اسراییل په سوریه کې د وسلو زېرمې په نښه کړې دي
د سوریې د بشري حقونو څار اداره وايي، د اسراییل جنګي الوتکو د سوریې په سویل د حما په سیمه کې د توغندیو وېشتونکی ځای او د طرطوس په سیمه کې د وسلو زېرمې په نښه کړې دي.
د سوریې د بشري حقونو څار اداره وايي، د اسراییل جنګي الوتکو د سوریې په سویل د حما په سیمه کې د توغندیو وېشتونکی ځای او د طرطوس په سیمه کې د وسلو زېرمې په نښه کړې دي.
دغې ادارې په یوې خپرې شوې خبرپاڼې کې بیا ویلي، چې د اسراییل یوې جنګي الوتکې د سوریې په ختیځ کې هم د دیرالزور پوځي هوايي ډګر کې د رادارونو پر مرکز هوايي برید کړی دی.
پر سوریې د اسراییل هوايي بریدونو پر دوام، اسراییلي پوځ په یوه اونۍ کې ۸۰۰ ځله د سوریې پوځي تاسیسات، هوايي ډګرونه او د وسلو زېرمې بمبار کړې دي.
اسراييلي ځواکونو د قنيطره ښار ټول بنسټيز تاسيسات ويجاړ کړي دي.
د ایران د سپاه پاسداران قوماندان حسین سلامي اسراییل ته خبرداری ورکړی، چې دغه هېواد به د سوریې د خاورې د «نیواک» لپاره سخته بیه پرې کړي او سوریه به د اسراییلي پوځ په هدېره بدله شي.
له بل پلوه د روسیې د بهرنیو چارو وزارت وايي، د سوریې د خمیمي هوايي اډې څخه د روسیې د هوايي ځواک یوې ځانګړې الوتکې په دمشق کې د روسیې یو شمېر ډیپلوماتیک پرسونل او همدارنګه د بېلاروس او شمالي کوریا ډیپلوماتان اېستلي دي.
د روسیې د بهرنیو چارو وزارت بیا ویلي، چې "په دمشق کې د روسیې د سفارت کار دوام لري".
