الجزیرې ټلویزیون د لبنان د ښاروال له قوله خبر ورکړی، چې د اسراییلي الوتکو په بمبار کې د لبنان په شمالي ښارګوټي کې د استوګنې پر یوه کور د برید په پایله کې ۱۴ کسان وژل شوي او ۱۵ نور ټپیان شوي دي.
د لبنان په شمال کې د عین یعقوب په ښارګوټي د اسراییلي الوتکو په برید کې لږ تر لږه ۱۴ کسان وژل شوي او ۱۵ نور ټپیان شوي دي.
دغه برید د دوشنبې په ورځ د اسراییل له لوري تر سره شوی دی.
د لبنان د عامې روغتیا وزارت رسنیو سره د لومړنیو معلوماتو د شریکو پر مهال ویلي و، چې په یاد برید کې اته تنه وژل شوي او ۱۴ نور ټپیان دي؛ خو وروسته د عین یعقوب ښاروال ماجد دربیس رسنیو ته وویل، چې په یاد برید کې ۱۴ تنه وژل شوي او ۱۵ نور ټپیان شوي دي.
د راپورونو له مخې، تر دې مخکې د دوشنبې په ورځ د لبنان په سویل کې د صیادون ولسوالۍ په ساکساکیه کې د اسراییل په برید کې لږ تر لږه اوه کسان ووژل شول او اوه نور ټپیان شول.
د عامې روغتیا وزارت په وینا، دغه راز د یکشنبې په ورځ، په ټول هېواد کې د اسراییل په بریدونو کې ۵۴ کسان وژل شوي او ۵۶ نور ټپیان شوي دي.
د ۲۰۲۳ کال له اکتوبر میاشتې راهیسې تر اوسه پر لبنان د اسراییل په بریدونو کې ۳۲۴۳ تنه وژل شوي او ۱۴۱۳۴ تنه ټپیان شوي دي.
