په اسلام اباد کې د طالبانو سرپرست سفیر سردار احمد شکېب د پاکستان د لوړو زده د کمېسیون له رییس ډاکټر مختار احمد سره لیدلي او په پاکستان کې یې د افغان محصلینو د ستونزو د حل په موخه ورسره خبرې کړې دي.
په اسلام اباد کې د طالبانو سفارت په خپله اېکس خواله رسنۍ اعلامیه خپره کړې، چې په کې راغلي: «په دې کتنه کې د هغو افغان محصلانو ستونزې چې د پاکستان په بېلابېلو پوهنتونونو کې په زده کړو بوخت دي، د سکالرشیپونو، تحصیلي ویزو، لیلیې، لنډ مهاله کورسونو او دغه راز د نویو محصلینو د ثبت په بهیر کې د شته ننګونو په اړه خبرې وشوې».
په اعلامیه کې وړاندې راغلي، چې ډاکټر مختار احمد د یادو ستونزو د حل په موخه د همکاۍ ژمنه کړې.
د اعلامیې له مخې، د پاکستان د لوړو زده کړو د کمېسیون مشر په دغه ناسته کې وړاندیز کړی، چې د افغانستان او پاکستان پوهنتونونو ترمنځ د ظرفیت لوړولو په موخه د څو اړخیزو پلیټ فارمونو په رامنځته کولو دواړه لوري همکاري وکړي.
تر دې وړاندې په ۲۰۱۷ کې هم ډاکټر مختار د علامه اقبال سکالرشیپ په ۲ سکیم د افغان محصلینو د ملاتړ او د دوه اړخیزو علمي بنسټونو او مسلکي اړیکو غوښتنه کړې وه.
په ۲۰۱۷ کال کې د پاکستان حکومت د افغانستان د محصلينو لپاره د علامه اقبال سکالرشيپ -۲ سکيم په نامه د لسانس، ماسټرۍ او دوکتورا لپاره سکالرشيپونه اعلان کړل، چې د افغانستان اسلامي جمهوريت د لوړو زده کړو وزارت سره په همغږۍ د يوې پېچلې پروسې له لارې ورته محصلين انتخابېدل.
افغان محصلينو ته د پاکستان د سکالرشيپونو لومړی فیز په ۲۰۰۹ کال کې پیل شوی و، چې په بېیلابېلو برخو کې يې افغان محصلين جذب کړي وو.
که څه هم افغان محصلين د نړۍ په مختلفو هېوادونو کې د سکالرشيپونو له لارې زده کړې کوي، خو پاکستان لومړنی هېواد دی چې افغان محصلين په کې د ویزو، د سکالرشيپ د فيسونو او د علمي اسنادو د ترلاسه کولو له امله ستونزو سره لاس او ګرېوان دي.
