د پاکستان د پارلمان پخوانی غړی او د ملي ډیموکراتیک غورځنګ مشر محسن داوړ د پاکستان د کورنیو چارو وزیر محسن نقوي وروستیو څرګندونو ته په غبرګون کې ویلي، چې د پي ټي ای په پلمه د افغان کډوالو ځورولو او هغوی ته له اسلام اباده د وتلو ضرب الاجل ټاکل له نړۍوالو قوانینو ښکاره سرغړونه ده.
د پاکستان د کورنيو چارو وزير محسن نقوي تېره ورځ چهارشنبه په پلازمېنه اسلام اباد کې د وروستيو سیاسي ناکراریو او ناامنيو په اړه یوه خبري کنفرانس کې ويلي، چې د ډیسمبر مياشتې ترپايه باید هغه افغانان چې په اسلام اباد کې د اوسېدو اجازه تر لاسه کړي او له هغې پرته به له دغه ښاره وایستل شي.
محسن داوړ نیوکه کوي او وايي چې په «پاکستان کې د افغان کډوالو په نښه کول او وهل ټکول او یا په زوره کوچېدل یو معمول ګرځېدلی چې دا د شرم وړ او له نړۍوالو قوانینو او کنوانسیونونو ښکاره سرغړونه ده.»
پنځه ورځې وړاندې د نومبر په ۲۴مه د پاکستان تحریک انصاف ګوند غړو او پلویانو د دغه ګوند د مشر او پخواني لومړي وزیر عمران خان د خوشې کولو لپاره له ټول پاکستان څخه خپل پلویان پلازمینې اسلام اباد ته د لاریون لپاره ور وبلل او حکومت یې د مخنیوي لپاره لویې لارې، حکومتي ادارې، کاروبار، ټیلیفوني شبکې او انټرنیټ بند کړل او لاریون د تاوتریخوالي له امله وپاشل شو.
په پاکستان کې له وروستيو پرله پسې لاريونونو، سیاسي ناکراریو او ناامنیو وروسته د دغه هېواد د کورنيو چارو وزير محسن نقوي رسنیو ته په خبرو کې وویل چې د پي ټي ای په وروستي لاریون کې یې نږدې زر تنه لاریونوال نیولي چې ۳۷ هغه یې افغانان دي.
هغه خبرداری ورکړ، چې د راتلونکې میاشتې تر پايه دې افغانان یا د پولیسو سره راجسټر شي او ییا دې له اسلام اباده ووځي.
په اسلام اباد کې مېشت افغان کډوال هم د پاکستان د کورنیو چارو وزیر وروستۍ څرګندونې او خبرداری خواشینونکی بولي او وايي، چې دوی په اسلام اباد کې د اوسېدو ټول قانوني اسناد لري او د پاکستان په سیاسي مسایلو کار نه لري.
د رحمت الله په نوم یو افغان کډوال افغانستان انټرنشنل پښتو ته وويل چې هغه او د ده په څېر نور افغانان اسلام اباد کې په قانوني ډول اوسیږي: «دا نا انصافي ده چې د پاکستان حکومت خپلمنځي مسلې افغانانو ته پلمه کوي، لاریونونه د دوی کورنۍ موضوع ده، افغانانو ته د پاکستان کورنیو چارو وزیر خبرداری د نړیوالو اصولو خلاف خبره ده، دوی باید په خپله دغسې ویناو ته بیا له سره کتنه وکړي.»
د فرشتې په نوم یوې بلې افغانې کډوالې د پاکستان د کورنیو چارو وزیر وروستیو څرګندونو ته چې ویلي یې دي، افغان کډوال دې د دغه وزارت له اجازه لیک پرته په اسلام اباد ښار کې نه اوسي وايي: «موږ قانوني وېزې لرو او د پاکستان د کورنیو چارو وزارت د پولیسو راجستریشن پاڼه هم لرو نو ولې اوس بیا له سره یو بل د اوسیدو سند جوړ کړو، په راجستریش پاڼه کې زموږ ټول معلومات لیکل شوي او قانوني بڼه هم لري.»
د پاکستان د کورنیو چارو وزیر دغه خبرداری چې په یوه خبري کنفرانس کې یې اعلان کړ، تر اوسه پورې یې ټول جزیات نه دي خپاره شوي چې هدف یې په اسلام اباد کې کوم ډول افغان کډوال دي. هغه کډوال چې په موقت ډول پاکستان کې بهر ته د تلو په تمه اوسیږي او که له پخوا په دغه ښار کې کډوال شويدي.
