خواجه اصف: د طالبانو سره زموږ ستونزه دا ده چې هغوی زموږ مخالفینو ته پټنځایونه ورکړي
د پاکستان د دفاع وزیر وایي چې له طالبانو سره د دوی یواځینۍ ستونزه دا ده، چې هغوی د دوی مخالفو وسله والو ډلو ته د افغانستان په خاوره کې پټنځایونه ورکړي.
د پاکستان د دفاع وزیر وایي چې له طالبانو سره د دوی یواځینۍ ستونزه دا ده، چې هغوی د دوی مخالفو وسله والو ډلو ته د افغانستان په خاوره کې پټنځایونه ورکړي.
مخالفو وسله والو ډلو ته د افغانستان په خاوره کې پټنځایونه ورکړي.
د پاکستان د دفاع وزیر خواجه اصف د جیونیوز سره په مرکه چې د دوشنبې په ورځ د (لیندۍ په ۲۶ مه) خپره شوه وویل: «موږ له طالبانو سره یوه ستونزه لرو او هغه دا ده چې دوی په افغانستان کې ټي ټي پي ته پناه ورکړې او دغه ډله له هغه ځایه بریدونه پلانوي او بیا دلته زموږ امنیت ګواښي.»
له خواجه اصف وړاندې ګڼو نورو پاکستاني چارواکو پر افغان طالبانو ورته تورونه لګولي، او په افغانستان کې یې د تحریک پاکستان ډلې پر پټنځایونو نیوکې کړې دي، او ان تر دې چې په ملګرو ملتونو کې د دغه هېواد ځانګړي استازي هم پر طالبانو تور پورې کړی و او ویلي یې و چې طالبان د افغانستان په خاوره کې ترهګرو ډلو ته پناه ورکوي چې له دې سره د سیمې او نړۍ هېوادونو ته ګواښ پېښوي.
له هغه مهاله چې طالبان د افغانستان په خاوره واکمن شوي، ورسره هم مهاله په پاکستان کې تاوتریخوالي زور اخیستی او د دغه هېواد امنیتي ځواکونو ته درنه مرګ ژوبله هم اوښتې ده.
د پاکستان د څېړنو او مطالعاتو مرکز ویلي، چې په تېرو دریو کالو کې دغلته ترهګریزې پېښې ۹۰ سلنه زیاتې شوېدي.
خو طالبانو تل دغه ادعاوې ردې کړې او د پاکستان امنیتي ځواکونه یې د خپلې خاورې د امنیت په ټینګولو کې پاتې بللې دي، د دې تر څنګ ټي ټي پي ډلې هم په وار، وار ویلي چې د دوی مشران په پاکستان کې دي او له همدغه ځایه پر امنیتي ځواکونو بریدونه کوي.
