په پاکستان کې د پولیو درې نوې مثبتې پېښې ثبتې شوې دي
په پاکستان کې د پولیو درې نوې مثبتې پېښې ثبتې شوې، چې له دې سره په روان کال کې د پولیو د مثبتو پېښو شمېر ۵۹ ته لوړ شو.
په پاکستان کې د پولیو درې نوې مثبتې پېښې ثبتې شوې، چې له دې سره په روان کال کې د پولیو د مثبتو پېښو شمېر ۵۹ ته لوړ شو.
په پاکستان کې روغتیایي ادارې وایي، چې د پولیو دغه نوې پېښې په ډېره اسماعیل خان، د کراچۍ د کیمري ولسوالۍ او کشمور څخه راپور شوې دي.
په روان کال کې له ډېره اسماعيل خان څخه تر دې مهاله د پوليو اته پېښې راپور شوې، د کراچۍ په کيمري ولسوالۍ کې د پوليو درې پېښې ثبتې شوې او په کشمور کې دا د روان کال د پوليو لومړۍ پېښه ده، چې ثبته شوه.
د دغو ۵۹ پېښو له ډلې په روان کال کې په بلوچستان کې د پولیو ۲۶، په خیبر پښتونخوا کې ۱۶، په سند کې ۱۵ او په پنجاب او اسلام اباد کې بیا د پولیو یوه، یوه پېښه راپور شوې ده.
په پاکستان کې د پولیو وروستۍ پېښه (د لېندۍ په ۸ مه) په خیبرپښتوا کې ثبته شوې وه.
روغتیایي چارواکي د دغې د مخنیوي وړ ناروغۍ د خپرېدو د ورکولو لپاره د واکسین کمپاین پر اهمیت ټینګار کوي، چې په پاکستان کې د عامې روغتیا د برخې لپاره یوه لویه ننګونه شمېرل کیږي.
پاکستان یو له هغو دوو هېوادونو څخه دی، چې د پولیو ویروس په کې لا تر اوسه له منځه نه دی تللی.
د پاکستان روغتیایي چارواکي په کورنیو غږ کوي، چې د حکومت لهخوا په پر له پسې توګه د پولیو واکسین کمپاینونو کې په فعاله توګه برخه واخلي او د دغې ناروغۍ په مخنیوي کې دې له روغتیایي کارکونکو سره مرسته وکړي.
