طالبان: له دوو ګاونډیو هېوادونو څخه په یوه ورځ له ۱۷۰ څخه ډېرې کورنۍ راستنې شوې
له ګاونډیو هېوادونو څخه د افغان کډوالو د راستنېدو په دوام د طالبانو تر واک لاندې باختر اژانس وايي، تېره ورځ له پاکستان او ایرانه ۱۷۴ کورنۍ راستنې شوې دي.
له ګاونډیو هېوادونو څخه د افغان کډوالو د راستنېدو په دوام د طالبانو تر واک لاندې باختر اژانس وايي، تېره ورځ له پاکستان او ایرانه ۱۷۴ کورنۍ راستنې شوې دي.
دغه اژانس د پنجشنبې په ورځ د (لېندۍ ۷مه) پر اېکس پاڼه لیکلي، چې تېره ورځ ۱۷ کورنۍ د ننګرهار د تورخم له لارې او ۵ کورنۍ د کندهار د سپین بولدک له لارې له پاکستانه او ۶۰ کورنۍ د نیمروز ولایت د ورېښمو پله او ۹۲ کورنۍ د هرات د اسلام کلا له لارې له ایرانه راستنې شوې دي.
باختر د طالبانو د کډوالو وزارت په حواله لیکلي، چې ۱۷۰ تازه راستو شویو کډوالو سره د لومړنیو مرستو تر څنګ، یو شمېر کورنۍ یې خپلو اصلي سیمو ته لېږدولې دي.
طالبانو ویلي، چې په تېره یوه میاشت کې یوازې د کندهار د سپین بولدک له لارې ۷۲۷ کورنۍ له پاکستانه هېواد ته ستنې شوې دي.
بل خوا تېره ورځ ایراني چارواکو ویلي، چې د روان کال تر پایه به له دو مېلیونو ډېر بې اسناده افغان کډوال بېرته افغانستان ته ولېږي.
په مشهد کې د ایران د بهرنیو چارو د وزارت د استازي د دفتر مشر ویلي، چې دمګړی په ایران کې له دوو څخه تر دوه نیم مېلیونو پورې افغان کډوال د اوسېدو له اسنادو پرته ژوند کوي.
د ایران د بهرنیو چارو وزارت خبرداری ورکړی، که دغه افغان کډوال په خپله خوښه له ایرانه ونه وځي، په زور به له هغه هېواده و اېستل شي.
