د پاکستان ولسمشر په يوې اعلاميه کې ويلي، چې په دغه هېواد کې د ترهګرۍ په وړاندې عملياتو کې ولس د امنيتي ځواکونو ملاتړ کوي. ولسمشر اصف علي زرداري زياتوي، چې د ترهګرۍ ضد عمليات به تر هغه دوام ولري، تر څو هېواد کې ثبات رامنځ ته شي.
پاکستان راډيو د شنبې په ورځ (د وږي ۱۰ مه) په یو راپور کې ويلي، چې ولسمشر د وسله والو په وړاندي عمليات بريالي بللي او د خپلو ځواکونو ستاینه یې کړې ده.
د پاکسان پوځي چارواکي وايي، چې د خيبرپښتونخوا په تېرا سېمه کې يې د عملياتو پر مهال ۳۷ وسله وال وژلي او ۱۴ نور يې ټپي کړي دي.
د معلوماتو له مخي، پوځ د خيبرپښتونخوا په تېرا دره کې د وسلو په وړاندې دغه عمليات درې اونۍ وړاندې پيل کړي و.
د پاکسان پوځي چارواکو پاکستاني رسنيو ته ويلي، چې د پښتونخوا په تېرا کې يې د عملياتو پر مهال ۳۷ وسله وال وژلي او ۱۴ نور يې زخمي کړي دي. پوځ په تېرا دره کې د وسلو په وړاندي دغه عمليات د اګسټ په ۲۰ مه پيل کړي دي.
د پاکستان راډيو د شنبې په ورځ د پاکستان پوځ د قومندانانو له قوله ليکلي، چې په دې عملياتو کې يې د وسله والو یو مهم مشر په صدام مشهور ابوذر هم وژلی دی.
د پوځ د سرحدي لېوا یو قومندان امیر نواز خان ويلي په تېرا دره کې يې د وسله والو په زياتو پټنځيو عمليات کړي او له منځه یې وړي دي.
بل لوري ته بیا د پاکستان پوځ د عامه اړيکو ادارې پرون ويلي، چې د استخباراتي مالوماتو له مخې یې بلوچستان کې د بلوڅ بېلتونپالو پرضد مختلفو سیمو کې عملیات پیل کړي دي.
دا عملیات د تېرې دوشنبې د هغو بریدونو په ځواب کې دي، چې بلوڅ بېلتونپالو د دې صوبې په ۱۴ ځایونو کې وکړل او تر ۷۳ کسان پکې ووژل شول.
په خيبرپښتونخوا کې د بیزو د تڼاکو یا چیچک ناروغۍ درېيمه پېښه ثبت شوې ده. د پاکستان د روغتیا وزارت ویلي، چې د بیزود تڼاکو دوه شکمن کېسونه تېره ورځ د پېښور هوايي ډګر د روغتیايي کارکوونکو له خوا پېژندل شوي.
د پاکستان د روغتیا وزارت زیاتوي چې د دغو دوو تنو شکمن کیسونه یې د پېښور د خيبر ميډيکل پوهنتون یوه لابراتوار ته لیږلي وو، چې يوه پېښه په کې مثبته راغلې.
ویل کیږي دغه ناروغ کس د پېښور اوسېدونکی دی.
د خيبر پښتونخوا ایالت د عامې روغتيا مشر ډاکټر ارشاد وايي، چې د ناروغ حالت مخ په ښه کېدو دی او د پوليسو په روغتون کې يې درملنه کېږي.
د پاکستاني رسنیو د راپورونو له مخې دا په روان کال کې په خيبرپښتونخوا کې د بیزو د تڼاکو (ايم پیکس) ناروغۍ درېيمه پېښه ده.
د پاکستان د روغتیا وزارت ویلي، د اغېزمن کس په اړه پلټنه روانه ده، او وايي دغه کس له عربي هیوادونو پاکستان ته راغلی دی، او وايي، د دوی اړوند ټول ټیمونه په هوايي ډګرونو کې د راتلوونکو مساپرو کلکه روغتیايي پلټنه کوي.
د ډاکټر مختار په نوم یوه پاکستاني ډاکتر رسنیو ته ويلي، چې پاکستان د ایم پیکس ناروغۍ د مخنیوي لپاره یوه اغېزمنه تګلاره جوړه کړې چې له مخې به یې د دغې ناروغۍ د خورېدو مخه ونیسي.
پاکستاني رسنیو راپور ورکړی چې، د خیبرپښتونخوا ایالت په یو شمېر غرنیو سیمو کې د توپاني بارانونو او سېلابونو له امله تر دې مهاله د ښځو او ماشومانو په ګډون ۶۸ کسان مړه شوي او سلګونه کورنه زیانمن شوي دي.
د پاکستاني رسنیو د راپورونو له مخې له تېرو څلورو ورځو راهیسې د خبیرپښتونخوا په بېلابېلو سیمو کې په دوامداره توګه باران وریږي.
د پاکستان جنګ ورځپاڼې د پاکستان د طبیعي پېښو سره د مبارزې ادارې له قوله لیکلي، چې د موسمي بارانونو له پیله تر اوسه پورې په دغه ایالت کې د کورنو د چتونو غورځېدو او ځمکو ښویېدو له امله ۶۸ کسان مړه شوي او ۷۸۶ کورونه زیانمن شوي دي.
د راپورونو له مخې په مړو شویو کسانو کې د ښځو او سړیو تر څنګ ۳۲ ماشومان هم مړه شوي دي.
د پاکستان د طبعي پېښو سره د مبارزې ادارې په راپور کې ویل شوي چې د تېرو څلورو ورځو پرمهال د ورښتونو، ځمکې ښویېدنې او د کورونو د چتونو پرېوتو له امله ۱۱۷ کسان ټپیان شوي هم دي.
دا په داسې حال کې ده، چې تېره ورځ د پاکستان د بلوچستان ایالت څخه هم د بارانونو او سېلابونو راوتلو له امله د ۲۹ کسانو د مړه کېدو او ۱۵ نورو د ټپي کېدو راپورونه ورکړل شوي وو.
د پاکستاني رسنیو د راپورنو له مخې په بلوچستان ایالت کې د تېرې شپي د چټکو بارانونو له امله په یاد ایالت کې د ډېرو ښارونو تر منځ لارې تړل شوې دي.
د ملي جمهوري ګوند مشر محسن داوړ وايي، هر هغه څوک چې د پښتنو د حقونو لپاره مبارزه کوي، لومړی ګام دې د طالبانو پر ضد پورته کړي. هغه وايي، د پښتنو د حقونو لپاره مبارزه باید لومړی د طالبانو پر ضد وشي.
د پاکستان د پارلمان پخوانی غړی او د ملي جمهوري ګوند مشر محسن داوړ تېر ماښام جمعه د (وږي نهمه) په خپله فیسبوک پاڼه لیکلي چې د طالبان پر ضد له مبارزې کولو پرته د پښتنو د حقونو لپاره مبارزه نه کیږي، او په وینا یې هر څوک چې د پښتنو د حقونو لپاره مبارزه کوي نو لومړی ګام دې د طالبانو پر ضد پورته کړي.
ښاغلي داوړ، هغو قامپرستو پښتنو ته په اشارې سره ویلي، چې د ده په خبره غواړي یو ډول طالبان ومني او د هغوی په وړاندې یې په خپل پخواني دریځ کې نرم والی راوستی، هغه وايي: «که چیرته څوک د اسټيبلشمنټ استاذو او د جبر اله کارو یعنې طالبانو ته قانوني حثیت ورکولو لپاره بهانې جوړوي او لارې لټوي نو بيا د اسټيبلشمنت پرضد د دوی بیانیې بې بنیاده او دروغجنې دي.»
محسن داوړ وايي، داسې چارې او تګلارې د پښتنو د حقونو مبارزه نه بلکې د هغوی د مبارزې په نوم د هغوی پر حقونو معامله کول دي.
هغه وړاندې وايي، کومو قامپرستو پښتنو چې خپل زړونه په طالبانو پورې تړلي او د هغوی په اړه يې خپل دریځ نرم کړی، هغوی په ناسم پوهاوي کې روان دي، «دوی په دې باور دي چې د طالبانو له واکه به ګټه واخلي، خو هغوی ته پکار ده چې د افغانستان له تجربې یې زده کړي.»
که څه هم محسن داوړ په څرګنده د چا نوم نه دی اخیستی، خو په دې وروستیو کې د ملي جمهوري ګوند د پلویانو او د پښتنو قامپرست مشر محمودخان اڅکزي د پلویانو تر منځ په خواله رسنیو کې ناندرۍ روانې دي.
محسن داوړ په خپلو خبرو کې وړاندې ویلي، چې «د طالبانو منل له ولس او قام سره د غدارۍ په معنا ده.»
د پاکستان پخوانی لومړی وزیر عمران خان وايي، چې افغان طالبان د ده د واکمنۍ پر مهال د "ټي ټي پي" د ځپلو لپاره همکارۍ ته چمتو وو. عمران خان زیاتوي، چې حکومت یې له ډیورنډ کرښې پورې غاړه د ترهګرۍ په اړه له افغان طالبانو سره فعالې خبرې درلودې.
د پاکستان پخواني لومړي وزیر عمران خان د خپلې واکمنۍ پر مهال "ترهګرو" ته د پټنځیو د ورکولو ادعاوې رد کړې او ویلي یې دي، چې د افغانستان د حکومت له نسکورېدو او د طالبانو واکمنېدو سره، پاکستان له افغان طالبانو وغوښتل، چې د تحریک طالبانو پاکستان مرکزونه له منځه یوسي.
ده همداراز زیاته کړه، چې افغان طالبان د پاکستان له حکومت سره همکارۍ ته چمتو وو.
د پاکستان پخواني لومړي وزیر او د تحریک انصاف مشر هم ومنله چې د ای اېس ای پخوانی مشر جنرال فیض حمید د ټي ټي پي د ځپلو لپاره له افغان طالبانو سره په تماس کې و.
د تحریک انصاف مشر ویلي، چې د پاکستان د کورنیو چارو وزیر ادعا کوي چې "ترهګر" له افغانستانه بهر فعالیت کوي، په دې معنا چې پر تحریک انصاف لګېدلي تورونه بې بنسټه دي. هغه د پاکستان پوځ په بلوچستان کې د وروستیو ناکراریو مسوول وباله.
عمران خان د خپلې واکمنۍ پر مهال د ټي ټي پي د له منځه وړلو لپاره له افغان طالبانو سره د همکارۍ خبره کوي،چې د طالبانو ویاند ذبیح الله مجاهد تېره اوونۍ له یوې پاکستاني رسنۍ سره په خبرو کې د پاکستاني حکومت او ټي ټي پي ترمنځ د خبرو منځګړیتوب ته د دغې ډلې د چمتووالي خبره کړې وه.
مجاهد ویلي، چې افغان طالبان کولای شي د پاکستان د حکومت او ټي ټي پي ترمنځ د خبرو منځګړتوب کړي.
خو د پاکستان د بهرنیو چارو د وزارت ویاندې ممتاز زهرا بلوچ د پاکستان د حکومت او ټي ټي پي ترمنځ خبرې رد کړې او له افغان طالبانو یې غوښتي، چې د تحریک طالبان پاکستان غړي دغه هېواد ته وسپاري.