په ناروې کې د ایران د انساني حقونو اداره وايي، اسلامي جمهوریت تېرو ۲۰ ورځو کې د اتو افغانانو په ګډون ۵۸ سیاسي بندیان اعدام کړي دي. دغه اداره په یوه راپور کې د اعدام شویو کسانو د شمېرو وړاندې کولو سره له خلکو غواړي چې د ایران د حکومت د اعدام پرضد اعتراض کې ور سره یو ځای شي.
د ایران د انساني حقونو ادارې د څېړونکو موندنې ښيي چې د دغه هېواد حکومت د اګسټ میاشتې له پیل تر اوسه دا بندیان د قزل حصار، کرج، یاسوج، میناب، زاهدان، مشهد، ګرګان، کرمان، بوم او رفسنجان په زندانونو کې کې اعدام کړي دي.
دې ادارې د اعدام شویو د جرمونو په هکله څه نه دي ویلي.
تر دې مخکې د هه نګاو په نوم د بشري حقونو ادارې ویلي و چې ایران په یزد او شېراز کې دوه افغانان اعدم کړي دی.
وروستیو کې د ایران د بشري حقونو سازمان یوه راپور کې ویلي چې ایران تېرو اوو میاشتو کې د ۲۰ افغانانو په ګډون درې سوه کسان اعدام کړي دي.
د ایران د حکومت چارواکو او طالبانو د افغان وګړو د اعدام په هکله څه نه دي ویلي.
