ځايي سرچینو افغانستان انټرنشنل ته وویل چې د جرمني په فرانکفورت ښار کې د ځدراڼ قوم یو شمېر کسان د حقاني شبکې مخکښ غړي او د طالبانو د کډوالو او بېرته راستنېدونکو وزارت وزیر خلیل الرحمن حقاني غایبانه جنازه او فاتحه اخلي.
د جرمني په فرانکفورټ ښار کې سرچینو نن د یکشنبې په ورځ «د لیندۍ۲۵مه» افغانستان انټرنشنل ته وویل چې د طالبانو د ترور شوي وزیر خلیل الرحمن حقاني د فاتحې لپاره عمومي اعلان شوی دی.
ددغه اعلان یوه کاپي افغانستان انټرنشنل ته هم رارسېدلې ده، چې وايي، « د خلیل الرحمن حقاني غایبانه جنازه او فاتحه نن د یکشنبې په ورځ په فرانکفورټ ښار کې د افغانانو کلتوري ټولنې له خوا په حمزه جامع جومات کې اخیستل کېږي».
دا مراسم د جرمني په ځايي وخت مازیګر له دریو بجو څخه تر پنځو بجو پورې د دوه ساعتونو لپاره تنظیم شوي.
د جرمني پولیسو ته د ځايي افغانانو شکایت
د خلیل الرحمن حقاني د فاتحې مراسمو د ځینو افغانانو غبرګونونه راپارولي دي.
ځینو افغانانو افغانستان انټرنشنل ته وویل چې د مراسمو د مخنیوي لپاره یې د فرانکفورټ ښار پولیسو ته خبر ورکړی چې د خلیل الرحمن حقاني د فاتحې د ترسره کېدو مخه ونیسي.
په فرانکفورټ ښار کې مېشت ځینې افغانان وايی چې دلته د طالبانو د پلویانو حضور هغو افغانانو ته امنیتي ګواښ دی چې د طالبانو پر ناسمو کړنو نیوکه کوي او د دوی مخالف دي.
یوه معترض افغان وویل، « حقانیان د افغانانو قاتلان دي، دوی واک ته له رسېدو مخکې بې ګناه افغانان په خونړیو بریدونو کې وژلي دي، دوی باید محکمې ته کش شي نه دا چې د هغوی فاتحې واخستل شي»
په دغه ښار کې ځیني افغانان له پولیسو غواړي چې ددغو مراسمو مخه ونیسي او د هغو کسانو پر وړاندې ګامونه واخلي چې د مراسمو په جوړولو کې ونډه لري.
تر اوسه پورې د جرمني پولیسو ددغو مراسمو په اړه څه نه دي ویلي.
د طالبانو د کډوالو چارو وزیر خلیل حقاني د چارشنبې په ورځ د لیندۍ پر ۲۱ مه په یوه ځانمرګي برید کې ووژل شو او دبرید پړه داعش پر غاړه واخسته.
د طالبانو له خوا د خپرو شویو معلوماتو له مخې، بریدګر چاودېدونکي توکي په پلستر پوښلي لاس کې ځای پر ځای کړي وو.
