د طالبانو تر واک لاندې ستره محکمه وایي، چې دغې ډلې په کابل کې د یوې ښځې په ګډون ۲ کسان د «زنا» په تور په دورو وهلي دي. دغې محکمې د یوې خبرپاڼې په خپرولو سره ویلي، چې یاد کسان هر یو په يو ـ یو کال او شپږ مياشتې تنفيذي بند او ۳۹ ـ ۳۹ دورو سزا محکوم شوي و.
دا په داسې حال کې ده، چې طالبانو نن په میدان وردګو او پرون په تخار او ننګرهار ولایتونو کې هم څلور کسان په دورو وهلي و.
که څه هم د طالبانو له خوا دغه سزاوې له پراخو غبرګونونو سره مخ دي، خو د دغې ډلې چارواکي تل ټینګار کوي، چې د دغو حکمونو پلي کول د شرعي قوانينو پر بنسټ او د عدالت د تامين او د جرمونو د مخنيوي په موخه کېږي.
د طالبانو د سترې محکمې د جزا دېوان عمومي مشر عتیق الله دروېش بیا څو ورځې مخکې ویلي و، چې دغې ډلې واک ته له رسېدو راهیسې په افغانستان کې پنځه تنه اعدام کړي هم دي.
دروېش همداراز زیاته کړې، چې د دې ډلې محکومو شاوخوا ۳۰ نورو کسانو ته د اعدام حکمونه هم صادر کړي او اوس دا حکمونه د طالبانو د مشر وروستي تصویب ته په تمه دي.
له دې سره، په افغانستان کې د ملګرو ملتونو ماموریت (یوناما) د پنجشنبې په ورځ د لړم په ۱۰ مه خبر ورکړ، چې په تېرو درېیو میاشتو کې په افغانستان کې د ۱۶ ښځو په ګډون ۱۱۱ تنه په فزیکي توګه مجازات شوي دي.
یوناما ویلي، چې طالبانو دغه کسان د بېلابېلو تورونو له امله په انفرادي او ډله ییزه توګه په دورو وهلي دي.