ایراني رسنۍ: په ایران کې ۱۰۰۰ تنه افغان بندیان افغانستان ته ستنول کېږي

د ایران دولتي خبري اژانس راپور ورکړی، چې د ایران په زندانونو کې ۱۰۰۰ تنه افغان بندیان افغانستان ته ستنول کېږي.

د ایران دولتي خبري اژانس راپور ورکړی، چې د ایران په زندانونو کې ۱۰۰۰ تنه افغان بندیان افغانستان ته ستنول کېږي.
دغه اژانس د عدلیې وزارت د بشري حقونو او نړۍوالې برخې د مرستیال له قوله په اېکس پاڼه کاږلي، چې ډېری دغه بندیان د نشهیي توکو پر اړوندو جرمونو بندیان شوي دي.
هغه زیاته کړې، له دغې ډلې ځیني کسان په داسې جرمونو تورن وو چې د خپلې سزا ډېره برخه یې تېره کړې؛ خو د بند د پاتې مودې د تېرولو لپاره به خپل هېواد ته ستانه کړای شي.
په دې تړاو طالبانو لا له وړاندې ویلي و، له ایراني چارواکو سره یې هوکړه کړې چې یو شمېر افغان بندیان دې افغانستان ته ستانه کړي چې د بند پاتې موده په خپل هېواد کې تېره کړي.
د راپورونو له مخې روان لمریز کال په ایران کې د افغان وګړو د اعدام سزا کچه هم تر پخوا لوړه شوې او هره پلا چې د ایراني محکمو له لوري د اعدام شویو کسانو نوملړ خپرېږي؛ نو د افغانانو نومونه هم په کې لیدل کېږي.
د ایران د بشري حقونو سازمان ویلي و، چې ایران یوازې په اکتوبر میاشت کې د ۱۳ افغانانو په ګډون لږ تر لږه ۱۶۶ کسان اعدام کړي، چې ورسره د ګڼو نړۍوالو بنسټونو او د بشري حقونو د ادارو غبرګونونه هم ورسره مله وو.

د طالبانو د بهرنیو چارو وزیر ادعا کوي، چې په تېرو شلو کالو کې د افغانستان اقتصاد پړسېدلی و او اقتصادي پالیسیو د افغانستان خلک “خیرات خوره” روږدي کړي وو. نوموړي دغه څرګندونې په کابل کې د وړو تمویلوونکو ملي کنفرانس ته کولې.
طالب لوړ پوړو چارواکو نن چهار شنبه د (لړم ۲۲مه) په کابل کې د وړو تمویلوونکو د ملي کنفرانس پرانېسته وکړه.
په دغه کنفرانس کې د طالب چارواکو ترڅنګ د یو شمېر بهرنیو ادارو استازو هم ګډون درلود.
طالب چارواکو د دغه کنفرانس له لارې پر نړۍوالو هېوادونو او د افغانستان پر سوداګرو غږ وکړ، چې بې وزلو، بزګرانو او وړو کاروباریانو سره همکاري وکړي.
د دغه کنفرانس پر مهال د طالبانو د بهرنیو چارو وزیر امیرخان متقي وویل، چې تېر شل کاله د افغانستان اقتصاد جنګي بڼه لرله.
نوموړی ادعا کوي، چې په تېرو شلو کالو کې د افغانستان اقتصاد پړسېدلی و او د هغو پالیسیو له امله یې د افغانسان خلک خیرات خواره اموخته کړل.
همدارنګه نوموړی ادعا کوي، په تېر شلو کالو کې مو نه دي لیدلي چې نوې فابریکه او یا نوی روغتون دې جوړ شوی وي.
ښاغلی متقي پر هېوادونو غږ کوي، چې خپلې اقتصادي او تخنیکي تجربې دې ورسره شریکې کړي او د کرنې، صنعت، وړو تمویلوونکو او ټنکالوژی په برخه کې دې ورسره تجربې شریکې کړي.
نوموړي وویل:« د طالبانو پالیسي اقتصاد محوره ده او هر څوک چې دلته پانګه اچونه کوي دروازې ورته خلاصې دي او زموږ د قانون په چوکاټ کې دې په افغانستان کې پانګه اچونه وکړي.»
پر همدغه مهال د طالبانو د ریاست الوزرا اقتصادي مرستیال ملا برادر وايي، د دغه کنفرانس له لارې به له ګڼو کسانو سره مرسته کېږي او ورسره به د وزګارتیا کچه راټیټه شي.
که څه هم چې طالب چارواکي تل په هېواد کې د بېوزلۍ د لوړې کچې، په نشهیي توکو د روږدو کسانو اخته کېدل او د کاري فرصتونو د نشتوالي پړه اړه پر تېر پرځېدلي حکومت اچوي؛ خو پر افغانستان د یادې ډلې په حاکمېدو سره شاوخوا اته مېلیونه کسان کډوال شوي او هره ورځ سلګونه کسان د بېکارۍ او ټولنیزو حقونو د نشتوالي له امله پر نا قانونه لارو له هېواده تېښتې ته اړ کېږي.

هند ته د طالب ډېپلوماټانو له ورپېژندلو وروسته د طالبانو ویاند ذبیح الله مجاهد وايي، د یادې ډلې تر واک لاندې د اترا ادارې د رییس په مشرۍ یو پلاوی هند ته تللی دی.
طالبانو ویاند ذبیح الله مجاهد د چهارشنبې په ورځ د (لړم ۲۲مه) په خپله اېکس پاڼه لیکلي، چې د دغې ډلې د اترا ادارې د عمومي رییس سید برات شاه په مشرۍ یو پلاوی هند ته په سفر تللی.
ښاغلي مجاهد زیاته کړې، چې د یادې ډلې د اترا ادارې رییس او پلاوي د سوېلي اسیا د مقرراتو د ادارو په غونډه کې د ګډون په موخه هند ته رسېدلی دی.
دغه غونډه تېره ورځ په نوې ډیلي کې د هند په کوربهتوب ترسره شوه.
پر افغانستان د طالبانو له واکمنېدو وروسته دا لومړی ځل دی، چې یو لوړپوړی طالب چارواکی هند ته سفر کوي.
یوه اونۍ وړاندې د هند د بهرنیو چارو وزارت مرستیال جي پي سېنګ د یوه پلاوي په مشری د طالبانو د دفاع وزیر ملا یعقوب مجاهد او د دغې ډلې د بهرنیو چارو وزیر امیرخان متقي سره په جلا، جلا لیدنو کې د طالبانو او هند ترمنځ د دوه اړخیزو اړیکو پر زیاتولو خبرې کړې وې.
د دغه هندي چارواکي او لوړپوړو طالب چارواکو تر لیدو کاتو څو ورځې وروسته د طالبانو له لوري هند ته د نويو طالب ډېپلوماټانو د معرفي کېدو خبرونه هم رسنیز شول.
د سنډې ګارډین په یوه راپور کې چې د یکشنبې په ورځ خپور شو، ویل شوي و چې نوی ډیلی په پام کې لري له طالبانو سره د ډېپلوماتیکو اړیکو د پراخولو په برخه کې د یوه مهم ګام په توګه په هند کې د دغې ډلې استازی ومني.
د سنډې ګارډین ورځپاڼې د راپور له مخې، طالبانو اکرام الدین کامل ته په ممبیي کې د افغانستان په کونسلګرۍ کې د دویم سکرتر دنده په پام کې نیولې ده.
هندي رسنیو راپور ورکړی، چې په دغه غونډه کې د سوېلي اسیا د مخابراتو د تنظیم کوونکو غړو هېوادونو لکه افغانستان، بنکله دېش، بوتان، هند، ایران، مالدیف، نیپال، پاکستان او سریلانکا استازو ګډون کړی و.

د کډوالو لپاره د ملګرو ملتونو عالي کمیشنرۍ (یو این ایچ سي ار) وايي، د دغه سازمان په ملاتړ هرات کې یوه راستانه شوي کډوال ۱۵۰ تنو ته د کار زمینه برابره کړې چې ډیری یې ښځې دي. دغه سازمان وايي، د حسین په نوم دغه راستون شوي کډوال د خیاطۍ مرکز جوړ کړی.
د کډوالو لپاره ملګرو ملتونو عالي کمیشنرۍ نن چهارشنبه د (لړم ۲۳مه) په خپله ایکس پاڼه لیکلي چې، د دغه سازمان په ملاتړ هرات کې د حسین په نوم یوه راستانه شوي کډوال ۱۵۰ تنو ته د کار زمینه برابره کړې چې ډیری یې ښځې دي.
سازمان دا نه دي ويلي، چې د دغو ۱۵۰ تنو له ډلې څو تنه یې ښځې دي، خو وايي د دغو کارګرو ډیره برخه ښځې دي.
واک ته د طالبانو له رسیدو وروسته په ښځو او نجونو بندیزونه ډیر شوي او دوی له کار او ازادو ګرځېدو ګرځول شوې دي.
د ملګرو ملتونو د کډوالۍ عالي کمیشنرۍ وايي، چې له دغه کس سره یې د خیاطۍ د کاروبار په برخه کې د ښځو د فعالیتونو او ټولنیزو خدمتونو ټولنې (واسا) له لوري مالي مرسته شوې ده.
تر دې وړاندې هم ملګرو ملتونو په افغانستان کې ښځو ته د خیاطۍ او لاسي صنایعو په برخه کې د کوچنیو کارو بارونو او د دوی د سالمې بوختیا لپاره کوچني کاروبارونه جوړ کړي و

د راپورونو له مخې، نن له غرمې مخکې د افغانستان او پاکستان ځیني ښارونه زلزلې لړزولي دي. ویل کېږي، چې د ریښتر په کچه د زلزلې شدت ۵.۳ درجې و او مرکز یې د هندوکش غرونه ښودل شوي دي.
د زلزلې څارنې ملي مرکز ویلي، نن چهار شنبه د (لړم ۲۲مه) نېټه له غرمې مخکې د ریښتر په کچه ۵.۳ درجې زلزلې د افغانستان او پاکستان ګڼې سیمې لړزولې دي.
د زلزلې مرکز په افغانستان کې د هندوکش د غرونو لړۍ ښودل شوې، چې ژوروالی یې ۲۲۰ کیلومتره و.
د طالبانو تر واک لاندې باختر خبري اژانس هم راپور ورکړی، چې نن د کابل ښار زلزلې لړزولی دی.
د دغه اژانس له لوري د زلزلې د زیانونو په اړه تردې مهاله کوم معلومات نه دي خپاره شوي.
بل خوا پاکستاني رسنیو راپور ورکړی، چې د پاکستان د خیبر پښتوخوا ایالت ځینې سیمې زلزلې لړزولې دي.
د زلزلې ټکانونه په اسلام اباد، سوات، ملاکنډ، چارسدې، مانسهره، صوابۍ، مردان، پېښور، چترال، اپر دېر، خیبر، لنډي کوتل، جمرود، تېراه، بونیر او د خیبرپښتونخوا په نورو ښارونو کې حس شوي دی.
د رسنیو د معلوماتو له مخې، په پېښور، صوابۍ او ملاکنډ کې د زلزلې تکانونه نسبتا قوي وه او خلک له خپلو کورونو څخه بهر راوتلي دي.
تر دې مهاله په پاکستان کې هم د ننۍ زلزلې د زیانونو په اړه کوم معلومات نه دې ورکول شوي.

د طالبانو تر واک لاندې باختر اژانس خبر ورکړی، چې له ګاوڼدیو هېوادونو څخه د افغان کډوالو د راستنېدو په دوام له ایران او پاکستانه تېره ورځ ۲۱۲ کورنۍ راستنې شوې.
دغه اژانس په اېکس پاڼه لیکلي، چې له دغه دلې ۲۵ کورنۍ د ننګرهار ولایت د تورخم له لارې، ۸ کورنۍ د کندهار ولایت د سپین بولدک له لارې له پاکستانه او ۵۷ کورنۍ د نیمروز ولایت د ابرېښم پله له لارې او ۱۱۲ کورنۍ د هرات د اسلام کلا له لارې له ایرانه راستنې شوې دي.
باختر اژانس زیاته کړې، چې د راستنو شویو کورنیو له ډلې ۹ کورنۍ خپلو اصلي سیمو ته لېږدول شوې او پر لسګونو نورو کورنیو یې مرستې وېشلې دي.
بل خوا له ایران څخه د افغان کډوالو د اېستلو په دوام تېره ورځ د دغه هېواد تسنیم خبري اژانس د انقلاب تایباد د لوی څارنوال له قوله راپور ورکړی، چې د روان کال له پیله تردې دمه ۲۳زره او ۱۵۶ تنه بې اسناده افغان کډوال د دوغارون له لارې افغانستان ته ستانه شوي دي.
حجت الله صدیقي ویلي و، چې ایران ته د افغان کډوالو د ورتګ شمېره سږ د تېر کال پرتله ۵۰ سلنه کمه شوې ده.
نوموړي ایران ته د بې اسناده افغانانو د تګ په کمېدو کې د پولو د امنیت ټینګښت، په ختیځو پولو کې د وسلهوالو ځواکونو څار او ځواکمنتیا، حقوقي مبارزې او د ټولو هېوادوالو ملاتړ یې مهم لاملونه ګڼلي دي.
دا په داسې حال کې ده، چې تېره ورځ د ایران د کورنیو چارو وزیر اسکند مومني وویل، دا چې د کډوالو لپاره له نړۍوالو هیڅ ډول مرسته نه ترلاسه کوي؛ نور په خپل هېواد کې افغان کډوال نه شي منلای.
