په سیمه کې ځايي سرچېنې وايي، پر هغو زرګونه پرلت کوونکو ناپېژانده وسلهوالو ډزې کړې چې د بنو ولسوالۍ په سپورټ کمپلېکس کې یې د «عزم استحکام» د پوځي عملیاتو د نه کولو او په سیمه کې د امن او سولې د ټینګښت په موخه پرلت وهلی و.
د بنو اوسېدونکو له هغې وروسته په لاریون لاس پورې کړ، چې وړمه ورځ په دغې ولسوالۍ کې په یوه روغتیايي مرکز برید شوی و او له امله یې د ښځو او ماشومانو په ګدون اووه تنه وژل شوي وو.
لومړی د بنو ولسوالۍ زرګونه اعتراض کوونکو د بنو په ښار کې لاریون وکړ او له هغې وروسته یې د دغې ولسوالۍ په سپورټ کمپلېکس کې پرلت وواهه.
دغه برید هغه مهال وشو، چې پرلتوالو ته د تحریک انصاف ګوند غړي او د خیبر پښتونخوا د عامې روغتیا وزیر پښتونیار خان وینا کوله.
په سیمه کې ازاد خبریال رفعت الله ورکزي افغانستان انټرنشنل پښتو ته وویل، چې له دغه بریده ښاغلی پښتونیار روغ وتلی او په وینا یې چې په دغه برید کې یو کس ځای پر ځای وژل شوی او نږدې شل کسه نور ټپیان شوي دي.
په ټپیانو کې د ځینو هغو روغتیايي حالت د اندېښنې وړ ښودل شوی.
تر اوسه د دغه برید پړه کومې ډلې نه ده منلې؛ خو له هغه وروسته چې د پاکستان حکومت په یو شمېر قبایلي سیمو کې د عزم استحکام په نامه د پوځي عملیاتو د پیلېدا خبره کړې، نو ورسره هممهاله په دغو سیمو کې د دغو عملیاتو پر ضد اعتراضیه غونډې جوړې شوې او په ځینو سیمو کې خلکو د اعتراض په توګه پرلتونه هم وهلي دي.
