کونړ: په خپلمنځي شخړه کې د یوې نجلۍ په ګډون ۲ تنه وژل شوي او ۳ نور ټپیان دي
د کونړ ولایت په وټه پور ولسوالۍ کې په خپلمنخي شخړه کې د یوې اته کلنې نجلۍ په ګډون ۲ تنه وژل شوي او ۳ نور ټپیان دي.
د کونړ ولایت په وټه پور ولسوالۍ کې په خپلمنخي شخړه کې د یوې اته کلنې نجلۍ په ګډون ۲ تنه وژل شوي او ۳ نور ټپیان دي.
یوې سرچینې افغانستان انټرنشنل - پښتو ته وویل، چې شخړه د ځمکې پر سر په کرونګ سیمه کې د لسو وروڼو ترمنځ شوې ده.
سرچینه زیاتوي، چې یاد شمېر کسان د دوو میندو اولادونه دي، چې ۹ زامن د یوې مور دي او یو بل یې بیا د بلې مور دی.
د سرچینې په وینا، دوه ټپيان د همدې کورنۍ ګاونډیان دي چې غوښتل یې د دوی ترمنځ شخړه هواره کړي.
سرچینې د طالبانو له قوله زیاته کړې، چې د پېښې عاملین نیول شوي خو یادې ډلې نور جزیات نه دي ورکړي.
دا په داسې حال کې ده، چې د هېواد په بېلابېلو سیمو کې د کورنیو ترمنځ شخړې او دوښمنۍ د ځمکو د وېش، څرځایونو، ځنګلونو، د اوبو د وېش، میراث او نورو مسایلو پر سر رامنځته کېږي.
دغه شخړې تل له وړو لفظي شخړو پیلېږي او په اوږدو او خونړیو دوښمنیو اوړي.
اوس چې په افغانستان کې د طالبانو نظام کوم مشروعیت نه لري، یو شمېر هېوادوال د جرګو له لارې د شخړو پر حل ټینګار کوي.
د طالبانو بهرنیو چارو وزارت د يکشنبې په ورځ په يوه اعلاميه کې ويلي، چې اميرخان متقي او د افغانستان لپاره د روسیې ولسمشر ځانګړي استازي ضمیر کابلوف په کابل کې پر اقتصادي همکاريو، پانګونې، ټرانزيټ او د دوه اړخيزو اړيکو پر زياتېدو خبرې کړې.
طالبانو د ضمير کابلوف له قوله ليکلي چې مسکو په پام کې لري په نږدې راتلونکي کې د روسیې یو لوړپوړی پلاوی کابل ته راشي او د طالبانو له جګپوړو چارواکو سره د لوړې کچې خبرې اترې ولري.
په اعلاميه کې راغلي، چې اميرخان متقي هم د افغانستان او روسيې ترمنځ په لوړه کچه د پلاویو تګ راتګ مهم بللی او د اقتصادي همکاريو او سوداګرۍ پر پراختيا یې ټينګار کړی دی.
پرون شنبه د افغانستان لپاره د چين استازي د پاکستان له سفر وروسته له ملا کبير او ملا یعقوب سره ليدنه کې د افغانستان، پاکستان او چين ترمنځ د اړيکو پر څرنګتیا خبرې وکړې.
د یو شایو یونګ له سفر وروسته پاکستاني رسنیو وویل، چې اسلام اباد له چین سره په افغانستان کې د ترهګرو د شتون په تړاو «قناعت وړ شواهد» شریک کړي.
د افغانستان لپاره د چین او روسیې ځانګړي استازي اسلام اباد ته له سفر وروسته کابل ته راغلي دي.
په ننګرهار کې د طالبانو سرچینو نن یکشنبه «د لیندۍ ۴مه» افغانستان انټرنشنل ته وویل چې د ننګرهار زندان لپاره د طالبانو ګوښه شوي رییس مولوي مقتدا له یوې ځوانې بندي نجلۍ سره، چې له پاکستان څخه له یوه ځوان سره راتښتېدلې وه، په زور نکاح کړې ده.
سرچینې وايي، مولوي مقتدا نیول شوی ځوان ددې موضوع د غلي کولو لپاره له زندان نه خوشی کړی خو نجلۍ یې ځان ته نکاح کړې او په جلال اباد ښار کې یې یو کور په کرایه ورته نیولی دی.
افغانستان انټرنشنل ته د را رسېدلو معلوماتو له مخې، طالبانو مولوي مقتدا له دې نجلۍ سره په زور د نکاح کولو له امله یوازې له خپلې دندې ګوښه کړی دی.
د نوموړي په اړه کوم رسمي شکایت نه دی شوی، له همدې امله تر دې دمه طالبانو کومې محکمې ته نه دی معرفی کړی.
د طالبانو تر واک لاندې د زندانونو چارو د سمون ادارې نن یکشنبه د لیندۍ پر څلورمه د یوې خبرپاڼې په خپرولو سره وویل چې سهیل سعید یې د ننګرهار زندان د نوي رییس په توګه ټاکلی دی.
یادې ادارې د د زندان د ګوښه شوي رییس تېرې کړنې ستایلې دي او د زندان له کارکوونکو یې غوښتنه کړې چې له نوي رییس سره همکاري وکړي.
سرچینې وايي چې طالبانو د ننګرهار زندان ګوښه شوی رییس په کور کښېنولی دی.
د طالبانو د امربالمعروف او نهی عن المنکر وزارت ویاند د روان کال د لړم پر۱۷مه په یوه خپاره شوي غږیز پیغام کې ویلي و، چې خلکو ته یې د «حقوق الله او حقوق العباد» په اړه عامه پوهاوی ورکړی او د جبري نکاح د پنځه زره پېښو مخنیوی یې کړی دی.
د طالبانو د مشر ملاهبت الله له خوا صادر شوي د امربالمعروف قانون کې په زوره نکاح کول جرم بلل شوی او دا کار یې له اسلام سره په ټکر کې بللی دی.
شنونکي پر طالبانو نیوکه کوي چې شریعت او قوانین یوازې پر عامو خلکو پلي کوي خو خپل مجرم غړي نه محاکمه کوي او هڅه کوي جرمونه یې پټ وساتي.
طالبانو تر دې دمه د ننګرهار زندان د ګوښه شوي رییس مولوي مقتدا د نیولو او یا هم د محاکمې په اړه څه نه دي ویلي.
