د خیبر پښتونخوا په کورمې ولسوالۍ کې له ۷۰ ورځو راهیسې د لویو لارو د تړل کېدو له امله سلګونه زره خلک له ګڼو ستونزو سره مخامخ شوي او وایي؛ که لارې خلاصې نه شي نو بشري ناورین به رامنځته شي.
له تېرو ۷۰ ورځو راهیسې د مذهبي تاوتریخوالي له امله د پاړه چنار او کورمې د لویې لارې تر څنګ د خرلڅۍ دروازه لاهم تړلې پاتې ده چې له امله یې خلک د خوړو او سون توکو له سخت کمي سره مخامخ شوي دي.
د صوبايي اسمبلۍ غړی علي هادي عرفاني وایي، چې د خوراکي توکو نشتوالي له امله خلک د سختې لوږې سره مخامخ شوي او ځیني بیا د درملو د نشتوالي له امله په روغتونوتو کې ساوې ورکوي.
هغه دارنګه د دغې لویې لارې د ژر پرانیسو غوښتنه کړې ده.
سیمهییز چارواکي وایي، چې د دوو میاشتو راهیسې په روغتونو کې د درملو د کمښت له کبله ۲۹ ماشومان مړه شوي دي.
چارواکي زیاتوي، که روغتون ته په بېړني ډول درمل و نه رسېږي، لرې نه ده چې په کورمې ولسوالۍ کې خلک د ستر بشري ناورین سره مخامخ شي.
که څه هم چې په تېرو څو اونیو کې د حکومتي جرګې تر څنګ قومي جرګې هم سیمې ته استول شوې؛ خو تر اوسه د دغو تړلو لارو د خلاصون څرک نه دی لګېدلی.
