د لبنان په سویل لویدیځ کې د یونیفل پر مرکزي دفتر د توپ مرمۍ لګیدلې ده
په لبنان کې د ملګرو ملتونو سوله ساتو ځواکونو (یونیفل) په یوه خبرپاڼه کې وویل، چې د لبنان په سویل لوېدیځ کې د دغو ځواکونو پر مرکز د توپ مرمۍ لګېدلې ده.
په لبنان کې د ملګرو ملتونو سوله ساتو ځواکونو (یونیفل) په یوه خبرپاڼه کې وویل، چې د لبنان په سویل لوېدیځ کې د دغو ځواکونو پر مرکز د توپ مرمۍ لګېدلې ده.
دی ونیفل په وینا، دغه مرمۍ ونه چاوده او د پیښې په ځای کې ایټالیوي ځواکونو د کنټرول شوي چاودنې په ترسره کولو سره یې دغه مرمې له منځه یوړه.
په دې پېښه کې چا ته زیان نه دی اوښتی او یوازې د یونیفل مرکزي دفتر ته لږ زیان اوښتی دی.
دوو جګپوړو ډیموکراټ سناتورانو په یو لیک کې، د امریکا له دفاع وزارت او د قانون پلي کونکو ادارو څخه غوښتي، چې د روسیې له چارواکو سره د ایلن ماسک د اړیکو په اړه راپورونه وڅیړي، چې د دوی په وینا، د ملي امنیت سره تړاو لري.
رویټرز خبري اژانس د جمعې په ورځ راپور ورکړی چې دا لیک یې لیدلی دی.
ایلن ماسک، دسپیس اېکس اجرایوي مشر او د اېکس ټولنیز شبکې مالک، چې په دې وروستیو کې د متحده ایالاتو د منتخب ولسمشر ډونالډ ټرمپ له خوا د فدرالي حکومت د نوي «دولتي موثریت څانګې» د یو مشر په توګه ټاکل شوی، دغه اداره دوه مشران لري.
د سپیس اېکس د مشر په توګه، ماسک د پنټاګون او د متحده ایاالتو استخباراتي ادارو سره د میلیاردونو ډالرو په ارزښت قراردادونه هم لاسلیک کړي.
د بهرنیو اړیکو د کمیټې جګپوړي غړې جین شاهین او د سنا د وسله والو خدماتو د کمیټې مشر جیک ریډ په خپل لیک کې د امریکا له لوی څارنوال میرک ګارلینډ او د پنټاګون له عمومي مفتش څخه غوښتي چې د هیواد د پوځ او استخباراتي ادارو سره دسپیس اېکس په قراردادونو کې ماسک د رول اړه څیړنې وکړي.
دغو دوو سناتورانو له روسي چارواکو سره د ماسک د اړیکو په اړه د خپرو شوو راپورونو په تړاو خبرې څرګندونې کړي او ویلي یې دي، چې د دغو قراردادونو له څېړلو وروسته باید له دغو قراردادونو د ماسک د احتمالي تعلیق یا ایستلو په اړه پرېکړه وشي.
شاهین او ریډ زیاته کړه، چې ماسک د متحده ایالاتو د حکومت له میلیاردونو ډالرو پیسو څخه ګټه پورته کړې او د متحده ایالاتو له "پېژندل شوي دښمن" سره د هغه اړیکې د "حکومتي قراردادي او د امنیتي قراردادونو د لرونکې" په توګه په ماسک د "اعتماد" په اړه جدي شکونه راپورته کوي.
وال سټریټ ژورنال تیره میاشت له روسي چارواکو سره د ماسک د تماسونو په اړه راپور ورکړ او له هغه وروسته د امریکا د کانګرس یو شمیر ډیموکراټ غړو د څیړنو غوښتنه کړې وه.
تیره ورځ، نیویارک ټایمز راپور ورکړی و، چې ماسک په ملګرو ملتونو کې د ایران د اسلامي جمهوریت له سفیر سره کتلي.
په دغه راپور کې ویل شوي و، چې د دغو لیدنو موخه د تهران او واشنګټن ترمنځ د کړکیج د کمولو په اړه خبرې اترې دي.
د رویټرز خبري اژانس د یو راپور له مخې، د ایران یو جګپوړي چارواکي د جمعې په ورځ ویلي، چې ایران به د لبنان له خوا د اسراییل سره د اوربند د خوندي کولو لپاره په خبرو کې د هرې پرېکړې ملاتړ وکړي.
د ایران د جګپوړي چارواکي دغه څرګندونې دا په ګوته کوي چې تهران غواړي د لبنان جګړه نوره پای ته ورسوي چې د هغه لبناني متحد حزب الله ته یې سخت زیان رسولی دی.
د ایران د ستر مشر سلاکار علي لاریجاني بیروت ته د سفر پر مهال، په داسې حال کې چې هلته په خبرو اترو بوخت و، اسراییل د لبنان په پلازمینه کې د حزب الله تر کنټرول لاندې سیمو بمبارۍ ته دوام ورکاوه.
اسراییل په دې اونۍ کې د حزب الله تر کنټرول لاندې سویلي سیمو باندې هوایی بریدونه ګړندي کړي.
د لبنان دوو جګپوړو چارواکو رویټرز ته ویلي، چې په دغه هیواد کې د امریکا سفیرې د پنجشنبې په ورځ د لبنان د پارلمان مشر نبيح بیري ته د اوربند یوه طرحه وړاندې کړې، حزب الله په خبرو اتور کې د بیري د ښکیلتیا ملاتړ کوي.
سرچینو وویل، چې دا طرحه د واشنګټن لومړنی لیکل شوی وړاندیز و، چې لږترلږه په څو اونیو کې د خپل متحد اسراییل او د ایران له ملاتړه برخمن حزب الله ترمنځ جګړه ودروي. سرچینو د طرحې د منځپانګې په اړه معلومات نه دي ورکړي.
د فرانسې خبري اژانس ویلي، چې د لبنان په اړه د امریکا په پلان کې د ۶۰ ورځو اوربند شامل دی.
لاریجاني له بیري سره له کتنې وروسته خبریالانو ته وویل، بيري د اوربند په اړه هغه ته "ښه توضیحات" وړاندې کړي دي.
لاریجاني د یو خبریال د دې پوښتنې په ځواب کې چې بیروت ته د امریکا د پلان د شنډولو لپاره راغلی، وویل: «موږ د کوم څه د ورانولو په لټه کې نه یو.»
لاریجاني د اسراییل لومړي وزیر بنیامین نتنیاهو ته په اشارې سره وویل: «موږ د ستونزو د حل په لټه کې یوو. موږ په هر حالت کې د لبنان د حکومت ملاتړ کوو. هغه څوک چې ګډوډي کوي نتنیاهو او د هغه خلک دي.»
حزب الله په ۱۹۸۲ کال کې د ایران د سپاه پاسداران له خوا جوړ شو او د تهران له خوا تمویل کیږي.
یوه جګپوړي ډیپلوماټ چې نه یې غوښتل نوم یې واخیستل شي وویل، د اوربند لپاره نور وخت ته هم اړتیا شته او هغه هیله من دی چې د اوربند په اړه هوکره ترسره شي.
پر لبنان د اسراییل بریدونو شاو خوا یو میلیون خلک بې کوره کړي او پراخې سیمې یې ویجاړې کړي دي.
حزب الله په اسراییل خپل راکټي بریدونه جاري ساتلي او وسله وال یې په سویل کې له اسراییلي ځواکونو سره په جګړه بوخت دي.
د فرانسې خبري اژانس د لبنان د یو جګپوړي چارواکي له قوله ویلي، چې د لبنان حکومت په دغه هیواد کې د اوربند د رامنځ ته کولو لپاره د امریکا پر وړاندیز غور کوي.
دغه لبناني چارواکي د موضوع د حساسیت له امله د خپل نوم د پټ ساتلو غوښتنه کړې.
د هغه په وینا، په بیروت کې د امریکا سفیرې لیزا جانسن د پنجشنبې په ورځ (لرم ۲۴مه) له لبناني چارواکو سره د اوربند ۱۳ ماده ییز پلان شریک کړی دی.
د دغه پلان له مخې، به ۶۰ ورځنی اوربند رامنځ ته شي او په دې موده کې به د لبنان پوځ یو ځل بیا د اسراییلو په پولو کې ځای پر ځای شي.
اسراییلو تر اوسه د دې وړاندیز په اړه څه نه دي ویلي.
د پاکستان د لومړي وزیر په غوښتنه د اسلام اباد په ګډون د دغه هېواد په مختلفو ښارونو کې د جمعې له لمونځ وروسته د باران غوښتلو لپاره استثقا لمونځ وشو.
پاکستان کې دوامدارې وچکالۍ هوا لا ککړې چې له امله یوازې د دغه هېواد تر ټولو ستره صوبه پنجاب کې ۱۹ لکه کسان ناروغ شوي دي.
د دې صوبې په ملتان او لاهور کې بېړنی حالت اعلان او تر دریو ورځو ګرځبندیز دی.
پاکستان تېر کال د لاهور ځینې سیمو کې مصنوعي باران کړی و، خو سږ کال یې لومړي وزیر له عوامو وغوښتل چې نن د جمعې له لمانځه وروسته استثقا لمونځ وکړي.
د پاکستان دولتي رادیو وايي، په دې غوښتنه پسې نن د اسلام اباد په مشهور فیصل جومات کې خلکو دا لمونځ وکړ.
دې خلکو په خپله دوعا کې له الله غوښتي چې روانه وچکالي ختمه او باران سره د بدې هوا له امله د دوی زیانمن صحت جوړ کړي.
تر دې درې ورځې مخکې د ماشومانو لپاره د ملګرو ملتونو د ملاتړ صندوق (یونېسف) وویل، چې د ککړې هوا له امله په پاکستان کې ۱۱ مېلیونه ماشومان له ګواښ سره مخامخ دي او حکومت دې د دغه وضعیت مخه ونیسي.
د هوا د ککړتیا کچې په روانه اونۍ کې په لاهور او ملتان کې ریکارډونه مات کړي او د لسګونه ماشومانو په ګډون سلګونه ناروغان د ککړې هوا له کبله په روغتونونو کې بستري شوي دي.
په دغه صوبه کې د ککړې هوا له امله تېره اکتوبر میاشت تر ۱۹ لکو کسان ناروغ شوي دي.
د هوا ککړتیا له زیاتېدو سره تېره اونۍ پنجاب کې د پارک او ژوبڼ په ګډون ډېری عامه ځایونو ته پر تګ بندیز ولګېد.
تېره میاشت په دغه ښار کې د سخت لوګي له امله د ښوونځي ماشومان د راتلونکې جنورۍ تر پای په پرانیستي چاپېریال کې له لوبو او ورزش منع شول.
داعش د پاکستان د جماعت اسلامي د یوه مشهور سیاستوال صوفي حمید د وژنې پړه پر غاړه واخیسته. دغه مذهبي سياستوال پرون د پښتونخوا په باجوړ کې کې د وسله والو په ډزو کې ووژل شو.
د داعش خراسان څانګې نن د جمعې په ورځ «د لړم۲۵مه» په یوه خبرپاڼه کې چې په ټیلیګرام کې خپره کړې ده، د دغه برید مسوولیت منلی او د دغو بریدونو پر دوام یې ټینګار کړی دی.
داعش خراسان په افغانستان، پاکستان او د سیمې په نورو هېوادونو کې په پرله پسې ډول په سیاسي ګوندونو او حتا اسلامي ګوندونو او جریانونو باندې بریدونه کړي دي.
د ځايي پوليسو په وينا، د جماعت اسلامي ګوند سيمه ييز چارواكى صوفي حمید له جومات نه د وتلو په حال كې و، چې پر موټر سايكل سپرو دوو وسله والو پرې ډزې وكړې او ويې وواژه.
پولیسو دا هم ویلي چې برید کوونکي په تېښته بریالي شوي او پلټنې روانې دي.
ويل کيږي چې د سيمې ځينو اوسېدونکو هڅه وکړه، چې صوفي حمید روغتون ته ورسوي، خو په لاره کې يې ساه ورکړه.
د پاکستان په جنوب لوېدیځ کې د خیبر پښتونخوا او بلوچستان ایالتونو کې اسلامپالې او بېلتون غوښتونکې ډلې په پرله پسې ډول د پاکستان پر امنیتي ځواکونو او حکومتي چارواکو بریدونه کوي.
تحریک طالبان پاکستان یوه له هغو ډلو ده، چې د خیبر پښتونخوا امنیت یې ننګولی دی.
اسلام اباد تل افغان طالبان د تحریک طالبان طالبان سره په همکارۍ او دغې ډلې ته د پټنځایونو په برابرولو تورنوي.
پاکستاني چارواکي وايي، ټي ټي پي په افغانستان کې پوځي روزنه ترلاسه کړې او په کابل کې د طالبانو په څېر ایډیالوژي تعقیبوي.
افغان طالبانو تل د پاکستان دا ادعا رد کړې ده.
