د تاجکستان او افغانستان پر پوله په وسله وال برید کې یو چینایي وګړی ووژل شو
سیمه ییزو سرچینو رسنیو ته ویلي، چې د تاجکستان او افغانستان پر پوله یو شمېر وسله والو پر چینایي کاریګرو برید کړی، چې له امله یې یو چینایي وګړی وژل شوی دی.
سیمه ییزو سرچینو رسنیو ته ویلي، چې د تاجکستان او افغانستان پر پوله یو شمېر وسله والو پر چینایي کاریګرو برید کړی، چې له امله یې یو چینایي وګړی وژل شوی دی.
دغه برید چې د تاجکستان د ختلان ولایت د زربوز درې په شمس الدین شهین ناحیه کې شوی، په کې څلور چینایي کاریګر او یو تاجکستاني وګړی ټپيان شوي هم دي.
د باخبره سرچینو په خبره، دا پېښه د لړم په ۲۷مه او ۲۸مه شوې ده.
د بریدګرو اصلي موخه هغه چینایي کاریګر و، چې په دې سیمه کې د سرو زرو په کان کې په کار بوخت و.
یوې سیمه ییزې سرچینې یاني شفق خبري وېبسایټ ته ویلي: «ټول قربانیان د شمس الدین شهین ناحیې یو روغتون ته لېږدول شوي دي او د پېښې د څېړلو په موخه امنیتي ځواکونه هم په سیمه کې دي.»
ویل کېږي، چې بریدګر د افغانستان له خاورې د تاجکستان خاورې ته ننوتلي او چینایي کاریګران یې په نښه کړي دي.
تر اوسه روښانه نه ده، چې دا برید د نشه یي توکو د قاچاق وړونکو او یا د اسلامپالو جنګیالیو له خوا شوی دی.
د تاجکستان حکومت تر اوسه د دغې پېښې په اړه په رسمي توګه څه نه دي ویلي.
دا پېښه کولی شي، چې د مرکزي اسیا په هېوادونو کې د ترهګرو ډلو د نفوذ په اړه اندېښنې زیاتې کړي.
دا په داسې حال کې ده، چې تر دې وړاندې بلوڅ ځواکونو په پاکستان کې پر چینایي انجنیرانو خونړی برید کړی و.
تاجکستان بیا په وار - وار د افغانستان په پولو کې د امنیتي وضعیت په اړه اندېښنه څرګنده کړې ده او له شانګهای سازمان او د جمعي امنیت تړون څخه یې غوښتي، چې په دې پوله کې امنیتي تابیاوې پیاوړې کړي.
پر افغانستان د طالبانو له بیا واکمنېدو وروسته تاجکستان په پوله کې امنیتي اقدامات زیات کړي او په دې سیمه کې یې ډېر امنیتي ځواکونه مېشت کړي دي.
د تاجکستان لپاره تر ټولو جدي ګواښ د انصارالله ډله ده، چې د افغانستان په شمال ختیځ په ځانګړې توګه په بدخشان کې مېشته ده.
دا ډله چې له طالبانو سره متحده ده، د تاجکستان د ولسمشر امام علي رحمان له مخالفانو څخه شمېرل کېږي.
