په لوګر کې سیمهییز طالب چارواکي وايي، په لومړۍ پېښه کې چې تېره ورځ د لوګرـ پکتیا د لویې لارې د تیرې په سیمه کې د دوو موټرو د ټکر له امله شوې وه په کې یوه ښځه مړه او ۱۱ تنه نور ټپیان شوي دي.
په لوګر ولایت کې د طالبانو د ټرافیکو مدیریت ویاند ګل محمد همتي رسنیو ته ویلي، چې د دوشنبې په ورځ د (تلې ۱۶مه) د لوګرـ پکتیا د لویې لارې د تیرې په سیمه کې د یو کرولا او کاسټر موټر د ټکر له امله یوه ښځه مړه شوي او ۱۱ نور کسان ټپیان شوي دي.همدارنګه یوه بله ټرافیکي پېښه چې د لوګر ولایت د محمد اغې ولسوالۍ په کندهاري پل سیمه کې د موټر چلوونکي د بې احتیاطۍ له امله رامنځته شوې، دوه تنه په کې ټپیان شوي.همدارنګه په میدان وردګ ولایت کې د طآلبانو د اطلاعاتو او کلتور ریاست پر خپلې اېکس پاڼې لیکلي، چې تېره شپه د کابل ـ کندهار پر عمومي لاره د میدان وردګ ولایت په دښت توپ سیمه کې د دوو کرولا موټرو د ټکر له امله پنځه تنه ټپیان شوي دي.د میدان وردګ د اطلاعاتو او کلتور ریاست د معلوماتو له مخې، په ټرافیکي پېښه کې ټپیان شوي کسان د دښت توپ سیمهییز روغتون ته د درملنې په موخه انتقال شوي دي.د لویو لارو پر سر پر سړکونو د ټرافیکو نښو نشتوالی، د سړکونو خرابوالی او د موټر چلوونکو بې احتیاطي د ټرافیکي پېښو د رامنځته کېدو لاملونه ګنل کېږي.
په دغو انځورونو کې چینايي میرمنې په یو هوټل کې له طالبانو سره په یو دسترخوان ډوډۍ خوري. دوی د امریکايي وسلو سره د وسله والو طالبانو تر څنګ انځورونه اخلي یا د ساتونکي رول لوبوي. دغه میرمنې د کابل په پارکونو او د وزیر اکبر خان تپه کې له طالبانو سره ګرځي.
په یو انځور کې یوه چینایي ښځه په یوه څوکۍ ناسته ده او طالب عسکر یې تر شا ولاړ دي.
په یو بل انځور کې یو طالب سرتیری له دوو چینایي ښځو سره چې اسلامي حجاب یې اغوستی لیدل کیږي چې په ظاهره له ښاره بهر په یوه باغ کې دي.
په بل انځور کې یوه چینايي ښځه لیدل کیږي چې په یو رسټورانټ کې له دوو طالب سرتیرو سره ډوډۍ خوري. دا څرګنده نه ده چې رسټورانټ په کوم ولایت کې موقعیت لري.
په یو بل انځور کې بیا یوه چینايي ښځه او یو طالب سرتیری لیدل کیږي چې د امریکايي وسلو سره د نښه ویشتلو انداز کوي.
کله کله هم طالبان د فلمي لوبغاړو په شان له چینايي ښځو سره اوږه په اوږه انځورونه اخلي. په دې انځورونو کې ډیری چینایي میرمنې پرته له حجاب څخه دي او د بدن ځینې برخې یې لیدل کیږي.
دا انځورونه له بهرنیو ښځو سره د طالبانو د دوستانه او زړه سواند چلند ښکارندويي کوي، خو له افغان ښځو سره ورته چلند نه کوي. د بشري حقونو کورنیو او نړیوالو سازمانونو د طالبانو له خوا د افغان ښځو په وړاندې د تاوتریخوالي د زیاتوالي په اړه راپورونه خپاره کړي دي.
چین په افغانستان کې له طالبانو سره ډېرې نږدې او ژورې اړیکې لري. چین له طالبانو سره د کانونو، تیلو او ګازو او پراختیایي پروژو لسګونه تړونونه لاسلیک کړي دي. دغه هیواد په چین کې د افغانستان سفارت طالبانو ته سپارلی او په نړیواله کچه د دې ډلې د دریځ دفاع کوي.
دا انځورونه په داسې حال کې خپاره شوي چې طالبانو په تېرو درېیو کلونو کې پر افغان ښځو بې ساري بندیزونه لګولي دي.
د طالبانو د امربالمعروف د نوي قانون له مخې، په عامه ځایونو کې د ښځو غږ "عورت" بلل شوی. ښځې له شرعي محرم پرته بهر ته د تګ اجازه نه لري. ښځې اجازه نه لري چې پارکونه او عامه ځایونه وکاروي. حمامونه او ارایشګاهګانې د ښځو پر مخ تړل شوي دي.
د بشري حقونو فعالانو، یو شمېر نړیوالو سازمانونو او د اروپا پارلمان پر افغان مېرمنو ډېریدونکي محدودیتونه "د بشریت پر وړاندې د جرمونو او د جنسیتي توپیر یوه ښکاره بېلګه" بللې ده.