سعد محسني: که طالبان پر ښځو بندیزونه لرې کړي ممکن نړۍواله ټولنه ورسره تعامل وکړي
د موبي رسنیز ګروپ مشر سعد محسني ویلي، که طالبان په ښځو لګېدلي بندیزونه راکم کړي، نجونو او ښځو ته د تعلیم او کار اجازه ورکړي، نو ښایي نړۍواله ټولنه ورسره تعامل وکړي.
د موبي رسنیز ګروپ مشر سعد محسني ویلي، که طالبان په ښځو لګېدلي بندیزونه راکم کړي، نجونو او ښځو ته د تعلیم او کار اجازه ورکړي، نو ښایي نړۍواله ټولنه ورسره تعامل وکړي.
سعد محسني د خپل کتاب ریډیو فري افغانستان په اړه د فرانس ۲۴ ټلوېزون سره په مرکه کې ویلي، چې د طالبانو لپاره ښه فرصت دی، چې د بشر حقونو ته درناوی وکړي او د ښځو پر وړاندې د تعلیم او کار په اړه لګېدلي بندېزونه لرې کړي، تر څو نړۍواله ټولنه ورسره له تعامل څخه کار واخلي.
له نوموړي د یوې پوښتنې په ځواب کې چې ایا تاسو غواړی افغانستان ته ولاړ شی وویل: «نه زه نه غواړم چې افغانستان ته ولاړ شم، خو کله چې افغانستان کې نجونو او ښځو ته د زده کړو او کار اجازه ورکړل شوه بیا به لاړ شم».
سعد په دغه مرکه کې وویل، چې په رسنیو کې ښځې په مطلق ډول له کار کولو نه دي راګرځول شوي، بلکې کولی شي د پردې تر شاه خپل کارونه مخته یوسي.
په افغانستان کې د طالبانو بیا واک ته رسېدو سره په بېلابېلو برخو کې سخت بندیزونه وضع شول، د نجونو او ښځو پر وړاندې د تعلیم دروازې وتړل شوې او پر کار یې بندیز ولګول شو.
د ښځو پر زده کړو د طالبانو وروستی اقدام په طبي زده کړو بندیز دی، چې نړۍوالې ټولنې په سختو ټکو وغانده.
په افغانستان کې د ملګرو ملتونو د مرستندوی پلاوي (یوناما) مشرې روزا اوتنبایوا د امنیت شورا ورستۍ انلاین غونډې ته وویل، چې په طالب چارواکو یې سخت فشار راوړی، چې د نجونو په طبي زده کړو باندې د بندیز په پرېکړې بیا کتنه وکړي.
نوموړې وویل، چې طالب چارواکو په دوامداره توګه د یو داسې اسلامي نظام په اړه خپل فکر تعقیبوي، چې «ځانګړتیاوې» یې په ښځو او نجونو باندې «بې سابقه» بندیزونه دي.
