په برېتانیا کې لسګونو زرو کسانو د یوه لاریون په ترڅ کې ددې هېواد له نوي لومړي وزیر څخه وغوښتل، څو د غزې د اوربند لپاره هڅه وکړي. دغه لاریونونه تېره ورځ په لندن ښار کې د فلسطین په ملاتړ ترسره شول.
دا لاریونونه په داسې حال کې کیږي، چې د تېر میلادي کال په نومبر میاشت کې هم د لندن په مرکزي برخه کې د فلسطينيانو په ملاتړ يو تر ټولو لوی لاريون وشو، چې شاوخوا ۳۰۰ زره کسانو په کې ګډون درلود.
د نړۍ په بېلابېلو هېوادونو کې په ځلونو د اسراییل پر ضد او د فلسطینیانو په ملاتړ پراخ لاریونونه شوي دي.
لاریونوال په غزه کې د جګړو د پایته رسېدو او د خپلواک فلسطین غوښتونکي دي.
دغه لاریون په داسې حال کې کېږي، چې د غزې د روغتیا وزارت ویلي چې د شنبې په ورځ د غزې په تړانګه کې پر یوه ښوونځي چې فلسطیني کډوال په کې اوسیږي، د اسراییلي پوځ په برید کې لږ تر لږه «۱۶ تنه وژل شوي او ۵۰ نور ټپیان شوي» دي.
د اسراییل پوځ بیا ویلي دي، چې وسله والو دغه ځای د پټنځای په توګه کارولی دی.
د راپورونو له مخې، د غزې په تړانګه کې د جګړې له پیل راهیسې تراوسه څه باندې ۳۸ زره کسان وژل شوي، چې ډېری یې ښځې او ماشومان دي.
