د پاکستان جمعیت علمای اسلام ګوند مشر مولانا فضل الرحمان تېره ورځ په خپل پلرني ټاټوبي ډېره اسماعیل خان کې یوې خبري ناستې ته ويلي، چې کله هم د «پاکستان حکومت کومې دیني مدرسې ته لاسرسی پیدا کړی بیا مدرسه نه ده پاتې شوې.»
مولانا فضل الرحمان دا خبره داسې مهال کوي، چې تېره میاشت د پاکستان حکومت په دغه هیواد کې د امنیت د ټينګښت په پار له حکومت سره د دیني مدرسو په ثبتېدو ټینګار وکړ.
د پاکستان جمعیت علمای اسلام ګوند مشر مولانا فضل الرحمان تېره ورځ پنجشنبه د (لیندۍ ۲۲مه) په خپل پلرني ټاټوبي ډېره اسماعیل خان کې د خبریالانو یوې غونډې ته ويلي، چې د «پاکستان په تاریخ کې چې د دغه هیواد حکومت کومه مدرسه ثبت کړې او لاسرسی یې ورته پیدا کړی بیا مدرسه نه ده پاتې شوې.»
هغه وايي، دا سمه ده چې حکومت دې د امنیتي حالت د کابو کېدو لپاره ګامونه پورته کړي، خو د «مدرسو په چارو کې لاسوهنه یې موږ ته معلومه ده چې کومې مدرسې ته حکومت ور رسیدلی بیا مدرسه د حکومت په یوه اداره بدله شوې ده.»
هغه د پاکستان په بیلابیلو سیمو کې د مدرسو یادونه کړې چې کله له حکومت سره ثبت شوې او د حکومت لاسرسی ورته شوی هغه اوس په کالجونو او ښوونځیو بدلې شوې دي.
مولانا فضل الرحمان زیاتوي: «د مدرسو ازادي چې له لاسه ووته بیا مدرسه نه؛ بلکې د حکومت یوه اداره وي، هلته دیني علوم ختم شي، سند، بهاولپور، پېښور او ځینو سیمو کې چې کله هم مدرسې حکومت له ځان سره ثبتې کړې اوس ښوونځي او کالجونه په کې جوړ دي او د مدرسې نوم لا ترې ورک شو.»
هغه وايي، د دیني مدرسو په وړاندې د حکومت د داسې ګاومونو اخیستلو په وړاندې به ټول پاکستان او پلازمېنه اسلام اباد کې لاریونونه وکړي.
په پاکستان کې د مدرسو په اړه یوازې د دغه هیواد حکومت اندېښنې نه لري؛ بلکې د پاکستان په ګاونډ کې پراته هیوادونه هم شکایت کوي چې له دغو مدرسو افراطیت د پاکستان په ګډون ورڅېرمه هیوادونو ته خپریږي؟
له ۲۰۰۴ کال نیولې بیا تر ۲۰۲۱ پورې د افغانستان تېرو جمهوري حکومتونو په افغانستان کې د حکومت پر خلاف د نا امنۍ په رامنځته کېدو کې د دغو مدرسو رول ډیر بللی وو، او د پاکستان حکومت ته یې په دغې موده په رسمي او نا رسمي ډول خپل شکایتونه هم کړي وو، خو پاکستان پرې غوږ نه ګراوه.
اوس تازه د پاکستان حکومت په دغه هیواد کې د نا امنۍ تر ډېرېدو وروسته د دیني مدرسو د ثبت چاره پیلوي چې د مذهبي ګوندونو له سخت غبرګون سره مخ شوې ده.
