د سوریې مخکیني ولسمشر بشارالاسد اعلان وکړ چې د ډسمبر پر اتمه د ډرون بریدونو له امله په ناڅاپي ډول له حمیمیم اډې څخه مسکو ته انتقال شوی دی. هغه د خپل حکومت له ړنګېدو وروسته په خپلو لومړنیو څرګندونو کې وویل چې له دمشق نه یې وتل مخکې له مخکې نه وو پلان شوي.
د سوریې پخواني ولسمشر بشارالاسد په یوه اعلامیه کې چې د دغه هیواد د ولسمشرۍ په ټیلیګرام پاڼه کې خپره شوې، له دمشق څخه د خپلې تېښتې شرایط روښانه کړل.
هغه په دې اعلامیه کې لیکلي دي چې «له سوریې څخه زما وتل نه وو پلان شوي. زه په دمشق کې د یکشنبې تر سهاره د ډسمبر تر اتمې نیټې پورې پاتې شوم او خپلې دندې مې ترسره کړې.»
بشارالاسد ټینګار کړی چې دمشق ته د یاغیانو له نفوذ وروسته له روسیې سره په همغږۍ لاذقیه ته لیږدول شوی څو له هغه ځایه د جګړې د عملیاتو څارنه وکړي.
هغه زیاته کړه، د حمیمیم هوايي اډې ته له رسېدو وروسته معلومه شوه، چې پوځي ځواکونه د جګړې له ټولو لیکو وتلي او د پوځ وروستۍ پوستې سقوط شوې دي.
په دې اعلامیه کې راغلي چې د دغو پیښو په ترڅ کې بشارالاسد د هیڅ شخص یا ادارې له خوا د استعفا یا پناه ورکولو وړاندیز نه دی تر لاسه کړی او د حل یوازینۍ لاره یې د یاغیانو پر وړاندې مبارزې ته دوام ورکول بلل.
اعلامیه وايي، « د جګړې له لومړۍ ورځې هغه څوک چې د خپل هېواد ژغورنه یې په شخصي ګټو نه ده معامله کړې او خپل ولس يې د بې شمېره امکاناتو او وسوسو پر وړاندې نه دی پلورلی، هغه څوک دی چې د اردو د افسرانو او سرتېرو تر څنګ په لومړیو کرښو کې ولاړ و».
د سوریې پخواني ولسمشر همداراز ټینګار کړی چې له خپلو متحدینو سره یې «خیانت» نه دی کړی او هیڅکله یې په فلسطین او لبنان کې د مقاومت له ملاتړه لاس نه دی اخیستی.
د دې اعلامیې په پای کې بشارالاسد ټینګار کړی چې سوریه به یو ځل بیا «ازاده او خپلواکه» شي.
دا څرګندونې د بشارالاسد د حکومت له نسکوریدو او روسیې ته د هغه له تېښتې وروسته لومړنۍ څرګندونې دي.
