د شانګهای همکاریو سازمان په چارو کې د روسیې د ولسمشر ځانکړي استازي بختیار حکیموف خبر ورکړی، چې د شانګهای همکاریو په سازمان کې د افغانستان د غړیتوب خبره لانده څېړل شوې.
د حکیموف په وینا، اوسمهال په دغه سازمان کې د افغانستان د غړیتوب غوښتنه په کاري اجنډا کې شامله شوې نه ده.
د داریو خبري اژانس د راپور له مخې ښاغلي حکیموف ویلي، چې افغانستان په ۲۰۱۵ کال کې د شانګهای همکاریو سازمان لپاره د غړیتوب غوښتنه وړاندې کړې وه.
هغه ټینکار کړی، چې د افغانستان وضعیت لاهم د شانګهای همکاریو سازمان په اډانه کې یوه مهمه موضوع ده.
ښاغلي حکیموف ویلي، چې د شانګهای همکاریو سازمان غړي هېوادونه له افغانستان سره خپلو همکاریو ته دوام ورکوي او هر یو د خپلو قوانینو، ګټو او لارښوونو پر بنسټ پرمخ ځي.
افغانستان له ۲۰۱۲ کال راهیسې د شانګهای همکاریو سازمان د څارونکي په توګه پاتې شوی؛ خو واک ته د طالبانو له رسېدو وروسته د دغه سازمان ناستو ته هیچا ته هم د افغانستان په استازیتوب د تګ اجازه نهده ورکړل شوې.
