جرمني کې دوه افغانان د یوې ۱۴ کلنې جینۍ د ځورونې په تور نیول شوي
د جرمني په بایرن ایالت کې پولیسو دوه افغانان له دې امله نیولي، چې له یوې ۱۴کلنې جینۍ نه یې «مچکه اخستې او په غېږ کې یې نیولې ده».
د جرمني په بایرن ایالت کې پولیسو دوه افغانان له دې امله نیولي، چې له یوې ۱۴کلنې جینۍ نه یې «مچکه اخستې او په غېږ کې یې نیولې ده».
د جرمني دوو سیمه ییزو رسنیو دوناوکورییر او ریګیونال رپورټرز خبر ورکړی چې دوو ۲۰ او ۲۶ کلنو نارینه وو، چې افغانان ګڼل شوي، د دوشنبې په ماښام په ایښسټېټ ښارګوټي کې د تېلو پمپ سره له یوې جینۍ مچکه اخستې او په غیږ کې یې نیولې ده.
یادې رسنۍ وايي چې دواړه له دې جنسي ځورونې وروسته د ایښسټېټ د اورګاډو تمځي ته لاړل او له پولیسو سره یې هم د نیولو پرمهال لاس اچولی.
پولیسو دواړه پرځمکه څملولي، خو د لاسونو له تړل کېدو وروسته هم لا یو تن مقاومت کړی دی.
سرچینه وايي، چې د نوموړو د نیولو پرمهال دوه پولیس هم برسېرن ټپیان شوي.
پولیس وايي چې تورنو کسانو د جینۍ د رضایت خلاف د نوموړې غومبوری ښکل کړی او په غېږ کې یې نیولې ده.
دغه دواړه افغانان د پلټنو لپاره د اینګولشټاټ څارنوالۍ ته لېږدول شوي دي.
د نیول شویو افغانانو په اړه نور جزئیات نه دي خپاره شوي.
د طالبانو د رییس الوزرا اقتصادي مرستیال ملا برادر د هند او بنګله دېش له یو شمېر دینيعالمانو سره ناسته کې ویلي چې دوی هڅه کړې اسلام په په سمه بڼه خلکو ته ورسوي او په همدې موخه یې مدرسې تقویه کړې او په ښوونیز نصاب کې یې پاموړ اصلاحات راوستي دي.
برادر د هند او بنګله دیش له یو شمېر دیني عالمانو سره د سه شنبې په ورځ په خپل کاري دفتر کې کتلي دي.
د طالبانو په واک کې ارګ وايي، په دې ناسته کې ملابرادر وویل، چې دوی هڅه کړې اسلام په په سمه بڼه خلکو ته ورسوي او په همدې موخه یې مدرسې تقویه کړې او په ښوونیز نصاب کې یې د پام وړ اصلاحات راوستي دي.
طالبانو د مدرسو د تقویې ترڅنګ له شپږم ټولګي پورته نجونو پرمخ ښوونځي او پوهنتونونه بند کړي دي.
ملا برادر وايي، چې ددوی حکومت لویې اقتصادي پروژې پيل کړې او له ګاونډیو، سیمې او نړۍ له هېوادونو سره یې سوداګري پراخه شوې ده. هغه زیاته کړې، چې د صنعت په سکټور کې د پخوا په پرتله پرمختګ شوی او پر ځان متکي او له بهرنیو مرستو پرته اقتصاد ته یې زمینه برابره کړې ده.
رپوټونه وايي، دې ډلې ته هره اونۍ د ۴۰ میلیونو ډالرو په کچه د امریکا مرستې ور رسیږي او د قطر دفتر لګښتونه یې هم واشنګټن ور کوي.
د طالبانو ارګ وايي، چې ملابرادر په دې ناسته کې وویل، « د افغانستان د ملي شتمنۍ کنګل کېدل او اقتصادي بندیزونه هغه ستونزې دي چې د افغانستان اقتصادي وده یې ټکنۍ کړې ده».
د هند او بنګله دېش هېوادونو دغه دیني عالمان داسې مهال کابل ته سفر کوي، چې د نړۍ ګڼو دیني عالمانو پر طالبانو د نجونو ښوونځیو د تړلو له امله نیوکې کړې او له اسلام نه یې ددې ډلې تفسیر ناسم ګڼلی دی.
پاکستاني رسنیو خبر ورکړی چې اسلام اباد د افغانستان په چارو کې د چین له ځانګړي استازي سره په افغانستان کې د پاکستاني طالبانو او نورو ډلو د پټنځایونو په اړه "قناعت وړ شواهد" شریک کړي. یو شایو یونګ تېره ورځ په اسلام اباد کې د پاکستان د بهرنيو چارو وزارت له چارواکو سره خبرې وکړې.
د ایکسپرېس ټرېبیون د راپور له مخې، پاکستاني چارواکو یو شایو یونګ ته د تحریک طالبان پاکستان او ورسره تړلو ډلو له خوا د افغانستان د خاورې د کارولو په اړه معلومات ورکړي دي.
په دې معلوماتو کې نوي شواهد هم شامل دي چې څنګه د طالبانو تر واک لاندې افغانستان د سیمې سوله او ثبات ګواښي.
د افغانستان لپاره د چین ځانګړی استازی داسې مهال پاکستان ته لاړ، چې د افغانستان لپاره د روسیې ځانګړی استازی ضمیر کابلوف هم د افغانستان د وروستیو پرمختګونو په تړاو د خبرو په موخه اسلام اباد ته تللی و.
د پاکستان د بهرنیو چارو وزارت له خوا په خپره شوې خبرپاڼه کې ویل شوي، چې د چین ځانګړي استازي د دغه هېواد د بهرنیو چارو وزارت له مرستیالې امنه بلوچ سره وکتل.
په خبرپاڼه کې راغلي، چې نوموړي د افغانستان او لوېدیزې اسیا په چارو کې د پاکستان د بهرنیو چارو وزارت له مرستیال احمد نسیم وړایچ سره هم مفصلې خبرې کړې دي.
د یاد دهېواد د بهرنیو چارو وزارت په خبرپاڼه کې راغلي: «دواړو لورو له افغانستان سره د اړیکو په اړه نظرونه سره شریک کړل.دوی د یوه سوله ییز او باثباته افغانستان لپاره د ګاونډیو هېوادونو پر حیاتي رول ټینګار وکړ.»
د ایکسپرېس ټریبیون د راپور له مخې، سرچینو ویلي چې پاکستان د چین استازي ته د افغانستان د اوسني وضعیت او د تحریک طالبان پاکستان او نورو ډلو له خوا د افغان خاورې د کارولو د څرنګتیا په اړه معلومات ورکړل.
سرچینو وویل چې په اسلام اباد کې چارواکو له چینايي ډېپلوماټانو سره د افغانستان په خاوره کې د ترهګریزو ډلو د پټنځایونو په اړه چې د پاکستان د امنیت لپاره ګواښ دي، قناعت وړ شواهد شریک کړي دي.
له دې وړاندې هم پاکستان ویلي و، چې په افغاکستان کې واکمن طالبان ددغه هېواد مخالفو وسله والو ته پټنځایونه ورکړي او ځینې طالبان په پاکستان کې له ټي ټي پي سره په بریدونو کې مرسته کوي.
افغان طالبانو په وار وار دغه تورونه رد کړي او ویلي یې دي چې هیڅ ډلې ته اجازه نه ورکوي چې د افغانستان خاوره د کوم بل هېواد پرضد وکاروي.
د پنجشېر لپاره د طالبانو د والي دفتر وايي، نن یې په دغه ولایت کې د درې لکه، ۵ زره ۹۱۰ امریکايي ډالرو په ارزښت ۶۰۰۹ کیراته زمرود په بولۍ کې وپلورل.
د دې دفتر د اعلامیې له مخې، په دې بولۍ کې پر افغانانو سربېره امریکايي پانګوالو هم ګډون درلود او «دا زمرود پکې په په لوړه بیه وپلورل شول .»
د طالبانو د کانونو او پټرولیم وزارت وايي ، په پنجشېر کې د زمردو ۱۷۰۰ کانونه پېژندل شوي چې له دې ډلې ۴۵۰ یې د ملاهبت الله په ځانګړي فرمان د دغه ولایت خلکو ته ورکړل شوي او استخراج یې روان دی.
د پنجشېر لپاره د طالبان والي محمد اغا حکیم په نننۍ بولۍ کې ویلي، چې د زمردو په دغه ډول ازاد پلور سره په پنجشېر که خلکو ته کاري زمینې برابرې او د سوداګرۍ نوې لړۍ پيل شوې ده.
طالبان وايي، د روان کال په لومړیو شپږو میاشتو کې یې په ۱۱ پړاونو کې ۳۵ زره او ۸۷۴ قیراطه زمرد د یو میلیون او ۶۱۴ زره ډالرو په ارزښت پلورلي دي.
تر هغه وروسته هم دې ډلې دا زمرود پلورلي، خو نیوکه پرې دا ده چې د زمرودو او نورو ګرانبیه ډبرو له پلور د تر لاسه شوي عاید حساب له ملت سره نه شریکوي.
د کابل ـ کندهار لویې لارې ځینو موټر چلوونکو افغانستان انټرنشنل ته وویل چې د سرک جوړونې، ټرانسپورټ او حقالعبور ترڅنګ په بېلابېلو نومونو څو ځایه پیسې اخېستل کېږي. موټرچلوونکي وايي، څو ځله یې د طالبانو مسوولانو ته شکایت کړی خو تر اوسه یې د مخنیوي لپاره کوم عملي اقدام نه دی شوی.
د کابل ـ کندهار لویې لارې ځینو موټر چلوونکو نن سې شنبه «د لړم۲۹مه» وویل چې طالبان د کابل له دروازې پیل تر کندهاره پورې څو ځایه له سوداګریزو او وړو مساپر وړونکو موټرو پیسې اخلي.
دغو موټر چلوونکو افغانستان انټرنشنل ته وویل، چې د جمهوریت له پرځېدو وروسته د کابل -کندهار لویې لارې تر منځ اسانتیاوې رامنځته شوې وې او باج اخیستل پای ته رسېدلي وو، خو د طالبانو له یو کلنې واکمنۍ وروسته په لویو لارو کې باج اخیستل یو ځل بیا پیل شوي دي.
د کابل- کندهار لویې لارې یو موټرچلوونکی وايي:« د وردګو، غزني او کندهار په حدودو کې په ساده جامو کې ولاړ وي او وسلې ورسره وي، په زوره له موټر چلوونکو پیسې ټولوي»
ځینې موټر چلوونکي وايی چې د سرک جوړونې، ټرانسپورټ او حق العبور په نامه پیسې یو ځل ورکول کېږی او رسیدونه هم ترلاسه کوي خو په وروستیو کې د میدان وردګو-غزني او غزني -کندهار ترمنځ څو چیک پواینټونه جوړ شوي او له رسیدونو ورکولو پرته پیسې اخلي.
د سوداګریزو توکو بار وړونکو موټرو ځیني ډرېوران وايي، له رسمي ځایونو پرته، چې دوی د رسید په اساس پیسې ورکوي، د میدان وردګ، غزني او کندهار په بېلابېلو سیمو کې وسله وال طالبان له زرو افغانیو نیولې تر درې زره افغانۍ پیسې غواړي.
په کابل کې د کندهار اډې ځینې ټرانسپورټي کمپنۍ وايي، چې یوازې په سوداګریزو توکو بار موټر له دې ستونزې سره مخ نه دي بلکې په دې وروستیو کې واړه مساپر وړونکي موټر هم له ورته وضعیت څخه شکایت کوي.
یو کرولا موټر چلوونکی وايي، چې یو خوا خراب اقتصادي حالت او بل خوا په لویو لارو کې په بېلابېلو نومونو باج اخیستلو د دوی ژوند سخت کړی او دومره ګټي چې بېرته یې په چیک پواینټونو کې ورکړي .
دغه موټرچلوونکی زیاتوي، « موږ د دولت مالیې د ورکړې توان نه لرو او د خپلسري باج له ورکولو ښه ده، چې له دې کاره لاس په سر شو.»
د کابل- کندهار لویې لارې موټرچلوونکي د طالبانو له چارواکو غواړی چې پر دې لاره شته خپلسریو او باج اخیستو مخه ونیسي.
د پخواني ولسمشر لومړي مرستیال امرالله صالح له طالبانو سره د هند اړیکو ته په اشارې نوي ډیلي ته خبرداری ورکړی، چې د افغانانو په منځ کې دې خپل محبوبیت له خطر سره نه مخامخ کوي.
صالح له یوې هندي رسنۍ سره په مرکه کې ویلي، چې هند له افغانستان سره خپله دوستي بایللې ده.
دا څرګندونې په داسې حال کې کېږي، چې هند له طالبانو سره د خپلو اړیکو د عادي کولو په حال کې دی.
دغه هېواد په کابل کې د خپل سفارت ځينې برخې بېرته پرانېستې او د ممبۍ په کونسلګرۍ کې يې د طالبانو استازي منلي دي.
په هند کې پخواني افغان ډيپلوماتان د طالبانو د فشار له امله دغه هېواد پرېښی دی.
په همدې حال کې ډیلي په افغانستان کې له خپلو پخوانیو متحدینو سره ټولې اړیکې پرې کړې دي.
ځینې سرچینې وايي، چې نوي ډیلي حتی د ملي مقاومت جبهې غړو او پخوانیو سیاسي مشرانو ته هم ویزې نه دي ورکړي.
امرالله صالح د پرېنټ هندي ورځپاڼې سره په مرکه کې ټینګار کړی، چې هند باید ځان له طالبانو لرې وساتي او که غواړي له دې ډلې سره تعامل وکړي؛ نو باید د افغان ټولنې له بېلابېلو برخو سره یې په اړه سلا مشورې وکړي.
ښاغلي صالح وویل: «طالبان باید هند ته لارښوونه ونه کړي چې له چا سره خبرې وکړي، چېرته پانګونه وکړي او چا ته ویزې ورکړي او که نه.»
نوموړي زیاته کړه:« هند باید هغه انځور وساتي، چې د تېرو ۷۰ کلونو او زرګونو کلونو راهیسې یې د خلکو تر منځ ساتلی دی. هند باید یوازې له طالبانو سره په تعامل کې خپل شهرت او حیثیت له خطر سره مخامخ نه کړي.»
صالح څرګنده کړه، چې له طالبانو سره د نوي ډیلي تعامل به خامخا د پاکستان چلند ته ورته وي.
صالح همداراز وویل، چې هند باید متوازن چلند خپل کړي او د افغانانو په منځ کې د لسګونو کلونو مخکې خپل د ښه نیت انځور ژوندی وساتي.
د افغانستان د پخواني ولسمشر مرستیال زیاته کړه، چې له طالبانو سره د هند د ښکېلتیا تر شا په واقعیت پوهېږي؛ خو له طالبانو سره ښکېلتیا ته باید د تېرو ۷۰ کلونو او یا د طالبانو له ظهور څخه د زرګونو کلونو د دوام په سترګه ونه کتل شي.
هغه وويل:« دا زموږ په تاريخ کې يو ډېر غير معمولي څپرکی دی.»
امرالله صالح په افغانستان کې د خپلې دندې پر مهال له نوي ډیلي سره نږدې اړیکې پاللې.
څومره چې دی هند ته نږدې و، په هم هغه کچه یې پاکستان سره اړیکي خړ پړ و.
خو له طالبانو سره د هند د اړیکو د نږدې والي په اړه د صالح له څرګندونو داسې ښکاري، چې نوموړی په دې اړه اندېښنه لري.
واک ته د طالبانو له رسېدو وروسته هند افغانانو ته د ویزو ورکول بند کړل؛ خو طالبانو له نوي ډیلي څخه غوښتي، چې د ویزو ورکول بیا له سره پیل کړي.
د هند په بهرنیو چارو وزارت کې د افغانستان، پاکستان او ایران د څانګو مشر جي پي سېنګ په دې وروستیو کې کابل ته سفر کړی او د دغې ډلې د بهرنیو او دفاع وزیرانو په ګډون یې له طالب چارواکو سره کتلي دي.