ازادۍ جبهه: د کندوز ولایت پر مقام برید کې مو څلور طالبان وژلي دي
د افغانستان د ازادۍ جبهه وایي، چې د کندوز ولایت پر مقام برید کې یې څلور طالبان وژلي او دوه نور یې ټپیان کړي دي.
د افغانستان د ازادۍ جبهه وایي، چې د کندوز ولایت پر مقام برید کې یې څلور طالبان وژلي او دوه نور یې ټپیان کړي دي.
دغې جبهې په اېکس پاڼه د دغه برید اړوند د یوې ویډیو په خپرولو سره لیکلي، چې تېرماښام د سې شنبې په ورځ (د تلې ۲۴مه) یې د کندوز ولایت مقام په دروازه کې عملیات ترسره کړي، چې د دغو عملیاتو په لړ کې یې څلور طالبان وژلي او دوه نور یې ټپیان کړي دي.له بل پلوه په کندوز ولایت کې سیمهییزو سرچینو ویلي و، چې دغه پېښه تېر ماښام مهال شاوخوا ۷ بجې رامنځته شوې وه.د سرچينې د معلوماتو له مخې، له دې چاودنې وروسته طالبانو د امنيې قوماندانۍ او ولایت ته غځېدلې لارې چې يو بل ته نږدې دي، تړلې دي.لاتراوسه طالبانو په دې تړاو څه نه دي ویلي؛ خو د افغانستان د ازادۍ په نامه جبهه د دغه هېواد په بېلابېلو برخو کې د ترسره شویو بریدونو خبرونه او ویډیوګانې خپروي.
د چین او پاکستان مشرانو په یو ګډ بیان کې په افغانستان کې له طالبانو وغوښتل، چې د «منځلاري» سیاست په خپلولو سره دې پراخ بنسټه حکومت جوړ کړي.
د چین او پاکستان لومړي وزیرانو دا رنګه په افغانستان کې د ترهګرۍ پر ضد په ګټورې او سنجول شوې مبارزې هم ټینګار وکړ.
د پاکستان د بهرنیو چارو وزارت د سې شنبې په ورځ د پاکستان او چین د لومړي وزیرانو شهباز شریف او لي چیانګ یوه ګډه وینا پاڼه هم خپره کړه.
د چین لومړی وزیر د شانګهای د همکاریو سازمان په ناسته کې د ګډون په موخه اسلام اباد ته په څلور ورځیني سفر تللی دی.
د چین او پاکستان لومړيو وزیرانو د سې شنبې په ورځ په یوه ګډه وینا پاڼه کې د ګاونډیو هېوادونو پر ضد د افغانستان له خاورې د کارولو په مخنیوي هم ټینګار وکړ.
پاکستان پر طالبانو تور پورې کوي، چې د دوی له مخالفې وسلهوالې ډلې څخه ملاتړ کوي. پاکستان وایي، د تحریک طالبان پاکستان ډله (ټيټيپي) د افغانستان خاوره د دوی د هېواد پر ضد کاروي او له هغه ځایه خپل بریدونه پلانوي.
اسلاماباد په دغه هېواد کې پر چینایي وګړو شوي بریدونه هم له افغانستانه انګیري؛ خو طالبانو هم پر پاکستان بیا په پر له پسې توګه تور لګولی، چې له داعش ډلې څخه ملاتړ کوي.
چین او پاکستان دواړو د ترهګرۍ پر ضد مبارزه کې د همکاریو ژمنه وکړه او له طالبانو یې هم وغوښتل، چې د ترهګرۍ پر ضد کلکه او پرېکنده مبارزه وکړي.
د چین او پاکستان مشرانو د افغانستان د روان وضعیت په اړه د ګډو هڅو پر سر ټینګار وکړ او «د طالبانو د هڅولو لپاره یې په افغانستان کې د پراخ بنسټه حکومت په رامنځته کولو کې د نړۍوالې ټولنې د همغږو تګلارو غوښتنه وکړه.»
دغو دواړو هېوادونو هوکړه وکړه، چې په افغانستان کې به د دوامداره ټیکاو او په نړۍواله ټولنه کې د دغه هېواد د ورګډولو لپاره په ګډه کار او هڅو ته دوام ورکوي.
د طالبانو د کانونو او پټرولیم وزارت وایي، چې د پنجشېر ولایت ۳۵۴۵ قیراطه زمرد یې په ۱۰۷۴۵۰ زره امریکايي ډالرو پلورلي دي. دغه وزارت وايي، یاده اندازه زمرد یې د ازادې بولۍ له لارې پلورلي دي.
د طالبانو د کانونو او پټرولیم وزارت تېره ورځ سې شنبه د (تلې ۲۴مه) په خپله ایکس پاڼه لیکلي چې، د پنجشېر ولایت ۳۵۴۵ قیراطه زمرد یې په ۱۰۷ زره او ۴۵۰ امریکايي ډالرو پلورلي دي.
دغه وزارت وايي، چې په دغو لاسته راغلو ډالرو کې ۱۰ سلنه ونډه دوی اخیستې. خو پر طالبانو نیوکې دي چې د ۱۰ سلنې خبره یوازې د رسنیو په مخکې کوي او د پردې تر شا کیسه بل ډول ده.
د طالبانو د کانونو او پټروليم وزارت چارواکو تر دې وړاندې هم ویلي وو، چې په پنجشېر کې د زمردو ٧٥٠ کانونه ثبت شوي چې اوسمهال یې یوازې ٥٠٠ فعال دي.
د نړۍوالو مرستو کمښت د دې لامل شوی، چې طالبان د خپلو مالي اړتیاوو د پوره کولو لپاره د افغانستان د کانونو کېندنې ته مخه کړي.
تر ډیره بریده پر طالبانو نیوکې کیږي چې، دغه کانونه په نامسلکي توګه را اېستل کېږي چې تر ډېره د کانونو اصلي زېرمو ته زیان اړوي.
تېر کال د افغانستان پخواني ولسمشر محمد اشرف غني هم د کانونو کېندنه ناقانونه بللې وه او زیاته کړې یې وه، چې دا مهال روښانه نه ده چې د دغو کانونو څخه تر لاسه شوې پیسې چېرته او په څه لګول کیږي.
د طالبانو د کانونو او پټرولیم وزارت وایي، چې تېر کال د څه باندې ۵.۵ مېلیونه امریکايي ډالرو په ارزښت ۷۸ زره قیراطه زمرد د داوطلبۍ له لارې پر کورنیو او بهرنیو پانګهوالو پلورل شوي دي.
د طالبانو د کانونو او پټرولیم وزارت چارواکو ویلي، چې د تېر يوه کال په ترڅ کې په پنجشېر ولايت کې د زمردو شاوخوا ١٧٠٠ سيمې سروې او پېژندل شوې او د قانوني کېندنې لپاره يې ٥٧٥ جوازونه صادر شوي دي.
د طالبانو تر کنټرول لاندې باختر اژانس راپور ورکړی، چې په دایکنډي ولایت کې په یوې ټرافیکي پېښه کې درې کسه مړه او ۱۱ نور ټپیان شوي دي.
د راپور له مخې، دغه پېښه د دایکنډي ولایت د میرامور ولسوالۍ په ګرګي سیمه کې رامنځته شوې ده.
په راپور کې راغلي، چې په دغې پېښه کې د مړو شویو کسانو له ډلې دوه تنه یې ښځې دي.
راپور زیاتوي، چې د پېښې اصلي لامل د موټر چلوونکي بې احتیاطي وه.
خو له بل پلوه سیمهییزو سرچینو ویلي، چې په ټپیانو کې هم څلور مېرمنې شاملې دي.
د طالبانو د ټرافیکو ریاست کابل کې سیمهییزو رسنیو ته (د وږي په ۲۰مه) ويلي و، چې د روان لمریز کال په تېرو شپږو میاشتو کې په ټرافیکي پېښو کې ۱۲ سوه کسان مړه او تر څلورو زرو ډېر ټپیان شوي، چې د دغو پېښو ستر لاملونه د لارو سړکونو کندې کپر کېدل، د موټر چلونکو بې احتیاطي او ټرافیکي قوانینو ته نه پاملرنه ښودل شوې ده.
د پښتون ژغورنې غورځنګ مشر منظور پښتین او ځینو افغان فعالانو د ایران پوله ساتو ځواکونو له لوري د لسګونو افغانانو وژلو ته توند غبرګونونه ښودلي دي. پښتین وايي، له فلسطین او لبنانه ملاتړ ښه خبره ده خو د افغانانو وژل ظلم دی.
د بشري حقونو یو سازمان حال وش راپور ورکړی، چې د ایران پوله ساتو ځواکونو په کلګان سراوان سیمه کې په هغو افغان کډوالو ډزې کړې، چې غوښتل یې ایران ته ننوځي او په لسګونه کسان یې په ډزو وژلي دي.
حال وش د سې شنبې په ورځ (د تلې ۲۴مه) د ترلاسه شویو ویډیوګانو او انځورونو او همدا راز د عیني شاهدانو د ادعاوو په حواله راپور ورکړی، چې د ۳۰۰ افغان کډوالو له ډلې شاوخوا له ۶۰ تر ۷۰ تنو پورې ژوندي او پاتې نور وژل شوي یا ټپیان شوي دي.
د پښتون ژغورنې غورځنګ مشر منظور پښتین نن چهارشنبه د (تلې ۲۵مه) په خپله ایکس پاڼه لیکلي چې له فلسطین او لبنان څخه د ایران ملاتړ ښه خبره ده خو وايي پر افغانانو مخامخ ډزې غندي: «ایران په لسګونو افغانان مسلمانان په ډیر ظلم جبر سره شهیدان کړي دي. چې دا ظلم دی. له ډیرې مودې راهیسې داسې پیښې رامنځته کیږي باید مخنیوی یې وشي.»
هغه زیاتوي چې ټول دې په دې برخه کې غږ پورته کړي چې د ایران تر واکمنو ورسیږي: هر څوک باید غږ پورته کړي چې نور دې په افغانانو ظلم بند کړي او د دې پیښې کونکو پرخلاف دې ګام پورته کړي.»
د افغانستان مخکني لوی څارنوال محمد فرید حمیدي هم د ایراني ځواکونو له لوري د بې ګناه افغانانو وژلو ته غبرګون ښودلی او ویلي یې دي، چې «په قصدي توګه پر بې ګناه او بې دفاع افغان کډوالو برید او د هغوی وژل، د بشریت ضد جنایت، او یو نا انساني کړنه ده.»
هغه د ایراني ځواکونو له خوا د افغانانو ډله ییزه وژنه بې رحمانه او زړه بوږنوونکي بللې، او زیاتوي چې «دغو افغان کډوالو د امن ځای د موندلو او د ژوند له ګواښونو څخه د تېښتې په هیله خپله هیواد پریښی وو.»
هغه د طالبانو حکومت پړ وباله چې د افغان ولس په وړاندې یې خپل مسوولیت نه دی ادا کړی «د افغانستان نامسوولو او نامشروع واکمنانو په نړیواله کچه او په بهر کې د هیواد او خلکو عزت تر خارو لاندې کړی.»
ښاغلي حمیدي په ملګري ملتونو، د ملګرو ملتونو د کډوالو عالي کمېشنرۍ، د ملګرو ملتونو د بشري حقونو شورا، د جرمونو نړۍوالې محکمې او نورو اړوند ارګانونونو غږ کړی چې باید جدي ګامونه واخلي او عاملان یې د عدالت منګولو ته وسپاري.
د افغانستان د بشري حقونو کمیسیون مخکنۍ کمیشنرې شبنم صالحي هم د ایراني عسکرو له خوا پر افغان کډوالو برید غندلی او ویلي یې دي، چې د «ایرانیانو له خوا په قصدي ډول د ۳۰۰ بې ګناه افغان کډوالو په نښه کول د بشریت ضد جنایت، د نه بښلو وړ او نا انساني عمل دی. دا بې دفاع خلک، د خوندیتوب په لټه کې له خطر څخه تښتيدل چې د ایراني عکسرو له وحشت سره مخ شول.»
هغې وړاندې وويل: د «طالبانو رژيم په کورنۍ او نړۍواله کچه د خپلو وګړود حقوقو او کرامت په ساتنه کې پاتې راغلی او ولس يې له بربادۍ سره مخ کړی. ملګري ملتونه او د بشري حقونو شورا باید د پیښې له عاملانو سره حساب وکړي او په دې برخه کې بشپړ عدالت پلی کړي.»
د تېر حکومت د پکتیا والي محمد حلیم فدايي هم په خپله ایکس پاڼه د ایران پوله ساتو ځواکونو له لوري د لسګونو افغان کډوالو د وژلو په اړه غبرګون ښودلی او وايي چې داسې کړنې ورته د منلو نه دي، «د ایراني پوله ساتو عسکرو دا ډول نا انساني او خونړی عمل په کلکه غندم او دا د واړو هیوادونو د ولسونو تر منځ ژور تړون ته زیان اړوي.»
د مخکیني حکومت د پوځ یوه جنرال سمیع سادات هم د ایراني ځواکونو دا ډول پېښه غندلې او ويلي یې دي چې ایراني ځواکونو هغه کسان په ډزو وژلي چې له طالبانو په تېښته او له افغانستانه وتل: «دا سمه ده چې نن به مو وس نه رسيږي خو قسم په خدای چې ورځ یې راشي، دغه غچ به له ایرانه اخلو.»
په کور دننه او بهر یو شمېر نورو افغانانو هم توند غبرګونونه ښودلي او ایران یې له افغانانو سره په نا انساني چلند او ظلم تورن کړی.
تر دې وړاندې هم په ایران کې له افغان کډوالو سره ورته پېښې شوې خو دا ځل داسې یوه پېښه چې په مخامخ ډزو کې لسګونه کسان وژني لومړۍ ده.
تر اوسه پورې لا کره شمېرې نه دي څرګندې او نه هم په دې اړه د طالبانو حکومت غبرګون ښودلی چې په دې پېښه کې څومره کسانو ته مرګ ژوبله اوښتې ده.
ايراني چارواکو هم تر اوسه پورې د دې پېښې په اړه څه نه دي ويلي.
د طالبانو ستره محکمه وایي، چې د کابل ښاري ابتدائيه محکمې لهخوا څلورو تورنو کسانو ته تعزیري سزا ورکړل شوه.
دغې محکمې د یوې خبرپاڼې په خپرولو سره لیکلي، چې د دوو ښځو په ګډون څلورو کسانو ته د «نامشروع اړيکو» په تور د محکمې په انګړ کې تعزیري سزا ورکړل شوه.
د خبرپاڼې له مخې، د دغو تورنو کسانو له ډلې دوه تنه پر ۲ ـ ۲ کاله تنفيذي بند او ۳۰ـ ۳۰ دُرو تعزیري سزا او دوه نور تورن پر يوـ یو کال او شپږ شپږ میاشتې تنفيذي بند او ۲۵ ـ ۲۵ دُرو تعزیري سزا محکوم شوي دي.
ورته مهال د طالبانو سترې محکمې تېره ورځ د یوې بلې خپرپاڼې په خپرولو سره ویلي و، چې د خوست په ځاځي میدان ولسوالۍ کې يې په عام محضر کې ۲ کسان د «لواطت» په تور یو په ۳۵ او دویم یې په ۳۰ دورو وهلي دي.
محکمې ويلي، چې یو کس په يو کال او ۶ مياشتې او دویم په يو کال تنفيذي بند هم محکوم شوی دی.
د راپورونو له مخې، طالبانو یوازې په تېرو څه باندې شپږو میاشتو کې د ښځو په ګډون څه باندې ۲۰۰ کسان په عام محضر کې په دورو وهلي دي.