د شپږیزې کرېکټ لیګ نهم پړاو سیالیو پایلوبه سبا د کابل په کرېکټ نړۍوال لوبغالي کې ترسره کېږي. د دغو سیالیو په پایلوبه کې د امو نهنګانو لوبډله د بند امیر ښامارانو پر وړاندې لوبېږي.
دغه لوبه سبا (د وږي په ۳مه) د کابل په وخت په یوولسو بجو پیلېږي.
د شپږېزې کرېکټ لیګ نهم پړاو سیالۍ د روانې اګسټ میاشتې په ۱۲مه نېټه د پنځو لوبډلو ترمنځ پیل شوې وې.
تر دې دمه الله محمد د ۱۷ وېکټو په اخیستو د دغو سیالیو د غوره توپ اچوونکو د نوملړ په سر کې او ورپسې حمزه هوتک دویم، فضل الحق فاروقي درېیم، ننګیال خروټی څلورم او شرف الدین اشرف پنځم ځای لري.
د دغو سیالیو د غوره توپ وهونکو په نوملړ کې صدیق اتل د ۳۴۸ منډو سره د نوملړ په سر کې او ورپسې زبېد اکبري دویم، دروېش رسولي درېیم، عبدالمالک څلورم او وفي الله ترخېل بیا پنځم ځای لري.
په دغو لوبو کې د افغانستان د کرېکټ ملي لوبډلې لوبغاړو هم ګډون کړی دی.
