طالبانو په خوست کې حکیم تڼیوال پارک د پښتونستان په نامه ونوماوه
د طالبانو د ریاست الوزرا د حکم له مخې، د خوست ولایت په څلورمه ناحیه کې «حکیم تڼیوال پارک» د پښتونستان پارک په نامه نومول شوی.
د طالبانو د ریاست الوزرا د حکم له مخې، د خوست ولایت په څلورمه ناحیه کې «حکیم تڼیوال پارک» د پښتونستان پارک په نامه نومول شوی.
د چهارشنبې په ورځ (د لېندۍ ۱۳مه) د طالبانو په واک کې د خوست ښاروالۍ په یوه اعلامیه کې وویل، چې د دغه پارک او د خوست ښار د ۱۷ نورو ځايونو، ملکيتونو او څلور لارو نوملړ د اطلاعاتو او فرهنګ وزارت له لارې د طالبانو رياست الوزرا ته وړاندې شوی و او د اړوند کمېسيون د پرېکړې او د رییس الوزرا د ځانګړې ګڼې د حکم پر بنسټ د یو شمېر ځایونو او پارکونو نومونه بدل شوي دي.
په دغو نومونو کې د حکیم تڼیوال پارک د پښتونستان پارک په نامه نومول شوی او د ببرک خان منار ته د خپلواکۍ منار نوم غوره شوی دی.
دا لومړی ځل دی، چې طالبان یو پارک د پښتونستان په نامه نوموي.
د طالبانو حکومت له دې وړاندې په کابل کې د پښتونستان څلورلارې شاوخواوې رغولي او هلته یې د مرمرو تېږې هم کارولي دي.
د طالبانو د اطلاعاتو او فرهنګ وزارت د څلورلارو، واټونو او سپېڅلو ځایونو د نومونې کمېسیون په کابل کې د "محمد سالم ایزدیار" څلورلاره هم بېرته په "زنبق" څلورلارې نومولې ده.
