د طالبانو د بهرنیو چارو وزیر امیر خان متقي وايي، د ټاپي پروژه او افغان ـ ترکمن اقتصادي دهلیز او د انرژۍ د لېږد پروژې د پيلېدو په درشل کې دي. نوموړی وایي، د یادو پروژو په پیلېدو سره به افغانستان د سیمې لپاره د اتصال او اقتصاد په مرکز بدل شي.
د طالبانو د بهرنیو چازو وزیر امیرخان متقي د ټاپي پروژه او د افغان ـ ترکمن اقتصادي دهلیز او د انرژۍ د لېږد پروژو د عملي چارو پیلېدو لپاره د چمتوالي په ناسته کې وویل، چې د ټاپي ستره پروژه د پيلېدو په درشل کې ده.
نوموړی وایي، یاده پروژه په ترکمنستان کې بشپړه شوې او د ګازو نل لیکه افغانستان ته غځول شوې ده.
متقي وايي، افغانستان بشپړ چمتوالی لري چې دغه پروژه پیل کړي.
د ټاپي نل لیکه ۱۸۴۰ کیلومټره اوږدوالی لري، چې د افغانستان له لارې به له ترکمنستان څخه پاکستان او بیا هند ته ۳۳ میلیارډه متره مکعبه ګاز ولېږدول شي.
د یادو ګازو څخه پنځه میلیارډه متره مکعبه به یې په افغانستان کې وکارول شي.
د معلوماتو له مخې، د یادې پروژې ټول لګښت لس میلیارده ډالر اټکل شوی.
ښاغلی متقي وايي، چې له دغې پروژې څخه به هر کال ۴۵۰ مېلیونه ډالر افغانستان ته د ټرانزیټ په توګه ورکول کېږي.
همدارنګه نوموړی وايي، د افغان ـ ترکمن ګډې پروژې چارې او د رېل پټلۍ تر تورغونډۍ رسیدلې دي.
نوموړی وايي، د ریل دغه پټلۍ به له تورغونډۍ څخه هرات او وروسته به له کندهار او چمن سره ونښلي.
امیر خان متقي په خپلو خبرو کې د کاسا زر پروژې ته هم اشاره وکړه او ویې ویل، چې د یادې پروژې په اړه هم نړۍوال بانک چمتوالی ښودلی دی.
متقي وايي، د یادو پروژ په پیلېدو سره به د سیمو له هېوادنو سره د افغانسان اړیکې پیاوړې شي او افغانستان به د سیمې لپاره د اتصال او اقتصاد په مرکز بدل شي.
