د منځني ختیځ د کړکېچ په زیاتېدو سره هوايي شرکتونو خپلې الوتنې ځنډولې دي
په منځني ختیځ کې د پراخې شخړې په اړه اندېښنو نړۍوالو هوایي شرکتونه اړ کړي، چې سیمې ته الوتنې وځنډوي یا اغیزمن شویو هوایي ډګرونو ته له الوتنو ډډه وکړي.
په منځني ختیځ کې د پراخې شخړې په اړه اندېښنو نړۍوالو هوایي شرکتونه اړ کړي، چې سیمې ته الوتنې وځنډوي یا اغیزمن شویو هوایي ډګرونو ته له الوتنو ډډه وکړي.
د الجزایر ایر، ایر انډیا، ایرفرانس، کی ایم ال، دلتا ایرلاین په ګډون شاوخوا لسو معتبرو هوايي شرکتونو منځي ختيځ ته خپلې الوتنې ځنډولي دي.
د الجزایر هوایي شرکت په لنډمهاله توګه لبنان ته الوتنې تر بلې خبرتیا پورې وځنډولې.
د هند ملي هوايي شرکت ایر انډیا هم د اګست تر 8 پورې تل ابیب ته خپلې الوتنې ځنډولې دي.
بل خوا ایر فرانس د پاریس او بیروت ترمنځ د الوتنو ځنډول د اګست تر ۱۱ مې پورې غځولي دي.
د کی ایم ال شرکت بیا د اګست له پیل څخه د اکټوبر تر ۲۶ مې پورې تل ابیب ته خپلې ټولې الوتنې لغوه کړې دي.
په همدې حال کې انګلستان د دغه هېواد هوايي شرکتونو ته سپارښتنه کړې، چې د اګست له ۸مې څخه د نومبر تر ۴مې پورې د لبنان هوایي حریم ته له ننوتو ډډه وکړي، ځکه چې "د پوځي فعالیت له امله الوتنو ته احتمالي خطر" شته.
فلسطیني ډاکټرانو ویلي، چې اسراییلي ځواکونو د پنجشنبې په ورځ د غزې په تړانګه کې په ډیریدونکو هوايي بریدونو کې لږ تر لږه ۴۰ کسان وژلي دي.
د حماس تر مشرۍ لاندې وسله والو سره د اسراییل جګړه په داسې حال کې روانه ده، چې دغه هېواد په سیمه کې د احتمالي پراخې جګړې لپاره چمتووالی نیسي.
ډاکټرانو ویلي، چې اسراییلي الوتکو د غزې په مرکزي البوریج کمپ کې پر یو شمېر کورونو برید کړی، چې لږ تر لږه ۱۵ کسان یې وژلي او د النصیرات کمپ ته نږدې یې په بل برید کې څلور تنه وژلي دي. نصیرات او بوریج د ګڼ مېشته سیمو له اتو تاریخي کمپونو څخه دی او د اسراییل له خوا د وسله والو سخت دریځو د پټنځایونو په توګه لیدل کیږي.
بل خوا اسراییلي الوتکو د غزې په ښار کې پر یو کور بمباري کړې، چې له امله یې پنځه فلسطینیان وژل شوي او په سویلي ښار خان یونس کې په یو بل هوايي برید کې یو کس وژل شوی او یو شمېر نور ټپیان شوي دي.
د سیمې د ملکي اضطراري خدماتو ادارې په یوه اعلامیه کې وویل، چې د پنجشنبې په ورځ د غزې ښار په ختیځ کې پر دوو ښوونځیو د اسراییل په بمباریو کې ۱۵ فلسطینیان ووژل شول او ۳۰ نور ټپیان شول.
د اسرايیل پوځ ویلي، چې د غزې ښار په طوفه سیمه کې یې د عبدالفتاح حمودا او الزهرا په ښوونځیو کې د حماس د قوماندې او کنټرول مرکزونه په نښه کړي، چې د حماس وسله وال پکې فعالیت کوي.
اسراییل پر حماس تور لګوي چې د پوځي اهدافو لپاره د ملکي خلکو او ملکي ملکیتونو څخه کار اخلي؛ خو حماس دا تور ردوي.
په ټولنیزو رسنیو کې خپاره شوي انځورونه ښیې چې ټپیان ګاډۍ ګانو کې روغتون ته وړل کیږي.
د حماس او اسلامي جهاد وسله والو ډلو ویلي، چې دوی د غزې په اوږدو کې پر اسراییلي ځواکونو د ټانک ضد راکټونه او هاوانونونه غورځولي، چې له امله یې ګڼو کسانو ته مرګ ژوبله اوښتې ده.
د اسراییل پوځ ویلي، چې په تېرو ۲۴ ساعتونو کې یې په غزه کې لسګونه پوځي هدفونه په نښه کړي، چې پکې د راکټونو د توغولو مرکزونه هم شامل دي.
د حماس په مشرۍ وسله والو د تېر کال د اکټوبر په اوومه پر اسراییل برید وکړ او ۱۲۰۰ اسراییلیان او بهرنیان یې ووژل او شاوخوا ۲۵۰ یې یرغمل کړل.
د غزې د روغتیا وزارت د پنجشنبې په ورځ په یوه تازه اعلامیه کې وویل، چې له هغه وخت راهیسې په غزه کې د اسراییل په ویجاړونکي هوايي او ځمکنۍ جګړه کې ۳۹ زره ۶۹۹ فلسطینیان وژل شوي او لسګونه زره نور ټپیان دي.
په سلګونو بنګله دیشي هندوانو په روانه اونۍ کې د لومړۍ وزیرې شیخ حسینه په مشرۍ د حکومت له ړنګېدو وروسته هند ته د تېښتې هڅه کړې. هند ته د تګ دا هڅې وروسته له هغې شوي، چې د اعتراضونو په لړ کې د لږه کیو ټولنې د غړو ډیری کورونه او کاروبارونه ویجاړ کړل شوي دي.
د “بنګله دېش د هندو-بودا-مسیحي یووالي شورا” وویل، چې د هېواد له ۶۴ ولسوالیو څخه په ۴۵ هغو کې یې په دې اونۍ کې د ډیری هندوانو کورونه ، سوداګري یا معبدونه په نښه شوي دي. په خبرپاڼه کې ویل شوي، چې د ښوونځي یو ښوونکی وژل شوی او ۴۵ تنه نور ټپیان شوي دي.
هندوان د بنګله دېش د ۱۷۰ میلیون نفوس شاوخوا ۸٪ جوړوي او په دودیز ډول په پراخه کچه د حسینې عوامي لیګ ګوند ملاتړي دي.
هندوان د اپوزیسیون بلاک پر ځای چې سخت دریځه اسلامپال ګوندونه پکې شامل دی، په لویه کچه د سیکولریزم پلوي کوي.
حسینه د دوشنبې په ورځ د هغه څه په وړاندې چې منتقدین یې د استبدادي واکمني بولي، د پراخو لاریونونو په ترڅ کې له هېواده له تېښتې وروسته په هند کې پناه واخیسته، هغه څه چې د خپل ګاونډي په وړاندې د ځینو بنګله دېشیانو غوسه راوپاروله.
ځايي خلکو ویلي، چې هند ته نږدې اوسېدونکي ډېری بنګله دېشیان هغه هېواد ته د تېښتې هڅه کوي، خو د دواړو خواو له مقاومت سره مخ کیږي.
دواړو هېوادونو ویلي، چې له تاوتریخوالي وروسته یې پر پوله ګزمې زیاتې کړې دي.
محمد رقیب الحسن، چې د بنګله دېش په شمال لوېدیځ کې د ټاګورګاون په ولسوالۍ کې ځایي حکومتي چارواکی دی وویل، چې شاوخوا ۷۰۰ – ۸۰۰ هندوانو د چهارشنبه ماښام له هغه وروسته هند ته د تېښتې هڅه وکړه چې د دوی پر ځینو کورونو بریدونه وشول او لوټ شول.
حسن رویټرز خبري اژانس ته وویل: "هغوی بېرته خپلو کورونو ته راستانه شول کله چې موږ ورته له پولې د تېرېدو اجازه ورنه کړه. سرحدي ځواکونه په سیمه کې ګزمې کوي. اوس هر څه سم دي او نور د تاوتریخوالي راپورونه نه شته."
د پنجشنبې په سهار شاوخوا ۳۰۰ بنګله دېشیان د هند جلپایګوري ولسوالۍ ته نږدې په یوه سرحدي سیمه کې راټول شوي وو؛ خو وروسته وویشل شول.
هندي رسنیو هلته د یوې ډلې په شاوخوا کې هندي سرحدي سرتېري ښودلي دي.
د ډهاکې څخه په شاوخوا یو ساعت کې د نارسنګدي په سیمه کې یو هندو زرګر، چې نه یې غوښتل د غچ اخیستنې له ویرې یې نوم واخیستل شي وویل، چې دوو ځوانانو د یو میلیون بنګله ديشي ټکه (۸۵۵۰ ډالر) د محافظت پیسو غوښتنه وکړه او یوازې وروسته له هغه له سیمې ولاړ چې هغه دوی ته د یو لک ټکه د ورکړې موافقه وکړه.
په پراخه کچه داسې انګېرل کېده، چې په ولسمشریزو ټاکنو کې د جمهوري غوښتونکو نوماند ډونالډ ټرمپ به په اسانۍ سره ډیموکراټ ګوند سیالې کمالا هرېس ته ماتې ورکړي. خو اوس یوې پراخې نظرپوښتنې ادعا کړې، چې په ټاکنو کې د کمالا هرېس د ګټلو چانس ډېر دی.
د پی بي اېس، اېن پي ار او مارېسټ لهخوا د یوې ګډې نظرپوښتنې له مخې، ولسمشریزو ټاکنو ته د ډیموکرات ګوند نومانده اوسمهال د دغو ټاکنو د ګټلو ۵۱ سلنه او ډونالډ ټرمپ بیا ۴۸ سلنه د ګټلو چانس لري.
د نظرپوښتنې له مخې، د محبوبیت له پلوه کمالا هرېس ۴۸ سلنه او ټرمپ بیا ۴۵ سلنه په خلکو کې منل شوی دی، چې کمالا هرېس په دې برخه کې هم مخکښه ده.
د اقتصاد په برخه کې د ټرمپ محبوبیت ۳ نمرې لوړ دی؛ خو د کمالا هرېس دریځ د بایډن پرتله ډېر ښه دی.
د نظرپوښتنې له مخې ټرمپ د کډوالۍ په برخه کې ۶ نمرې مخکې دی؛ خو دلته هم د کمالا هرېس دریځ د بایډن پرتله ۱۵ درجې ښه دی.
د ښځینه رای ورکوونکو په منځ کې، د کمالا دریځ د ټرمپ پرتله ۱۳ درجې لوړ دی؛ خو د نارینه رای ورکوونکو په منځ کې د هغې دریځ ۹ نمرې ټیټ دی.
نظرپوښتنې څرګنده کړه، چې د تور پوستو رای ورکوونکو په منځ کې د کمالا محبوبیت د ډونالډ ټرمپ پرتله له ۲۳ څخه ۵۴ پواینټونو ته لوړ شوی دی.
د خپلواکو رای ورکوونکو په منځ کې د کمالا هرېس دریځ د ډونالډ ټرمپ پرتله ۹ پواینټونه ډېر شوی دی.
خو تر ټولو اړینه دا ده، چې د کمالا هرېس محبوبیت له ۴۰ سلنې څخه ۴۶ سلنې ته لوړ شوی چې نه یوازې بایډن؛ بلکې له بارک اوباما هم لوړ دی.
دا په ۱۹۷۶ کال کې له جېمي کارټر وروسته لومړی ځل دی، چې ډیموکراتانو دغه مقام خپل کړی دی.
دغه نظرپوښتنه د پنجشنبې په ورځ پیل شوه او تر یکشنبې پورې یې دوام وکړ.
د نړۍ د کاتولیکانو مشر پاپ فرانسیس وايي، چې له دین څخه باید د تاوتریخوالي او کرکې د وسیلې په توګه کار وانه خیستل شي. نوموړي زیاته کړې، چې په افغانستان کې توکمیزه تنوع کله ناکله د "تبعیض او جلاوالي" لپاره یوه بهانه ګرځېدلې ده.
پاپ فرانسیس وویل، چې افغانستان په تېرو لسیزو کې له غمجنو پېښو سره مخ شوی او زیاته یې کړه، چې بې ثباتي، جګړې، داخلي شخړو او له اساسي بشري حقونو څخه سرغړونو ډېری خلک کډوالۍ ته اړ کړي دي.
د نړۍ د کاتولیکانو مشر دغه څرګندونې په ایټالیا کې د افغانانو د ټولنې له یوې ډلې سره په کتنه کې وکړې.
پاپ فرانسیس وویل؛ توکمیزه تنوع چې د افغاني ټولنې ځانګړتیا ده «کله ناکله د تبعیض او جلاوالي لپاره پلمه کیږي.»
د واتیکان خبري ویب پاڼې د چهارشنبې په ورځ په یوه راپور کې لیکلي، چې پاپ فرانسیس د افغانستان او پاکستان په سرحدي سیمو کې د ناوړه وضعیت او په پاکستان کې د مېشتو پښتنو لږه کیو د کړکېچ یادونه هم کړې ده.
نوموړي د خپلو خبرو په يوه برخه کې وويل، چې له دین څخه بايد د تاوتريخوالي او کرکې د وسيلې په توګه کار وانه خیستل شي، بلکې د ولسونو ترمنځ د ورورګلوۍ د رامنځته کولو لپاره بايد وکارول شي.
پاپ فرانسیس وویل، چې دین باید د اختلافاتو په کمولو کې مرسته وکړي او داسې فضا رامنځته کړي چې هرڅوک وکولی شي خپل بشپړ حقونه پرته له تبعیض ترلاسه کړي.
د نړۍ د کاتولیکانو د مشر په وینا؛ له دین څخه ناوړه ګټه پورته کیږي او د نفرت او تاوتریخوالي د خپرولو لپاره د یوې وسیلې په توګه کارول کیږي.
د نړۍ د کاتولیکانو مشر په نړۍ کې د مذهبونو د پیروانو ترمنځ همغږۍ ته اشاره وکړه او ویې ویل، چې په ځینو افریقايي هېوادونو کې مسلمانان او مسیحیان په سوله ییز ډول سره ژوند کوي او د یو بل په مذهبي مراسمو کې ګډون کوي.
د امریکا د استخباراتي ادارې (سي ای اې) پخوانۍ ماموره سارا اډمس وايي، چې امریکا هره اونۍ له ۴۳ میلیونو ډالرو څخه تر ۸۷ میلیونو ډالرو پورې طالبانو ته ورکوي. نوموړې زیاتوي، چې په افغانستان کې د القاعده ۳۰ کمپونه هم فعال دي.
نوموړې په یو امریکايي پوډکاسټ کې ویلي، چې امریکایان باید په دې وپوهېږي، چې د متحده ایالاتو دولت د طالبانو هغو کورنیو سره هم مرسته کوي، چې له دوی سره په مخامخ جګړه کې وژل شوي دي.
مېرمن سارا اډمس زیاتوي، چې دا مهال په افغانستان کې د القاعده دېرش د روزنې مرکزونه فعاله دي، چې اوه یې د ځانمرګو د روزنې کمپونه دي.
د سي ای اې دا پخوانۍ ماموره زیاتوي، چې د القاعده شبکې غړي د افغانستان او پاکستان پاسپورټونه لري او په ازادانه شکل کولی شي دواړو خواو ته تګ راتګ وکړي.
سارا اډم د امریکا له استخباراتي ادارې سره په افغانستان، پاکستان او منځني ختیځ کې دندې ترسره کړي دي.
دا لومړی ځل نه دی، چې د امریکا د استخباراتي ادارې یوه پخوانۍ چارواکې دا ډول څرګندونې کوي؛ بلکې له دې وړاندې هم د امریکا برحاله او پخوانیو چارواکو له طالبانو سره د امریکا پر مرستو نیوکه کړې او هم یې په افغانستان کې د القاعده شبکې پر پراخېدا اندېښنې څرګندې کړې دي.