د پاکستان لومړی وزیر شهباز شریف په اسلام اباد کې د وروستیو ناخوالو په غبرګون وایي: «څوک چې پاکستان ته زیان رسوي لاسونه یې پرې ماتوو.» نوموړي د چهارشنبې په ورځ د کابینې په ناسته کې زیاته کړه، چې په سیاست کې هېڅ ډول فتنې ته ځای نه شته.
شریف پرته له دې چې د چا نوم واخلي په دې ناسته کې وویل: «د خپل شخصي ګټو لپاره ملت ته زیان رسول تر ټولو لوی جرم دی. دا تحریک نه بلکې تخریب دی، فساد دی او په سیاست کې د فساد هېڅ ځای نه شته.»
شریف دغه راز د بازارونو بندېدو او د سوداګرۍ ځنډېدو ته په اشارې سره وویل، که څه هم رامنځته شوی فساد بالاخره پایته ورسېده، خو د سختو اقتصادي زیانونو لامل شو.
د لاریونونو له پیل راهیسې اسلام اباد ته ټولې غځېدلې لارې بندې وې، بازارونه بند و او همداراز له افغانستان سره هم سوداګري ځنډېدلې وه.
د پاکستان لومړی وزیر وایي؛ «له ۲۰۱۴ کال څخه مخکې په اسلام اباد کې د یرغل تصور هم نه کېده، ځکه خلکو به لاریونونه په خپلو ښارونو کې کول.»
د شریف په خبره: «په اسلام اباد کې لاریونونه د اېس سي او غونډې له جوړېدو سره هممهاله پیل شول او ورته پېښه په ۲۰۱۴ کال کې هم تر هغه وروسته وشوه، چې د چین ولسمشر غوښتل پاکستان ته سفر وکړي، خو د ۱۲۶ ورځینیو لاریونونو او ناخوالو له امله د هغه سفر وځنډېډ.»
شهباز شریف وایي، چې د پاکستان پوځ تر هغه وروسته د امنیت مسوولیت پر غاړه واخیسته، چې د غونډې ګډون کوونکو ته اندېښنه پیدا شوه، چې دې هېواد ته سفر وکړي او که نه.
د پاکستان لومړی وزیر شهباز شریف همداراز زیاتوي، چې د یوې پرېکړې له مخې تر دې وروسته هېڅ یوې ګډوډۍ ته فرصت نه ورکوي.
نوموړي پاکستان ته د بلاروس د ولسمشر وروستي سفر ته هم اشاره وکړه او ویې ویل: «په جنورۍ کې به د پاکستان او بلاروس ترمنځ تړونونه وشي. دلته پرېکړې روانې وې، هلته د جګړې فضا وه او لاریون کوونکي له وسلو سره راغلي وو.»
شریف په خپلو خبرو کې د اسلام اباد او سند له پولیسو او رینجرز څخه د وضعیت د کابو کولو په برخه کې مننه وکړه او په خیبر پښتونخوا په ځانګړې توګه د کورمې ولسوالۍ او پاړه چنار وروستیو پېښو ته یې په اشارې سره وویل، چې د یادو سیمو سمول په کار و.
له تېرو څو ورځو را په دې خوا د پاکستان د تحریک انصاف ګوند پلویانو د دغه ګوند د مشر او پخواني لومړي وزیر عمران خان د خوشې کولو لپاره لاریونونه پیل کړي و، چې نن پایته ورسېدل.
دا په داسې حال کې ده، چې د اسلام اباد د پولیسو مشر علي ناصر رضوي بیا ویلي، چې په اسلام اباد کې د پي ټي ای په لاریونونو کې د ۳۷ افغانانو په ګډون ۹۵۴ کسان نیول شوي، چې ۲۰۰ وسایل او ۳۹ وسلې یې ترې تر لاسه کړې دي.
د تحریک انصاف د احتجاج له ختمېدو وروسته په پلازمينې اسلام اباد کې وضعیت عادي حالت ته راګرځېدلی دی.
د تحريک انصاف د احتجاج پرمهال د تېرو څلورو ورځو راهیسې تړل شوې لویې لارې بېرته د تګ راتګ لپاره پرانستل شوې.
