منځني ختیځ کې کړکېچ؛ ګارډین: د یحیی سنوار مړینه حماس له کړکیچ سره مخ کوي

ګارډین ورځپاڼې د پنجشنبې په ورځ (د تلې ۲۶مه) په یوې مقاله کې لیکلي، چې پر غزې د اسراییل په برید کې د حماس د پوځي مشر یحیی سنوار وژل کېدل به دغه ډله له کړکیچ سره مخ کړي.

د دې رسنۍ په وینا، حماس به هڅه وکړي چې سنوار د "شهید" په توګه معرفي کړي چې د جګړې په لومړۍ کرښه کې وسله په لاس ووژل شو، ترڅو نور خلک وهڅوي چې له دغې ډلې سره یوځای شي. مګر په اوسني حالت کې دا تګلاره اغېزمنه نه ښکاري.

د ګارډین په وینا، د غزې په تړانګه کې اوسني وضعیت ته په کتو، حماس نویو کسانو ته سخته اړتیا لري.

اسراییلي پوځ د پنجشنبې په ورځ (د تلې ۲۶مه) په يوه خبرپاڼه کې تاييد کړه، چې سنوار د غزې تړانګې په سویل کې د دغه هېواد د ځواکونو د عملياتو په ترڅ کې وژل شوى دى.

ګارډین زیاته کړې، چې حماس د اسماعیل هنیه، محمد ضعیف، مروان عیسی او اوس یحیی سنوار له وژل کېدو وروسته خپل ډېر لوړ پوړي مشران له لاسه ورکړي دي.

د دغې رسنۍ په وینا، په غزه کې د حماس قومنده ښايي اوس د دې ډلې د مشر ۴۹ کلن ورور محمد سنوار ته ورکړل شي او هغه به هم ممکن د "اسراییل پر وړاندې د "ټیټې کچې وسلوال مقاومت" ستراتیژۍ ته دوام ورکړي.

امریکا هم ښايي په غزه کې د موجودو شرایطو او د حماس د مشر مړینې سره له اسراییل څخه وغواړي چې په غزه کې خپل پوځي عملیات پای ته ورسوي. دا هغه مساله ده چې ډیموکراټ ګوند به د امریکا د ولسمشرۍ د انتخاباتو په درشل کې ترې هرکلی وکړي.

ګارډین زیاته کړې، حتی د اسراییل له لوري د بریا اعلان هم په غزه کې د دغه هېواد د پوځي عملیاتو د پای په مانا نه ده. ځکه چې اسراییل په وار وار ویلي، چې تر هغه وخته پورې به په دې تړانګه کې حضور ولري تر کومې چې اړتیا وي. تر اوسه د غزې د راتلونکې لپاره کوم سیاسي پلان چې د ټولو لورو له خوا منل شوی وي، نه دی وړاندې شوی.

د دغې رسنۍ په وینا، د سنوار له وژل کېدو وروسته، دا امکان ډېر لږ دی چې نتنیاهو دې د زرګونو فلسطینیانو د خوشې کولو او د دغې ډلې له خوا د یرغمل شویو بندیانو د خلاصون په بدل کې حماس ته د نورو امتیازاتو ورکولو سره موافقه وکړي.

د اسراییل د دفاع وزیر یواو ګالایت د سنوار د مړینې په مناسبت په یوه اعلامیه کې د حماس له غړو غوښتي چې خپلې وسلې پر ځمکه کېږدي.