عراقي ډله: که واشنګټن د اسراییل ملاټړ وکړي، په عراق کې به د امریکا اډې په نښه کړي
یوې عراقي ډلې ویلي، که امریکا پرېکړه وکړي، چې پر ایران د اسراییل برید کې د دغه هېواد ملاتړ وکړي، په عراق کې به د امریکا اډې په نښه کړي.
د عراق د مقاومت د همغږۍ کمېټې پر ټېلېګرام په یوه بیان کې ویلي، که امریکا د ایران له خوا پر اسراییل د بالستیک توغندیو د توغولو په ځواب کې د عراق له هوایي حریم څخه کار واخلي؛ نو د دغه هېواد اډې به په نښه کړي.
دغې ډلې وویل: «که امریکا د ایران پر ضد په هر ډول دښمنانه اقدام کې لاسوهنه وکړي او یا هم صهیونیسټي دښمن د عراق له هوايي حریم څخه د بمباریو د ترسره کولو لپاره کار واخلي؛ نو په عراق او سیمه کې به د امریکا ټولې اډې او ګټې زموږ هدف وي.»