پاکستان د ۱۲۶ هېوادونو اتباعو ته د وړیا وېزو ورکولو پلان تصویب کړ

د پاکستان فډرالي کابینې په یوه بې ساري اقدام کې یو داسې پلان تصویب کړ، چې پر اساس به یې د ۱۲۶ هېوادونو اتباعو ته وړیا وېزې ورکول کیږي.

د پاکستان فډرالي کابینې په یوه بې ساري اقدام کې یو داسې پلان تصویب کړ، چې پر اساس به یې د ۱۲۶ هېوادونو اتباعو ته وړیا وېزې ورکول کیږي.
د پاکستان حکومت ویلي، چې دغه اقدام یې د سوداګرو، سیلانیانو د راجلبولو او په سوداګرۍ کې د اسانتیا رامنځته کولو په موخه ترسره کړی دی.
دغه پلان د چهارشنبې په ورځ د پاکستان د لومړي وزیر شهباز شریف په کابینه کې تصویب شو.
د پاکستاني رسنیو د راپورونو له مخې؛ کابینې د وړیا وېزې پلان ترڅنګ د انلاین ویزې غوښتنلیک سیسټم هم تصویب کړ، چې له مخې به یې د ۱۲۶ هېوادونو اتباع له غوښتنلېک وروسته د پاکستان سوداګریزې او سیاحتي ویزې ترلاسه کړي.
ویل کیږي، چې د پاکستان د کابینې پرېکړه به د بهرنیو چارو وزارت له خوا هېوادونو ته رسول کېږي او د کورنیو چارو وزارت به یې عملي کوي.
پاکستان په داسې حال کې د نړۍ ډېرو هېوادونو ته د وړیا ویزې ورکولو پلان تصویب کړ، چې د سرچینو په وینا په دې وروستیو کې افغانانو ته د پاکستان د ویزې بیه ۱۲۰۰ امریکایي ډالرو ته رسېدلې ده.
تر دې مخکې د پاکستان د وېزې د بیې له لوړېدو وروسته د طالبانو د بهرنیو چارو وزیر امیرخان متقی په کابل کې د پاکستان د سفارت له شارژدافیر عبیدالرحمان نظاماني څخه غوښتي و، چې افغانانو ته دې د وېزو په ورکولو کې شفافیت راولي.


د پاکستان د بهرنیو چارو وزارت ویانده وايي، د القاعده غړی امین الحق په تېر مارچ کې له افغانستانه پاکستان ته د اوښتو پر مهال ونیول شو. خو تر دې مخکې د پاکستان د پنجاب صوبې پولیسو ویلي و، د دغه هېواد د ترهګرۍ ضد ادارې امین الحق د دې صوبې د جیلم سیمې په سرای عالمګیر کې نیولی دی.
پاکستاني چارواکو د جولای پر ۱۹ یا شپږ ورځې مخکې د نوموړي د نیول کېدو خبر رسنیز کړ.
هغه مهال د پاکستان د ترهګرۍ ضد ادارې وویل، چې د استخباراتي ځواکونو په همکارۍ یې امین الحق ونیو.
هغه مهال پاکستاني چارواکو د نوموړي د نیول کېدو کره نېټه ونه ښوده، خو د پاکستان د بهرنیو چارو وزارت ویاندې نن په اسلام اباد کې خبریالانو ته وویل: «د القاعده غړی امین الحق په سږني مارچ کې زموږ قانون پلي کوونکو ادارو هغه وخت ونیو چې له افغانستانه بې قانونه پاکستان ته اوښت.»
هغې زیاته کړه، چې د نوموړي اړوند مالومات یې له ملګرو ملتونو سره هم شریک کړي دي.
تر دې مخکې پاکستاني چارواکو دا هم ویل، چې امین الحق پاکستانی شناختي کارډ سره پاکستان کې وخت تېراوه.
د افغانستان د ننګرهار اوسېدونکی امین الحق د القاعده د پخواني مشر اسامه بن لادن نږدې ملګری پاتې شوی.
اسامه بن لادن د ۲۰۱۱ کال د مۍ په دویمه کې د پلازمېنې اسلام اباد په څو پنځوس کیلومترۍ کې د پاکستان د یوې پوځې اډې ته څېرمه د امریکا د ځانګړو ځواکونو برید کې ووژل شو.
د پاکستان د ترهګرۍ ضد اداره وايي، چې امین الحق د ۲۰۰۱ کال د نومبر پر ۱۵ په وروستي ځل له اسامه سره لیدلی دي.
امین الحق د اسامه تر مرګ مخکې او ۲۰۰۷ کال کې په پاکستان کې ونیول شو، چې امریکايي چارواکو هم ترې پلټنې وکړې.
امنن الحق پر ۲۰۱۱ کال د پاکستان له بند خوشی شو.
نوموړی د ملګرو ملتونو د بندیزونو په نوملړ کې شامل دی
امین الحق د ۲۰۲۱ کال د اګست پر ۱۵ د طالبانو واکمنېدو سره افغانستان ته لاړ او هلته یې طالب وسلوالو تود هرکلی وکړ.

د ښځو کرېکټ ۲۰ اوره اسیا جام په سيالیو کې نن د پاکستان لوبډلې متحده عربي اماراتو ته د ۱۰ ويکټو په توپير ماتې ورکړه. پاکستان د څلورو نومرو په درلودلو سره د دې سياليو د اول ګروپ په دویم مقام او متحده عربي اماراتو لوبډله بيا د جدول په پای کې قرار لري.
د ښځو کرېکټ ۲۰ اوره اسيا جام د سياليو د ۹مې لوبې پچه پاکستان ښځينه کرېکټ لوبډلې وګټله او لومړۍ يې ډګر ساتنه او توپ اچونه غوره کړه.
د متحده عربي اماراتو ښځينه کرېکټ لوبډلې د خپلو ۸ لوبغاړو په سوځېدو ۱۰۴ منډې هدف وټاکه.
پاکستانۍ توپ اچوونکو صديقې اقبال او نشرا سندو دوې - دوې لوبغاړې وسوځولې.
پاکستان ښځينه کرېکټ لوبغاړو د ۱۴.۱ اور کې په دوو پيليزو لوبغاړو دغه هدف پوره کړ او لوبه یې د لسو ويکټو په توپير وګټله.
د دې سياليو د لومړۍ ګروپ څخه هند ښځينه کرېکټ لوبډله د ۶ نومرو او پاکستان لوبډله د ۴ نومرو په لرلو د سياليو دویم پړاو ته لاره پېدا کړه.

د افغانستان لپاره د پاکستان ځانګړي استازي اصف دراني په اسلام اباد کې یوې غونډې ته په وینا کې وویل، چې په افغانستان کې د ترهګرۍ سرچینه د پاکستان، چین، ایران، تاجکستان او ازبکستان لپاره د اندېښنې وړ خبره ده. دراني پاکستاني طالبان د خپل هېواد "سره کرښه" وبلله.
د پاکستان ځانګړي استازي د سې شنبې په ورځ په اسلام اباد کې د سیمه ییزو مطالعاتو په انسټیټیوټ کې یوې غونډې ته وویل، چې له افغان طالبانو سره باید له زغمه کار واخیستل شي.
دا څرګندونې په داسې حال کې کېږي، چې د دوشنبې په ورځ د پاکستان پوځ وویل چې درې وسله وال یې چې غوښتل یې له افغانستان تېر شي، وژلي دي.
پاکستان په وار - وار افغان طالبان تورن کړي، چې پاکستاني طالبانو ته پناه ورکوي او له افغانستانه بریدونه کوي.
افغان طالبانو بیا په وار - وار دغه تورونه رد کړي دي.
د دراني په وينا؛ پاکستان غواړي په افغانستان کې داسې شرايط رامنځته کړي، چې د درې ميليونو افغان کډوالو د بېرته ستنېدو زمينه برابره کړي.
دراني وويل؛ د دوحې په درېيمه غونډه کې د کوکنارو د کښت د له منځه وړلو لپاره د طالبانو هڅې وستايل شوې.
اصف دراني د افغانستان او پاکستان ترمنځ د سوداګریزو ټرانزیتي اړیکو په برخه کې د ننګونو پر هواري ټینګار وکړ او ویې ویل، د سیمه ییز اتصال پروژې لکه؛ ټاپي او کاسا ۱۰۰۰ باید ګړندۍ شي.

د پښتون ژغورنې غورځنګ مشر وايي، د پاکستان پوځ د ترهګرۍ او جنګ خلاف او د سولې په حق کې د پښتنو د روانو هڅو د شنډولو لپاره په دغه هېواد کې ځینې «سیاستوال او خبریالان په پیسو اخیستي دي.» منظور پښتین وايي، «پوځ د پښتنو د روان ملي حرکت پرضد د منفي پروپګنډ لپاره» دا کسان ګومارلي دي.
ښاغلی پښتین که څه هم چا ته اشاره نه کوي، خو د پښتونخوا ملي عوامي ګوند مشر محمود خان اڅکزي څو ورځې مخکې وویل، پښتونخوا د پاکستان برخه ده او نه غواړي چې پښتانه له پوځ سره په جنګ اخته شي.
د نوموړي دا خبرې له هغه وروسته وې چې د پښتون ژغورنې غورځنګ د مرکزي شورا د غړي تر وژل کېدو وروسته منظور پښتین وویل، د اکتوبر پر ۱۱ د پښتنو جرګه را غواړي.
د محمود خان اڅکزي پر دې خبرو خواله رسنیو کې پښتنو ملتپالو نیوکې وکړې او د دې جرګې د پیکه کولو لپاره یې وبللې.
د محمود خان اڅکزي تر څرګندونو وروسته تازه پښتونخوا کې یوه خبریال فاروق فراق د پوځ درېشي اغوسې او ور سره یې لیکلي دي: «د آي ايس پي آر د ډائريکټر جنرل ليفټننټ جنرال احمد شريف د پريس بريفنګ اثر.»
که څه هم منظور پښتین د محمود خان اڅکزی یا بل چا نوم نه دی یاد کړی، خو خپل فیسبوک کې یې لیکلي: د ترهګرې او جنګ پر خلاف او د امن په حق کې د پښتنو روان حرکت پر خلاف جي ایچ کیو اوس نوي بله صحافیان ، یوټیوبران او بیله بیل تش په نام سیاست مداران په پیسو اخستي دي.
منظور پښتن زیاتوي، چې د پاکستان پوځ د پښتنو د حقونو لپاره د دوی د مبارزې د مخنیوي هڅه کوي او وايي: «د روان ملي حرکت مشکوک کولو د پاره منفي پروپیګنډو ته تیاري کړې ده او کار ئې هم پرې شروع کړې دې.»
ښاغلی پښتین له پښتنو غواړي چې د پوځ د دې هڅو مقابل کې غلي نه شي او په مقابل کی یې مهذبه مبارزه وکړي: «باید هیڅ یو پښتون په دې غلې پاتې نشی او د پروپیګنډې پرخلاف په دلیل او مهذب الفاظ سره خپله بیانیه وړاندې کړي چې تر څو زمونږ وطن په اور او زمونږ محکوم اولس په مرګونو کې ساتې مونږ دې یو خبرې اوریدو ته هم تیار نه یو.»
د پاکستان ځايي رسنیو کې د پښتنو د حقونو غوښتلو لپاره د پښتون ژغورنې غورځنګ غونډو او همدا راز د دوی د ملاتړو نظر څرګندولو ته وخت نه ور کول کېږي.
سره له دې چې د پاکستان پلازمنېه اسلام اباد کې د دې غورځنګ د مرکزي شورا غړي او شاعر ګیلمن وزیر ټپي کېدو او بیا مړه کېدو ته نړیوالو رسنیو کې پراخ پوښښ ور کړل شو، خو پاکستاني رسنیو یې خبر هم خپور نه کړ.

نیویارک ټایمز راپور ورکړی چې د پاکستان حکومت له افغانستان سره د تګ لپاره د چمن پر خلکو محدودیتونو د زرګونو خلکو ژوند او کار اغېزمن کړی دی. د ورځپاڼې په وینا د چمن اوسېدونکي نه شي کولای په افغانستان کې خپلو کروندو او کاروبارونو ته ولاړ شي.
راپور کې ویل شوي، مخکې له دې چې د اکتوبر په میاشت کې دغه لار وتړل شی، هره ورځ د دواړو غاړو په زرګونو خلک یوازې په شناختي کارډونو او تذکرو سره له پولې تېرېدل.
نیویارک ټایمز د پاکستان د چمن د اوسېدونکی عبدالمنان کیسه کړې، چې له څو لسیزو راهیسې هره ورځ له خپل کور څخه افغانستان ته د خپلو کروندو د کرلو لپاره له پولې اوښته.
هغه وايي چې په افغانستان کې خپلو ځمکو ته نه شي تللى او زامنو يې چې له افغانستان يې يو شمېر سوداګريز توکي په پاکستان کې خپلو سيمو ته لېږدول، خپلې دندې له لاسه ورکړې دي.
د پاکستان حکومت په وروستیو میاشتو کې د چمن پر پوله د تګ راتګ محدودیتونه وضع کړي، چې له مخې یې مسافر باید ویزې او پاسپورت ولري.
پاکستاني چارواکي وايي اوسني بندیزونه یو اړین امنیتي اقدام دی.
دا د تیرې یوې پیړۍ راهیسې لومړی ځل دی چې د دې دروازې له رامینځته کیدو راهیسې مسافرین د تیریدو لپاره ویزو او پاسپورټونو ته اړتیا لري.
نیویارک ټایمز راپور ورکړی چې اوسنیو بندیزونو په پاکستان کې د هغو زرګونو کوچنیو سوداګرو ژوند اغېزمن کړی چې له پولې ورځني کورنی توکي او الکترونیکي توکي واردوي.
په دې وروستیو اونیو کې د پاکستان د چمن اوسېدونکو د سرحدي محدودیتونو پر ضد پراخ لاریونونه کړي، چې کله ناکله د تاوتریخوالي او لویو لارو د تړلو لامل شول. د پاکستان حکومت یو شمېر مظاهره کوونکي هم نیولي دي.
تېره اوونۍ د حکومت او مظاهره چیانو ترمنځ خبرې بیا پیل شوې او پاکستان د مظاهرو د موقتي پای ته رسولو په بدل کې یو شمېر مظاهره کوونکي خوشي کړل.