د افغانستان د بهرنیو چارو پخوانی وزیر محمد حنیف اتمر وایي، چې په اسلام اباد کې د حکومت ضد لاریونونو کې د افغان کډوالو د ګډون په اړه د پاکستاني چارواکو دریځ له هغوی سره د ناوړه چلند او تاوتریخوالي نوې څپې راپورته کولی شي.
هغه پر اېکس پاڼه لیکلي، چې د پاکستان او طالبانو ترمنځ وروستۍ ترینګلتیاوې په پاکستان کې د افغان کډوالو پر وضعیت اغېز پرې باسي.
هغه زیاته کړې، چې د پاکستاني چارواکو لهخوا د افغان کډوالو ضد پالیسي به د پاکستان د کمزورې حکومتولۍ، بې ثباتۍ، د بشري حقونو سرغړونو او اقتصادي ناکامۍ ننګونې حل نه کړي.د هغه په وینا، د پاکستان کورنیو ستونزو کې د افغان کډوالو ښکېلول د پاکستان پخوانۍ پالیسي ده او په وینا یې د پاکستان د حکومتولۍ کمزوري ده.هغه دارنګه د څو لسیزو راهیسې د افغان کډوالو په برخه کې د پاکستان د خلکو له کوربهتوبه مننه کړې.نوموړي د پاکستان له خلکو او نړۍوالې ټولنې غوښتي، چې د افغان کډوالو ساتنه وکړي.تر دې وړاندې د پاکستان د کورنیو چارو وزیر محسن نقوي ادعا کړې وه، چې د تحریک انصاف په لاریون کې افغانان هم شامل وو او ۱۲۰ تنه یې نیولي دي؛ خو د تحریک انصاف چارواکو دا ادعا رد کړه، چې ګواکې په لاریون کې افغانانو کډون درلود.له بل پلوه د پښتون ژغورنې غورځنګ مشر منظور پښتین وایي، په اسلام اباد کې افغانان د تحریک انصاف د احتجاج پر مهال نه؛ بلکې له عام بازار او شاوخوا سيمو څخه نيول شوي دي.هغه پر اېکس پاڼه لیکلي، چې دغه نیول شوي افغانان ګواښل کېږي او له دې لارې ترې ویډیويي بیان اخیستل کېږي.هغه زیاته کړې ده: «دغه افغانان ګواښل کېږي، که یې بیان ورکړ؛ نو ژر تر ژره به خوشې شي، که نه په یو درواغجنې قضیه کې به یې ونیسي او زندان ته به یې واچوي.»
