افغانستان کې پر کوکنارو بندیز د مصنوعي اپینو د تولید ګواښ ډېر کړی
افغانستان کې د کوکنارو پر کښت بندیز دا ګواښ رامنځته کړی چې په اروپا کې دغه تشه د فنتانیل او نیتازن په څېر مصنوعي اپینو د تولید له لارې ډکه شي.
افغانستان کې د کوکنارو پر کښت بندیز دا ګواښ رامنځته کړی چې په اروپا کې دغه تشه د فنتانیل او نیتازن په څېر مصنوعي اپینو د تولید له لارې ډکه شي.
سالون رسنۍ د یوې بریټانيايي خیریه موسسې د مشر اندره ګومز په حواله لیکلي، چې د کوکنارو پر کر د طالبانو د بندیزونو له امله په لومړیو کې د زیرمه شویو هیرویینو شته والي دا ګواښ یوڅه راکم کړی و، خو اوس ددې زیرمو په کمېدو سره دا ګواښ ډیریږي.
د نوموړي په باور، په ډېر احتمال د نشه يي توکو د بیو لوړېدو سره به قاچاق کوونکي دې ته وهڅیږي، چې ځایناستي مصنوعي توکي ومومي.
د یادې رسنۍ د رپوټ له مخې، ددې بندیز اغیزې په پولنډ کې ترسترګو کیږي، ځکه هلته د فنتانیل له امله د مړینې شمېر ډېر شوی.
د اروپا د نشه يي توکو او په نشه يي توکو د روږدو د څارنې مرکزوايي، چې مصنوعي اپیوني توکي، سره له دې چې تر اوسه پراخ شوي نه دي، خو په ځانګړو سیمو لکه بالتیک هېوادونو کې ورو ورو دود کیږي.
رسنۍ وايي، اروپا په ځانګړې توګه جرمني، سویس او هالنډ د نشه يي توکو کارول تر څار لاندې نیولی.
رسنۍ وايي، چې له نشه يي توکو او کوکنارو سره د طالبانو د مبارزې هڅې په دې توکو د هغوی له تاریخي اتکاء سره چې خپل فعالیتونه یې پرې تمویل کول، په ټکر کې دي.
طالبانو واک ته له رسېدو وروسته د کوکنارو پرکر او هیرویینو پر تولید بندیز ولګاوه او روږدي کسان یې له لارو او کوڅو ور ټول کړل، خو له دې سره سره، د نشه يي توکو او په دې توکو د روږدو کسانو ستونزه حل نه ده.
