له واشنګټن څخه په زرګونه کیلومتره لرې د هند په سویل کې د یوه کوچني کلي خلک تمه لري، چې د امریکا د ولسمشر مرستیاله کماله هریس به د جوبایډن پر ځای له ډونالډ ټرمپ سره سیالي وکړي. د هريس نيکه څه دپاسه يوه پيړۍ مخکې د هند د تامل ناډو ايالت په تلاسندرپورم کلي کې زېږېدلی و.
په ۲۰۲۱ کې د دې کلي اوسیدونکو د متحده ایالاتو د مرستیال ولسمشر په توګه د کماله هريس د راتګ جشن د خوږو په ویشلو، اورلوبو او د هغې په سینګار شويو تصویري پوسټرونو نصبولو سره ولمانځه.
د راپورونو له مخي، که جوبايډن له ټاکنيزو لیکو ووځي، کماله به د جوبايډن د ځای ناستي لپاره یو له اصلي انتخاب څخه وي، د دغه کلي اوسېدونکي اوس تمه لري، چې هيلې به يې پوره شي.
د رویټرز په وینا، دوی د ټولنیزو رسنیو او تلویزیوني چینلونو څخه د امریکا د ولسمشریزو ټاکنو په اړه راپورونه په احتیاط سره تعقیبوي.
د راپورونو له مخې کله چې هريس پنځه کلنه وه، تولاسندراپورم ته ولاړه او د خپل نيکه سره یې ولیده، په داسي حال کې، چې هغه د مرستيال ولسمشر په توګه د خپلي دندې پر مهال خپل پلرني کلي ته نه ده تللې.
د اغلي هريس مور هندۍ او پلار یې جامیکايي دی، نوموړې په امريکا زېږېدلې ده.
تر دې مخکې رویټرز خبري اژانس د خپلو سرچینو په حواله راپور ورکړی و، چې که جوبایډن د امریکا له ولسمشریزو ټاکنو څخه وځي کماله هريس یو له مهمو انتخابونو څخه وي.
دا راپور وروسته له هغه خپور شو، چې د ډونالډ ټرمپ سره په مناظره کې د جو بایډن فعالیت په ټاکنو کې د سیالۍ لپاره د اوسني ولسمشر د عمر او وړتیا په اړه د ډیموکراتانو اندیښنې راپورته کړې.
په ورته وخت کې په تیرو څو ورځو کې د امریکا دیموکراتیک ولسمشر ویلي، چې د امریکا په راتلونکو انتخاباتو کې به له سیالۍ څخه تېر نه شي.
