د طالبانو ستره محکمه وايي، چې په میدان وردګ ولایت کې یې یو کس ته د «لواطت» په تور تعزیري سزا ورکړې ده. د طالبانو له خوا په عام محضر کې خلکو ته بدني سزا په نړۍواله کچه غندل شوې خو طالبان یې د «شریعت» تطبیق بولي.
د طالبانو سترې محکمې نن سې شنبه د (لړم ۱۵مه) د یوې خبرپانې په خپرولو سره ویلي، چې د میدان وردګ ولایت د سید اباد ولسوالۍ ابتداییه محکمې پرون دوشنبه یوه کس ته د «لواطت» په تور تعزیري سزا ورکړې ده.د خبرپاڼې له مخې، دغه پرېکړه د دغې ډلې د سترې محکمې له تایید وروسته د میدان وردګ ولایت د سید اباد ولسوالۍ ابتداییه محکمې په عام محضر کې پر یوه کس عملي شوه.په خبرپاڼه کې د تورن کس د هویت په اړه څه نه دي ویل شوي خو وايي، د محکمې د پرېکړې له مخې چې طالبانو دغه کس ته چې د متهم اصطلاح کارولې، دوه کاله د تنفیذي بند سزا اورولې او ۳۹ دورې یې هم وهلی دی.طالبانو دا نه دي ویلي، چې تورن کس ته یې د استناف غوښتنې موقع ورکړې او که نه.که څه هم پر طالبانو په عام محضر کې د بدني سزا ورکولو په اړه د بشري حقونو د ملاتړو سازمانونو له لوري سختې نیوکې کېږي؛ خو لا هم طالبان لږ تر لږه په یوه یا دوو ورځو کې د افغانستان په بېلابېلو ولایتونو کې پر خلکو په عام محضر کې بدني سزاوې عملي کوي.د طالبانو دغه کړنې په نړۍواله کچه غندل کېږي؛ خو طالبان وایي دوی «د اسلامي شریعت» د تطبیق په موخه دغه چاره ترسره کوي.
