په کندهار کې صرافان وايي، د طالبانو له لوري د کندهار د صرافۍ مارکیټ ګڼې هټۍ او د هغو صرافانو کاروبار بند شوی چې د صرافۍ په مارکیټ کې یې وړې صرافۍ لرلې. صرافان وايي، د طالبانو په دغه کار سره ۷۰۰ کسان وزرګاه شوي دي.
له کندهاره سرچینو افغانستان انټرنشنل ـ پښتو ته وویل، چې د سې شنبې په سهار د (چنګاښ ۱۹مه) په دغه ولایت کې د صرافانو په دوو لویو مارکیټونو کې چې د دغه زون په کچه لوی سوداګریز مرکزونه دي، د طالبانو له لوري په کې سل هټۍ وتړل شوې.طالبانو د هغو کسانو کاروبار بند کړی، چې واړه کارځایونه یې لرل او د صرافۍ لاسي کاروبار یې کاوه.صرافان وايي، طالبانو هغه هټۍ تړلې چې جوازونه یې نه وو نوي کړي.صرافان وايي، د طالبانو له لوري د صرافۍ جواز د اخیستلو لپاره د طالبانو له لوري اېښودل شوي شرطونه ملا ماتوونکي دي.د حکمت الله په نوم یو صراف وايي، د کندهار په صرافۍ مارکیټونو کې ۷۰۰ تنه له دې امله وزګار شول چې د طالبانو د صرافۍ بولۍ او پر بهرنیو پیسو یې راکړه ورکړه نه ده کړې.نوموړی وايي، دغه شمېر کسان د صرافۍ په مارکیټونو کې د منشیانو، اشپزانو او صفا کارانو په توګه له صرافانو سره په دنده بوخت وو.د طالبانو د نویو اصولو له مخې، د صرافۍ جواز غوښتونکي باید لس مېلیونه افغانۍ حکومت ته ضمانت ورکړي.طالبانو څو ورځې وړاندې هم د کندهار ولایت په سپین بولدک ولسوالۍ کې د صرافیو ګڼې هټۍ تړلې وې.طالبانو تېره ورځ د کابل شهزاده سرای او څېرمه سیمو کې د ګرځنډه صرافانو پر فعالیت بندیز ولګاوه.د طالبانو یوې ګډې کمېټې د یوې اعلامیې په خپرولو سره ویلي:« د شهزاده سرای ټولو لاس پلورونکو ته خبر ورکول کېږي، چې په سرای کې دننه د فعالیت اجازه نه لري.»
