د مقاومت جبهې نن ماښام د یوې خبرپاڼې په خبرولو سره ویلي، چې په کندز ولایت کې یې د طالبانو د استخباراتو د عمومي مدیریت پر قرارګاه یې برید کړی. د دغې جبهې په وینا، په دې برید کې درې طالبان وژل شوي او دوه نور ټپيان دي.
د خبرپاڼې له مخې، په دې پېښه کې د مقاومت جبهې جنګیالیو ته کوم زیان نه دی اوښتی.
طالبانو بیا تر اوسه د دې برید په تړاو څه نه دي ویلي.
د یادولو ده، چې په دې وروستیو کې د هېواد په بېلابېلو برخو کې د طالبانو پروړاندې د مقاومت او ازادۍ جبهو بریدونه زیات شوي دي.
دا په داسې حال کې ده، چې طالبانو بیا په تېرو درېیو کلونو کې له مقاومت جبهې سره د همکارۍ په تور سلګونه کسان نیولي دي او د راپورونو له مخې نیول شوي کسان د یادې ډلې له خوا سخت شکنجه شوي هم دي.
افغانستان انټرنشنل تېره ورځ د یو شمېر باوري سرچینو له قوله راپور ورکړ، چې طالبانو د افغانستان د مقاومت جبهې سره د همکارۍ په تور سلګونه بندیان د بګرام زندان ته لېږدولي دي.
لږ تر لږه درېیو سرچینو تایید کړې چې ډېری دغه بندیان د پنجشیر، پروان، کاپیسا، بغلان، تخار او د افغانستان له نورو شمالي سیمو دي.
سرچينو زياته کړې، چې ډېرى بنديان له پلچرخي زندان څخه بګرام ته لېږدول شوي دي.
تر اوسه د دغو بندیانو شمېر معلوم نه دی او طالبانو هم بګرام ته د بندیانو د لېږد په اړه څه نه دي ویلي.
