د ځايي سرچینو په خبره، تېره شپه د جنوبي وزیرستان شکتوی سیمه کې پر یو کور د پاکستاني پوځیانو د هاوان مرمۍ لګېدلو له امله دوه ماشومان وژل شول او یو بل ټپي شو. سرچینې زیاتوي د پاکستان پوځیانو د وسلوالو سره له نښتې وروسته د عامو خلکو پر کورونو هاوانونه وتوغول.
په جنوبي وزیرستان کې ځايي سرچینو نن د جمعې په ورځ «د لړم١٧مه» وویل، چې د جنوبي وزیرستان شکتوي سیمې اوسېدونکو د اعتراض په ډول د ماشومانو جسدونه عمومي چوګ ته راوړلي دي.
ځايي خبریالان هم وايي چې د سیمې اوسېدونکي نیوکه کوي، چې پاکستاني پوځیان د عامو خلکو کورونه په نښه کړي، چې ځايي خلکو ته په کې مرګ ژوبله اړولې ده.
تر اوسه پورې پاکستاني پوځیانو د ماشومانو د وژل کېدو په اړه کوم غبرګون نه دی ښودلی.
دوه ورځې وړاندې د خیبر درې په تېرا کې هم د پاکستاني پوځیانو هاوان مرمۍ د توغولو له امله دوه ماشومان وژلي او پنځه نور یې ټپیان کړي ول.
دغه ماشومان هغه وخت په نښه شول، چې د تېرا په پوټان سیمه کې یاد ماشومانو له ښوونځي څخه کور ته په لاره ول.
د خیبر درې په تېرا پوټان سیمې اوسېدونکي هم ددې ماشومانو جسدونه پېښور ته د اعتراض په ډول وړي ول.
د ځايي سرچینو په وینا د اعتراض کوونکو او پاکستاني نظامیانو تر منځه د خبرو وروسته د ماشومانو جسدونه خپلو سیمو ته لېږدول شوي دي.
سرچینې زیاتوي په دې ناسنه کې پرېکړه وشوه، چې د پاکستان پوځ به وژل شوي هر ماشوم ته به ۵۰ لکه کلدارې او ټپیانو ته به ۵ لکه کلدارې ورکوي.
په دې ناسته کې دا پرېکړه هم شوې، چې له دې وروسته به ځايي خلکو پر کورونو بریدونه نه کېږي.
د ډيورنډ فرضي کرښې ته څېرمه ځیني ځايي اوسېدونکي وايي چې د پاکستاني پوځ او ټي ټي پي تر منځه روانه جګړه کې دې د ملکي خلکو د مرګ ژوبلې مخنوي وشي او دواړه لوري دې دا مسله په پام کې ونیسي.
د یادونې وړ ده، چې د منظور پښتین په مشری د پښتون ژغورنې غورځنګ په وروستی جرګه کې پاکستاني پوځیانو او ټي ټي پي ته خبردارۍ ورکړ، چې په ۶۰ ورځو کې دې د پښتنو له سیمو ووځي.
