المرصاد: ټيټيپي په افغانستان کې نه، بلکې په ډېره اسماعیل خان کې ولټوئ
د افغانستان د طالبانو اړوند المرصاد وېبپاڼې پاکستاني چارواکو ته په خطاب کې لیکلي، چې ټيټيپي په افغانستان کې نه؛ بلکې په ډېره اسماعیل خان کې ولټوئ.
د افغانستان د طالبانو اړوند المرصاد وېبپاڼې پاکستاني چارواکو ته په خطاب کې لیکلي، چې ټيټيپي په افغانستان کې نه؛ بلکې په ډېره اسماعیل خان کې ولټوئ.
په دغې خپرې شوې لیکنه کې په خیبر پښتونخوا کې د څو جګپوړو افسرانو تښتونې ته اشاره شوې ده.
د لیکنې له مخې،« د پاکستان پوځ او حکومت د دغه هېواد دننه ټولې پېښې پر افغانستان ور تپي؛ خو د دوی د افسرانو له تښتونې وروسته به څه ځواب ولري؛ چې څنګه په رڼا ورځ د دوی افسران د هغوی له دفترونو او کوڅو څخه تښتول شوي؟»
په دغې لیکنه کې ادعا شوې، چې پاکستاني پوځ د قبایلي مشرانو د جرګې له لارې د خپلو افسرانو د خوشې کولو لپاره له ټيټيپي سره اړیکه نیولې وه، د جرګې مشرانو په ډېره اسماعیل خان کې د طالبانو له قوماندانو سره د هغوی په مرکز کې لیدلي او د افسرانو د خوشې کولو خبرې یې کړې دي.
دغې لیکنې وړاندې کاږلي:« اوس پوښتنه دا ده، چې قبایلي مشران په سیمه کې د طالبانو د مرکزونو په اړه معلومات لري او جرګې ورسره کوي؛ خو د پاکستان پوځ او ادارو ته د دې مرکزونو ځایونه نه دي معلوم؟»
په دغې لیکنه کې زیاته شوې:« دا د حیرانتیا خبره ده، چې پاکستاني ادارې د خپل هېواد دننه د ټيټيپي مرکزونه نه ویني؛ خو په سلګونو کیلومټره لرې په افغانستان کې ورته بیا خالي مرکزونه او افراد ښکاري او شمېرلای یې هم شي.»
د دغې لیکنې په وروستۍ برخه کې راغلي، د پاکستان پوځ او چارواکي دې د تورونو لګولو پر ځای خپل فعالیت ته پام وکړي، چې په هېواد کې یې امن ټینګ شي.
درې ورځې وړاندې د پاکستان د بهرنیو چارو وزارت ویاندې یو ځلې بیا ویلي و:« د ملګرو ملتونو په ګډون ګڼو نړۍوالو راپورونو تایید کړې، چې په افغانستان کې ټيټيپي لا هم شته او له هغه ځایه خپل بریدونه پلانوي.»
د ممتاز زهرا بلوڅ تر څرګندونو یوه ورځ مخکې د طالبانو لوی درستیز هم ویلي و:« پاکستان په افغانستان کې د پاکستاني طالبانو د شتهوالي په هکله کوم ښکاره ثبوت نه لري.»
په خوست کې ځینو ځوانانو نن یکشنبه افغانستان انټرنشنل ـ پښتو وویل، چې طالبانو د خوست په ښار کې له دوکانونو او ځوانانو سرې خولۍ راټولې کړي دي.
دوی زیاتوي، چې د طالبانو د خوست امنیه قومندانۍ پولیسو د سرو خولیو پلورونکو او هغه ځوانانو ته چې دغه خولۍ پر سر وې خبرداری ورکړی چې له دې وروسته دې د سرو خولیو پلور او پر سر کولو څخه ډډه وکړي.
په خوست کې ځیني فعال ځوانان وايي، چې دوی په پښتونخوا کې د پښتون ژغورنې غورځنګ د پاکستان ضد سیاستونو ملاتړ کوي او دغه خولۍ د خپل ملاتړ د سمبول په توګه کارکوي، نو ځکه طالبانو د دوی مخنوی کوي.
له خوست څخه راپورونه وايي، چې د دې ولایت د طالبانو د اطلاعاتو او فرهنګ ریس شبیر احمد عثماني چې د سراج الدین حقاني له نژدې کسانو څخه دی؛ یو شمېر ځوانان په دې کواښلي، چې څو ورځې وړاندې یې په دغه ولایت کې د ټن غر مشاعره جوړه کړې وه او د پاکستان پرضد د شعرونو د ویلو ترڅنګ د دغه مشاعرې کډونوالو ډیری سرې خولۍ پر سر کړې وې.
خوستي ځوانان همدراز زیاتوي، چې دوی د دې لپاره هم کواښل کیږي چې د ټن غر مشاعره کې ځینو شاعرانو د پښتون ژغورنې غورڅنګ د وژل شوي مخکښ غړي ګېلهمن وزیر شعرونه زمزمه کړي وو.
په خوست کې د طالبانو د اطلاعاتو او فرهنګ رییس شبیر احمد عثماني پر خواله رسنۍ اېکس د دغې ډلې د یو پلوي په ځواب کې لیکلي: « نن مې هم راغوښتي، سبا هم ادامه لري او که سبا ریاست ته راځئ نو خوشحالوونکي جریانات به ووېنئ»
د خوست ځیني فعال ځوانانو افغانستان انټرنشنل ـ پښتو ته وویل، چې د شبیر احمد عثماني له خوا یې د اطلاعاتو او فرهنګ د ریاست په دفتر کې سخته بې عزتي شوې ده او د سرو خولیو پر سرکولو ترڅنګ په ټولنیزو رسنیو کې د پښتون ژغورنې غورځنګ د ملاتړ له امله پر مرګ ګواښل شوي دي.
د پښتون ژغورنې غورڅنګ یو مخکښ کړی حنیف پښتین په خوست کې له ځوانانو سره شوي چلند په اړه لیکلي « په افغانستان کې ځوانان هره ورځ په يو او بل نوم ځورول کيږي او هلته پر ولسونو د ژوند کولو ټولې لارې چارې سختې شوي، خلک له داسې کړنو نور په تنګ راغلي او دې ته اړ شوي، چې د نظام په وړاندې بغاوت شروع کړي»
سرې خولۍ له هغه وروسته ډېرې مشهورې شوي، چې په پښتونخوا کې د پښتون ژغورنې غورځنګ مشر منظور پښتین د خپل حرکت په پیل کې په سر کړې وه.
دغه خولۍ د منظور پښتین په یو سمبول بدله شوه او اوس نه یوازې په پښتونخوا کې بلکې د افغانستان ترڅنګ په نړۍ کې پښتانه هغه د خپل ملاتړ څرګندولو په موخه کاروي.
