په افغانستان کې د بشري حقونو د خپلواک کمېسیون پخوانۍ مشرې شهرزاد اکبر د سوریې د ولسمشر بشار الاسد د رژیم ړنګېدو ته په اشارې سره وایي: «د اسد ظلم تېر شو، د طالبانو ظلم به هم زمونږ په هېواد کې تېر شي.»
نوموړې دغه خبرې پر اېکس د بشري حقونو د نړۍوالې ورځې په مناسبت کړي دي.
مېرمن اکبر چې طالبان ظالم بللي دي، همداراز په طبي انسټیټوټونو کې د نجونو پر زده کړو د طالبانو بندیزونه هم غندلي او وایي، چې د یادې ډلې حکومت به هم تېر شي.د سوریې د ولسمشر بشار الاسد حکومت چې پر عامو خلکو د ظلم له امله مشهوره شوی و د شنبې په ورځ نسکور شو، چې له روسیې او ایران پرته طالبان او ډېر شمېر نور هېوادونه پرې خوشحاله شوي دي.بشار الاسد له خپلې کورنۍ سره یو ځای له سوریې څخه تر وتلو وروسته روسیې ته پناه وړې.اوس د نوموړي تر واکمنۍ لاندې د پټو بندخونو خبرونه خپرېږي، چې په کې زرګونه کسان له محاکمې پرته شکنجه او اعدام شوي دي.څه هم طالبان د اسد د رژیم په ړنګېدو خوشحاله دي، خو ډېری افغانان بیا یاده ډله د اسد له واکمنۍ او ظلمونو سره پرتله کوي او وایي، چې د طالبانو حکومت د بشارالاسد تر حکومته ډېر ظالم دی.ځیني افغانان ان طالبانو ته پیغور ورکوي، چې په سوریه کې له سترو تحولاتو سربیره په دې هېواد کې هېڅ کومه ګډوډي جوړه شوې نه ده او زرګونه سوري وګړي خپل هېواد ته د ستنېدو تابیا کوي، خو د طالبانو له واکمنۍ وروسته د دغې ډلې د پراخو بندیزونه له امله زرګونه کسان له هېواد څخه ووتل او لا هم د وتلو په حال کې دي.اخوا د ډسمبر لسمه چې د بشري حقونو له نړۍوالې ورځې سره برابره ده، په داسې حال کې نمانځل کیږي، چې طالبان په لوړه کچه د بشري حقونو پر نقض تورن دي.یادې ډلې د نجونو او ښځو پر زده کړو د بندیزونو لګولو سربېره په ټول هېواد کې د محدودیتونو لسګونه فرمانونه وضع کړي، چې له پراخو نیوکو سره مخ دی.طالبانو له څه باندې درېیو کلونو راهیسې ددې ترڅنګ چې خپل دریځ بدل کړی نه دی، ژوند یې لا پسې پر افغانانو سخت کړی دی.
