د تېر جمهوري نظام د دفاع وزارت سرپرست شاه محمود میاخېل ویلي، چې طالب چارواکي هڅه کوي د خلیل حقاني وژنه عادي پېښه وګڼي، خو دا عادي پېښه نه ده، بلکې د طالبانو د خپلمنځیو اختلافاتو بېلګه ده.
د طالبانو د کډوالو چارو وزیر خلیل حقاني د چهارشنبې په ورځ د لېندۍ په ۲۱مه په یوه ځانمرګي برید کې ووژل شو، چې د دغه برید پړه داعش ډلې پر غاړه اخیستې ده.
خو له کابل څخه باوري سرچينو افغانستان انټرنشنل ته ويلي، چې د طالبانو استخباراتو د کډوالو چارو وزارت دوه کارکوونکي د دغې ډلې د کډوالو چارو د وزير خليل الرحمان حقاني په وژنه کې د لاس لرلو په تور نيولي دي.
تر اوسه د دغو کسانو د هويت په اړه څه نه دي ويل شوي.
په دغه برید کې د خلیل الرحمن حقاني تر څنګ لږ تر لږه شپږ نور کسان هم وژل شوي دي.
د جمهوري حکومت د دفاع وزارت سرپرست شاه محمود میاخېل افغانستان انټرنشنل - پښتو ته وویل: «طالبانو په تېرو دوه او درېیو لسیزو کې له بېلابېلو جنایي او ترهګریزو ډلو سره یو ځای د افغانستان د حکومت په وړاندې جنګ کړی دی، نو د دوی لپاره ستونزمنه ده، چې خپل صفونه تصفیه کړي، باوري سرچینې دا وایي، چې د دغه صفونو د تصفیې په لړ کې د طالبانو زرګونه کسان بندیان شوي او دا په خپله ښیي، چې د طالبانو په منځ کې مختلفې ډلې شتون لري».
ښاغلی میاخېل وایي؛ څومره طالبان چې خپله د طالبانو حکومت بندیان کړي دومره جمهوریت هم نه وو بندیان کړي.
د نوموړي په وینا، که حالات دغه ډول دوام وکړي نو افغانستان د نیابتي جګړو په ډګر بدلېدونکی دی.
یاده دې وي، چې خلیل الرحمان حقاني د جهادي مشر (جلال الدین حقاني) ورور او د کورنیو چارو وزیر سراج الدین حقاني تره وو، چې د طالبانو د حکومت له پېل تر مرګ د ګډوالو او بېرته راستنېدونکو چارو وزارت سر پرست وزیر وو
