولسمشریزو ټاکنو د نوماندانو څرګندونو ته په اشارې سره وویل: «د ایران سیاست د مذهبي رهبر له خوا ټاکل کیږی.»
د اسوشیېټیډ پریس د راپور له مخې پزشکیان په خپل ټاکنیز کمپاین کې د ایران په شیعه مذهبي حکومت کې د کوم بنسټیز بدلون ژمنه نه ده کړې او د ایران مشر علي خامنه ای له ډیرې مودې راهیسې د دغه هیواد د چارو اداره کوي.
پزشکیان له ټاکنو ګټلو مخکې په خپلو ټاکنیزو کمپاینونو کې وویل: «امریکا باید لومړی خپلې ټولې ژمنې پوره کړي چې موږ تړونونو او ژمنو ته راستانه شو.»
