د غزې د روغتیا وزارت د شنبې په ورځ (د چنګاښ ۱۶مه) وویل، چې په یوه ورځ کې پنځه تنه فلسطیني خبریالان د غزې د تړانګې په بېلابېلو سیمو کې د اسراییل په بریدونو کې وژل شوي دي.
د غزې د رسنیو دفتر په یوه اعلامیه کې ویلي، چې د غزې په تړانګه کې د جګړې له پیل راهیسې ۱۵۸ خبریالان وژل شوي دي.
د غزې د دولتي رسنیو دفتر وايي، چې اسراییلي پوځ د جګړې له پیل راهیسې په قصدي توګه فلسطینی خبریالان په نښه کړي دي. د دغه بنسټ په وینا، اسراییل هڅه کوي چې په غزه کې د خبریالانو په نښه کولو سره خپل جنګي «جنایتونه» پټ کړي. دغه ادارې ویلي، چې په وروستیو بریدونو کې د خبریالانو ترڅنګ، ۲۴ نور کسان هم وژل شوي دي.
په فلسطین کې د ملګرو ملتونو د بې ځایه شویو د ادارې مشر، فیلیپ لازاریني وویل، چې د ملکي خلکو د ډله ییزې بې ځایه کیدو «دایمي دوره» او د خلکو "د بقا حالت" او "مایوسي" باید پای ته ورسول شي.
د خبریالانو د خوندیتوب د نړۍوالې کمېټې د معلوماتو او شمېرو له مخې، د غزې جګړه د خبریالانو لپاره تر ټولو خونړۍ جګړه بلل شوې ده. دغه اداره په ټوله نړۍ کې د خبریالانو د وژنې اسناد ثبتوي.
تر دې مخکې په واشنګټن کې د خبریالانو یوې نړۍوالې ادارې هم ویلي و، چې په تېرو ۳۰ کلونو کې غزه کې د خبریالانو پر وړاندې د تاوتریخوالي کچه تر ټولو لوړه ده. دغه سازمان له اسراییل غوښتي چې د خبریالانو وژنه ودروي.
د خپرو شویو شمېرو له مخې، د غزې په تړانګه کې د جګړې له پیل راهیسې تر ۳۸ زرو ډېر کسان وژل شوي، چې ډېری یې ښځې او ماشومان دي.
